Numbers 10:1-36
10 Áádóó Bóhólníihii éí Mózes yichʼįʼ hanáánáádzíiʼgo ání,
2 Béésh łigaii bee dilní bee íʼdílzoołí naakigo íidoolíiłgo íínísin; hashtʼeʼnibíʼdííłniił, áko éí choiníłʼı̨́įgo Ízrel dineʼé tʼáá ałtso bá nídiiłtsʼı̨́įhgo áłah nádleeh doo áádóó dah nídiiʼnéeh doo.
3 Áko tʼáá áłah nídiiłtsʼı̨́įhgo níbaal biiʼ dahozdísinii bichʼéédą́ąʼgi tʼáá ałtso naa áłah nádleeh doo.
4 Nidi tʼááłáʼí nídiiłtsʼı̨́įhgo éí Ízrel dineʼé bitahdę́ę́ʼ aląąjįʼ naazíinii éí miilgo yinanitʼaʼí danilíinii naa áłah nádleeh doo.
5 Áko bee iʼníłníihgo éí nízaadgóó nídiiłtsʼı̨́įhgo haʼaʼaahjígo dah oonéłígíí dah nídiiʼnéeh doo.
6 Áádóó bee iʼníłníihgo éí naaki góneʼ nízaadgóó nídiiłtsʼı̨́įhgo shádiʼááhjígo dah oonéłígíí dah nídiiʼnéeh doo, áko nihidoonéełgo nízaadgóó bá nídiiłtsʼı̨́įh doo.
7 Áádóó oonéłígíí áłah ádooníiłgo éí áłtsʼísígo dilní nídiiłtsʼı̨́įh doo, nidi doo bee iʼílníhígi átʼéego nízaadgóó nídiiłtsʼı̨́įh da doo.
8 Éran biyeʼké náás ahoolchíiłii náádaʼiiłniihii danilı̨́įgo éí dilní yee áńdadiʼniih doo; díí bikʼehgo hoogáałii hoolʼáágóó náás oochííłgóó nihá átʼée doo.
9 Áko nihikéyahgi anaʼí nihichʼįʼ nahwiiłnáago bikʼijįʼ anaaʼ ádaahłéehgo nízaadgóó éí dilní didííłtsʼı̨́įłgo bee iʼdííłnih, áko Bóhólníihii nihiDiyin God binááł nihéédahodoonihgo nihiʼanaʼí bitsʼą́ąjįʼ yisdádoohkah.
10 Áko nihił dahózhǫ́ bijı̨́ áádóó dahodíínóhsingo áłah náhdleeh bá nídahootʼaah góneʼ índa dah néitı̨́ı̨́h góneʼ didlidgo nááhidoonihii áádóó hózhǫ́ǫ́jí nááhániihii náádahołniihgo ałdóʼ éí dilní bá nídoołtsʼı̨́įh doo; díí éí nihiDiyin God binááł bee nihééhániihii átʼée doo; jó, shí Bóhólníihii nihiDiyin God nishłı̨́.
Sáínaidóó Ízrel dineʼé dah diiná
11 Naaki nááhai góneʼ naaki nídízííd binih naadiin jı̨́ı̨́ góneʼ níbaal biiʼ hodílzinii, éí neeznáago bikʼeh óʼooʼníiłii bee bééhániihii biiʼ sinilii, bikááʼdóó kʼos dah diilzhóód.
12 Áádóó Ízrel dineʼé éí Sáínai honoojíídóó dah dadiiná, áko éí Péíran honoojíigi kʼos niildoh.
13 Díí índída nihidadziiznáago Bóhólníihii éí Mózes yichʼįʼ yee haadzíʼígíí bikʼehgo dashdiiná.
14 Júdah dineʼé daníjaaʼgo bidah naʼatʼaʼí yikʼehgo alą́ąjįʼ dah diiná; díí dah oonéłígíí éí Amínadab biyeʼ Náshan á sizı̨́.
15 Áádóó Ísakar dineʼé dah yinéłígíí éí Zúʼer biyeʼ Niithániyel á sizı̨́.
16 Áádóó Zébyulan dineʼé dah yinéłígíí éí Híílan biyeʼ Iiláíyab á sizı̨́.
17 Áko níbaal biiʼ hodílzinii niʼdiitʼą́ągo éí Gérshan áádóó Miirárai biyeʼké éí níbaal biiʼ hodílzinii deíyeehgo dah diiná.
18 Áádóó Rúben dineʼé daníjaaʼgo bidah naʼatʼaʼí yikʼehgo dah diiná; díí dah oonéłígíí éí Shédiyer biyeʼ Iiláízer á sizı̨́.
19 Índa Símiyan dineʼé dah yinéłígíí éí Zúrishádai biyeʼ Shiilúmiyel á sizı̨́.
20 Áádóó Géed dineʼé dah yinéłígíí éí Dúwel biyeʼ Iiláíyasaf á sizı̨́.
21 Índa Kóhath dineʼé éí níbaal biiʼ hodílzinii góneʼ dadílzingo chodaoʼíinii deíjáahgo nihidahaazná, áko tʼah doo jínééhgóó habaʼ níbaal biiʼ hodílzinii nideizʼą́.
22 Áádóó Íífreiyim dineʼé daníjaaʼgo bidah naʼatʼaʼí yikʼehgo dah diiná; díí dah oonéłígíí éí Amáíhad biyeʼ Iilíshama á sizı̨́.
23 Índa Manáseh dineʼé dah yinéłígíí éí Piidázer biyeʼ Gaméíliyel á sizı̨́.
24 Áádóó Bénjamin dineʼé dah yinéłígíí éí Gídiyónai biyeʼ Abáídan á sizı̨́.
25 Áádóó Dan dineʼé daníjaaʼgo bidah naʼatʼaʼí yikʼehgo éí akéédę́ę́ʼ aa ádahalyą́ą doo biniyé dah diiná: díí dah oonéłígíí éí Amishádai biyeʼ Eihaiyíízer á sizı̨́.
26 Áádóó Ásher dineʼé dah yinéłígíí éí Ákran biyeʼ Péígiyel á sizı̨́.
27 Índa Náftalai dineʼé dah yinéłígíí éí Íínan biyeʼ Aháíra á sizı̨́.
28 Kótʼéego Ízrel dineʼé dah deínéehii ahíłkééʼ deínééh.
29 Áko Mózes yaadaaní nilíní, Mídiya dineʼé nilíinii Rúwel biyeʼ Hóbab ííłní, Bóhólníihii, Kéyah nihaa dideeshʼááł, nihidííniidígóó yiiʼnééł; hágo tįʼ, áko yáʼátʼéhígi ádaniilʼı̨́į doo, háálá Bóhólníihii éí yáʼádaatʼéehii Ízrel dineʼé yeididooʼáałgo yee nihoníʼą́.
30 Nítʼééʼ Hóbab áháłní, Doo nihił déshkai da; tʼáá shí shikéyahgóó áádóó shikʼéí bichʼįʼ nihéédeeshdááł.
31 Áádóó Mózes ání, Baa nánooshkąąh, doo nihitsʼą́ą́ʼ nihidíínáał da, háálá ni tʼéí ééhonísin; honoojítahgi yiiʼnéełgo nihá hwííníʼı̨́įgo nihííʼish doo.
32 Áko nihił dínínáá ládą́ą́ʼ yáʼádaatʼéehii Bóhólníihii nihá áyoolííł dooleełígíí tʼáá ákótʼéego nihí ałdóʼ nichʼįʼ tʼáá ákódeiiʼníił doo.
33 Áádóó Bóhólníihii bidziłdóó dashdiináago tágí jı̨́ joonééł; há dazdéezʼı̨́įʼgo Bóhólníihii bitsitsʼaaʼ dílzinii éí bee ahaʼdeetʼáanii biiʼ sinilii halą́ąjįʼ yitʼáałgo tágí jı̨́ joonééł, áko haaʼída nidahizhdoonéełgi baa nidazhʼnitá.
34 Áko Bóhólníihii bitsʼą́ą́dóó kʼos hakáaʼgi jı̨́įgo nihináldohgo dah nízhdiiʼnééh.
35 Nítʼééʼ tsitsʼaaʼ dílzinii niheetʼáahgo Mózes ániih, Bóhólníihii díldzíiłgo hániʼdii niʼanaʼí danilíinii tanánoołkaʼ doo; hániʼdii nikʼee nidanichée doo.
36 Áádóó hashtʼeʼniitʼáahgo Mózes ániih, Bóhólníihii nílíinii, Ízrel dineʼé tʼóó ahayóí miilgo ánéelą́ʼígíí bił nááhonídlǫ́ǫ leʼ.
