Numbers 12:1-16
12 Áko Mózes éí Iithiyópiya dineʼé asdzání báʼdzízyehígíí biniinaa Míriyam áádóó Éran hakʼijįʼ nilı̨́įgo haadzííʼ, háálá Iithiyópiya dineʼé asdzání nilíinii báʼdzízyeh.
2 Áádóó ání, Daʼ Mózes daatsʼí tʼéiyá binahjiʼ tʼáá aaníí Bóhólníihii hahadziih? Daʼ nihiísh doo nihinahjįʼ hahadziih da? Áko Bóhólníihii hodiiztsʼą́ą́ʼ.
3 Áko Mózes diné jílíinii tʼáá íiyisí aʼohgo íʼdólzinii jílı̨́; nihokááʼ dineʼé tʼáá ałtso bitahgóó ákójítʼé.
4 Áko tʼáadoo hooyání Bóhólníihii éí Mózes áádóó Éran índa Míriyam yichʼįʼ haadzííʼ, Wóshdę́ę́ʼ tánółtʼéego níbaal biiʼ dahozdísinjįʼ chʼínóhkááh. Áádóó tájíltʼéego áajįʼ chʼíjíkai.
5 Áádóó kʼos níyizii hadaaldohgo éí Bóhólníihii yiiʼjįʼ hadahóóleʼgo níbaal biiʼ hodílzinii bichʼéédą́ąʼgi yiizįʼgo Éran áádóó Míriyam yíká ádííniid, áko tʼáá ájíłah áajįʼ chʼízhníʼáázh.
6 Áko áháłní, Kʼad shizaad doohtsʼı̨́ı̨́h; shá halneʼii nihitahgi hólǫ́ǫgo shí, Bóhólníihii nishłíinii, tʼáá shí ił áhátʼı̨́ biiʼdóó bichʼįʼ ádééhodeesdzįįł, naʼiigeeł biiʼdóó bichʼįʼ hadeesdzih.
7 Shá naalʼaʼí Mózes éí doo ákótʼéego bichʼįʼ hadeesdzih da; éí tʼéí shidineʼé tʼáá ałtso bitahdóó baʼahódlí.
8 Éí tʼéí bił tʼáá ałzééʼdóó tʼáá bééhózínígo bił ałchʼįʼ yáshtiʼ; saad nantłʼaii doo bee bichʼįʼ yáshtiʼ da; Bóhólníihii átʼéegi náyiiltsééh; éí bąą haash yitʼéego shá naalʼaʼí Mózes bikʼijįʼ nohłı̨́įgo hadoohdzihígíí doo bikʼee nihił yéeʼ da?
9 Áko Bóhólníihii hachʼįʼ báhóóchįįdgo dah náhodiidleʼ.
10 Áádóó níbaal biiʼ hodílzinii bitsʼą́ą́dóó kʼos dah nídiildoh; jó, Míriyam éí łóód atsʼíís yiyáanii yasgi átʼéego łigaigo hodoolnaʼ, áko Éran éí Míriyam jinééłʼı̨́ı̨́ nítʼééʼ, shoo, łóód atsʼíís yiyáanii bidoolnaʼ lá.
11 Áko Éran éí Mózes ííłní, Shinanitʼaʼí, tʼáá shǫǫdí, díí bee ádił asiilziihígíí doo nihikʼijįʼ síníłʼą́ą da doo; doo áhwiilyą́ą́góó íidzaaígíí bee ádił asiilziih.
12 Łaʼda bitsʼíís łahjįʼ dííłdzidgo bimá biishchʼid biiʼdę́ę́ʼ tʼáá daaztsą́ągo háátłizhígi átʼéego tʼááká ákóhóleʼ lágo.
13 Áádóó Mózes éí yéego Bóhólníihii yíká ádííniidgo ání, Diyin God nílíinii, kʼad náhółdziih, baa nánooshkąąh.
14 Áko Bóhólníihii éí Mózes ííłní, Hazhéʼé nidi haniiʼ yikʼídeezhéeʼgo tsostsʼid yiską́ąjįʼísh baa yáznízin doo? Hániʼdii tsostsʼid yiską́ąjįʼ níbaal haalʼá bitsʼáhwiiníʼą́ą́góó kóhodiʼdoolnííł, áádóó bikʼijįʼ índa nihił yah anízhdoodááł.
15 Áádóó tsostsʼid yiską́ąjįʼ Míriyam éí níbaal haalʼá bitsʼáhwiiníʼą́ą́góó kóhoʼdiilyaa, áko diné tʼáadoo niheenéhí Míriyam bił yah anídadziskaijįʼ índa.
16 Áádóó bikʼijįʼ índa Hazíírahdóó Ízrel dineʼé dah náádiiʼnáago Péíran honoojíigi nináánáʼná.
