Numbers 11:1-35
11 Áko Ízrel dineʼé saad dahojisłı̨́įʼgo Bóhólníihii doo bił dahojííshǫǫd da, áko hodiiztsʼą́ąʼgo báhóóchįįdgo Bóhólníihii bitsʼą́ą́dóó kǫʼ diltłiʼgo abąąhdi haníbaal naaznilígíí łaʼ áhásdįįd.
2 Áádóó diné éí Mózes yichʼįʼ hadadeeshghaazh, áko Mózes éí Bóhólníihii bichʼįʼ sozdoolzingo kǫʼ náneeztsiz.
3 Áádóó ákwii hazʼánígi Táberah* hoolyée doo, jidííniid, háálá hatahgi Bóhólníihii bitsʼą́ą́dę́ę́ʼ kǫʼ dahodííłidgo áhásdįįd.
4 Áko hatahdóó doo Ízrel dineʼé danilíinii éí chʼiyáán ałtaasʼéí yídin biʼniiná, índa Ízrel dineʼé ałdóʼ daachago ádaaní, Háishąʼ nihaʼdoołtsołgo daʼdiilghał?
5 Béédeiilniihii éí Ííjip kéyahdi tʼáá nííkʼeh łóóʼ, taʼneeskʼání díkʼǫ́zhígíí, chʼééh jiyání, chʼil daadánígíí, tłʼohchin índa chʼil díchʼíʼígíí deidą́ą́ nítʼééʼ,
6 nidi kʼad díí chʼiyáán doo chʼídanihidíísįįd da, áádóó bidookįįłii ádin; tʼáá hazhóʼó díí mána tʼéí hólǫ́.
7 Áko mána éí chʼil kóriyander bílástsiiʼ nahalin áádóó tsé déliyam wolyéhígíí nahalingo łigai.
8 Áádóó diné chʼínákahgo nínádayiidlahgo nídeikʼááh nítʼééʼ, doodaiiʼ nídeitsiʼgo ásaaʼ yiiʼ nídeiłtʼisgo bááh ándayiilʼįįh nítʼééʼ; bááh éí akʼah bił ályaago sitʼéhígíí éigi áhálniih.
9 Áko tłʼéeʼgo dah oonéłígi dahtooʼ éí mána tʼáá bił ninánídah.
10 Áko Mózes azdiiztsʼą́ąʼgo diné baʼáłchíní bitahgóó diné daacha; diné tʼááłáʼí nítínígo dabiníbaal bichʼéédą́ąʼgi chaał hadahasʼá, áko Bóhólníihii ayóó átʼéego báhóóchįįd; Mózes ałdóʼ doo yił dahóóshǫǫd da.
11 Áko Mózes éí Bóhólníihii áyidííniid, Haash yitʼéego ná naalʼaʼí bichʼįʼ nahoyíłná? Haash yitʼéego doo nił yáʼáníshtʼééhgóó díí diné tʼáá átʼé shide átʼéego íinilaa?
12 Shitsʼą́ą́dóósh díí diné tʼáá ałtso bidaʼniitsąąd? Nehéłchı̨́įgoósh áshidiní, Ádííníltąʼgo yíjih; tʼáá azhéʼé beʼawééʼ ałtʼoʼiigi átʼéego dabizhéʼé yę́ę bichʼįʼ kéyah bee ádee hadíínídzíʼígíí biih dííʼish, shidiní?
13 Háádę́ęʼshąʼ atsįʼ shóideeshtʼeełgo díí diné tʼáá átʼé baʼdeestsoł? Háálá shichʼįʼ daachago ádaaní, Atsįʼ nihaʼníłtsóodgo daʼdiilghał.
14 Díí diné tʼáá ałtso tʼáá sáhí náás yishʼish dooígíí doo bíneeshʼą́ą da, háálá tʼáá íiyisí shá nantłʼa.
15 Tʼóó kóshílééh tʼáá kʼad shiyíłhé baa nánooshkąąh; nił yáʼáníshtʼééh ládą́ą́ʼ áníshtʼéhígíí joobaʼ; tʼááká woostsééł lágo.
16 Áádóó Bóhólníihii éí Mózes ííłní, Ízrel dineʼé hastóí danilíinii, éí diné yá aląąjįʼ naazíinii áádóó naatʼáanii danilíinii béédahonísinígíí bitahdę́ę́ʼ tsostsʼidiingo shá ahíiníiłgo níbaal biiʼ dahozdísiníjįʼ niníʼéésh; ákwii nił deidoozįįł.
17 Áko áajįʼ hadahodeeshłeełgo ákwii nił ałchʼįʼ hadeesdzih, áádóó níłchʼi nił hólónígíí éí haa dideeshʼáałgo diné bee bide ádahootʼéhígíí bichʼįʼ nił dadzíldzíił doo, áko doo tʼáá sáhí yíʼish da doo.
18 Áádóó diné ábidiní, Yiską́ągo biniyé tʼáá nihí diyingo ádítsʼąą dasoohtiʼgo ádadiʼdoołnííł, áko daʼdoołghał, háálá Bóhólníihii nihidiitsʼaʼgo daahchago ádadooniid, Háishąʼ atsįʼ nihaʼdoołtsołgo daʼdiilghał? Jó, Ííjip kéyahdi éí nihá yáʼáhootʼééh nítʼééʼ, dadohní. Éí bąą Bóhólníihii atsįʼ nihaʼdoołtsołgo daʼdoołghał.
19 Doo éí tʼáá łaʼa jínígo dadoohsı̨́įł da, doodaiiʼ naaki jı̨́da, doodaiiʼ ashdlaʼa jı̨́da, doodaiiʼ neeznáá jı̨́da, doodaiiʼ naadiin jı̨́da,
20 nidi łaʼ nídeezidgóó daohsą́ą doo; wónáásdóó nihił dahodoolchxı̨́įłgo bídasoołkwi doo, háálá nihitahgi Bóhólníihii hólónígíí dasooʼįįdgo binááł daahchago ádadohní, Haʼátʼíísh biniyé Ííjip kéyahdę́ę́ʼ chʼíniiʼná?
21 Nidi Mózes ání, Diné bitahgi naasháhígíí éí hastą́ądi neeznádiindi míilgo nidaabaahii danilı̨́, áko ádíní, Atsįʼ baʼdeestsołgo łaʼ nídeezidgóó daʼalghał doo.
22 Dibé áádóó béégashii bá nidootsiłgo éí tʼáá daatsʼí bidínóołnah? Doodaiiʼ tónteel biyiʼdę́ę́ʼ łóóʼ tʼáá átʼé áłah ádoolníiłgo tʼáá daatsʼí bidínóołnah?
23 Áko Bóhólníihii éí Mózes ííłní, Daʼ Bóhólníihii bílaʼásh yee nihiʼoh neelʼą́? Kʼad dínííłʼįįł, shizaad daatsʼí bohodoolnííł, doodaiiʼ doo daatsʼí bohodoolníił da.
Hastóí aląąjįʼ naazíinii nidahasneʼ
24 Áádóó Mózes éí Ízrel dineʼé yichʼįʼ chʼíníyáago Bóhólníihii bizaad yee hachʼįʼ hahaasdzíʼígíí bee bił nahodzisneʼ, áádóó tsostsʼidiingo hastóí aląąjįʼ naazíinii ahíjiinilgo níbaal biiʼ hodílzinii binaagóó ahéénízı̨́įgo ájiilaa.
25 Áko Bóhólníihii éí kʼos yee hadahóóleʼgo hachʼįʼ haadzííʼ, áádóó níłchʼi hoł hólónígíí éí tsostsʼidiingo hastóí aląąjįʼ naazíinii łaʼ yeidiníʼą́, áko éí níłchʼi bikʼi dahooleʼgo Diyin God yá dahoolneʼ, áádóó tʼáadoo ákónáádaadzaa da.
26 Nítʼééʼ diné naakigo tʼáá níbaal haalʼáhídi naaʼaash lá; éí Éldad áádóó Míídad wolyé; éí ałdóʼ níłchʼi bikʼi hooleʼgo diné nídiiʼnilgo bízhiʼ ádaalyaaígíí yitah nilı̨́, nidi níbaal biiʼ hodílzinii siʼáníjįʼ tʼáadoo deezhʼáazh da, áádóó tʼáá níbaal sinilídi Diyin God yá nahasneʼ.
27 Áko dinééh léiʼ Mózes yaa yílwodgo yił hoolneʼgo ání, Éldad áádóó Míídad níbaal haalʼáhídi Diyin God yá halneʼ.
28 Áádóó Nan biyeʼ Jáshowa éí tʼáá ániid naagháádę́ę́ʼ Mózes yá naalʼaʼí nilı̨́įgo haadzíiʼgo ání, Shinanitʼaʼí Mózes, díí tʼáadoo ádóhníní, bidiní.
29 Nidi Mózes áháłní, Shíísh shiniinaa iiníłchʼı̨́ı̨́d? Bóhólníihii bidineʼé tʼáá átʼé Diyin God yá dahalneʼ dooleełígíí áádóó Bóhólníihii biNíłchʼi bikʼi dahwiidooleełígíí laanaa nisin.
30 Áádóó Mózes índa hastóí aląąjįʼ naazíinii bił níbaal haalʼáhígóó níjíkai.
Bóhólníihii éí déłdánii yiníłniiʼ
31 Áko Bóhólníihii bitsʼą́ą́dę́ę́ʼ deeyolgo tónteeldę́ęʼgo déłdánii yiníłniiʼgo éí łaʼa jı̨́ oodááł ánízahjįʼ łahjí níbaal haalʼá bíighahjįʼ áádóó łahjí níbaal hanáánálʼá bíighahjįʼ nahineezdeeʼ; dah oonééł tʼáá átʼé binaagóó táadi ké silá íídéetą́ąʼgo ałkʼi yáádaaʼá.
32 Áádóó shá bíighah áádóó tłʼééʼ bíighah índa náábiiskání ałdóʼ diné adahideezı̨́įgo déłdánii nídayiizlááʼ, áko áłchʼı̨́ı̨́dí nídayiizláʼígíí éí ásaaʼ neeznáá bee ookááł bíighahgo nídayiizlááʼ, áko éí tʼáá átʼé níbaal dabinaagóó ádá shą́ą́ʼ nideiznil.
33 Áko atsįʼ tʼóó ázadadzistʼánígo Bóhólníihii hachʼįʼ báhóóchįįd, áko Bóhólníihii éí tʼóó báhádzidgo naałniihii yiníłniiʼgo yee nahastseed.
34 Ákwii Kíbrath-hatéíʼavah* hoolyée doo, jidííniid, háálá ákwii diné achʼą́ bidaʼniighą́ą́ʼ yę́ę yóóʼádajiilaa.
35 Áádóó Kíbrath-hatéíʼavahdóó Hazíírathjįʼ Ízrel dineʼé náánáʼnáago Hazíírathgi niníná.
Footnotes
^ Táberah jiníigo éí Hííbrew kʼehjígo diltłiʼgo jinínígi átʼéego diitsʼaʼ.
^ Kíbrath-hatéíʼavah jiníigo éí Hííbrew kʼehjígo áchą́deídéelniʼii bijishchááʼ jiníigo óolyé.
