Numbers 13:1-33
13 Áádóó Bóhólníihii éí Mózes yichʼįʼ haadzíiʼgo ání,
2 Diné dadíłʼáago Kéínan kéyah hadeidoosił; éí Ízrel dineʼé baa dinishʼaahígíí dabizhéʼé yę́ę bidineʼé tʼáá ałtso bitahdóó aląąjįʼ naazínígíí łaʼ dadííłʼaał.
3 Áko Mózes éí Bóhólníihii hachʼįʼ yee haadzíʼígíí bikʼehgo Péíran honoojíídóó dah dazhdiiłʼaʼ; éí tʼáá ałtso Ízrel dineʼé aląąjįʼ naazíinii danilı̨́.
4 Éí kótʼéego dabiʼdójí: Rúben dineʼé bitahdóó Záker biyeʼ Shamúwa.
5 Símiyan dineʼé bitahdóó Hórai biyeʼ Shéífat.
6 Júdah dineʼé bitahdóó Jiifáneh biyeʼ Kéíleb.
7 Ísakar dineʼé bitahdóó Jóseph biyeʼ Ígal.
8 Íífreiyim dineʼé bitahdóó Nan biyeʼ Hoshíya.
9 Bénjamin dineʼé bitahdóó Réífu biyeʼ Páltai.
10 Zébyulan dineʼé bitahdóó Sódai biyeʼ Gádiyel.
11 Jóseph dineʼé, tʼáá éí Manáseh dineʼé bitahdóó Súsai biyeʼ Gádai.
12 Dan dineʼé bitahdóó Giimáli biyeʼ Ámiyel.
13 Ásher dineʼé bitahdóó Máíkel biyeʼ Sííther.
14 Náftalai dineʼé bitahdóó Váfsai biyeʼ Nábi.
15 Géed dineʼé bitahdóó Méíkai biyeʼ Giiyúwel.
16 Diné kódaolyéhígíí éí kéyah hadeidoosił biniyé Mózes abiisʼaʼ. Áko Mózes éí Nan biyeʼ Hoshíya wolyéii Jáshowa bee jíízhiʼ.
17 Áko Kéínan kéyah hadeidoosił biniyé Mózes éí diné deideesʼaadgo ííłní, Díí kéyah shádiʼáahjigo áádóó dził bíidoohkah;
18 kéyahgi haa hootʼé éí hadadoohsił; diné dabidziilgo daatsʼí kéédahatʼı̨́, dooda daatsʼí; tʼáá díkwíhí, doodaiiʼ ląʼí daatsʼí,
19 áádóó kéyah lá haa hootʼéego yiiʼ kéédahatʼı̨́; yáʼáhootʼééh, doodaiiʼ doo daatsʼí yáʼáhootʼéeh da, áádóó kin hadaasʼáii haa daatʼéii yiiʼ kéédahatʼı̨́; níbaal daatsʼí yiiʼ dabighan, doodaiiʼ bidziilgo bináʼástłʼingo daatsʼí kéédahatʼı̨́,
20 índa kéyah bikááʼ haa hootʼé; ádaʼazįįd daatsʼí, doodaiiʼ doo daatsʼí ádaʼazįįd da; tsin daatsʼí deílʼá, ádin daatsʼí. Áádóó chánah ádaʼdííʼnółdzingo kéyah bikááʼ daneestʼáanii łaʼ nídadoohjih. Áko kʼad éí chʼil naʼatłʼoʼii átsé nínádantʼı̨́hígíí daneestʼą́ąjįʼ ahoolzhiizh.
21 Áko ákóde dashdiikaigo kéyah honoojí Zin hoolyéhídóó Rííhobjįʼ éí Héímath yah ahóótʼiʼjįʼ hadajíísid.
22 Áádóó kéyah shádiʼááhjí hoolyéédę́ęʼgo hadziskaigo Hííbran kin haalʼáajįʼ jíkai; ákwii Éínak baʼáłchíní Aháíman, Shííshai índa Tálmai daolyéii kéédahatʼı̨́ı̨́ lá. (Hííbran kin haalʼáii ályaadóó bikʼijįʼ tsostsʼid nááhaigo Ííjip kéyah nahósʼaʼgi Zówan kin haalʼáago áhoolyaa.)
23 Áko Éshkol góyaa tó nílíníjįʼ jíkai; ákwii chʼil naʼatłʼoʼii bitsʼáozʼaʼ bineestʼąʼ tʼáá bąąh dah siyı̨́įgo kʼídadzisneʼ; nizhdiltʼéego tsin hataʼ naníʼáago bee nihizhníyı̨́, áádóó pámgrenit bineestʼąʼ índa fig naazkaadii bineestʼąʼ ałdóʼ nidadzizyı̨́.
24 Ákwii tó nílínígíí Éshkol* hoolyée doo, dazhdííniid, háálá ákwii Ízrel dineʼé éí chʼil naʼatłʼoʼii bitsʼáozʼaʼ bineestʼąʼ tʼáá yił kʼídeisneʼ.
25 Áádóó dízdiin yiską́ąjįʼ kéyah ałtso hadajíísidgo tʼą́ą́ʼ níjíkai.
26 Áko Mózes áádóó Éran índa Ízrel dineʼé dah yinéłígíí tʼáá ałtso Péíran honoojíigi Kéídesh hoolyéedi baa níjíkaigo haneʼ baa nídadzizʼą́, áádóó Ízrel dineʼé dah yinéłígíí tʼáá ałtso éí kéyahdóó aneestʼąʼ nídajizhjaaʼígíí bichʼįʼ ííshjání ádajiilaago deinééłʼı̨́ı̨́ʼ.
27 Áádóó Mózes bił dahojoolneʼgo ádajiní, Kéyah bichʼįʼ nihííníłʼaadígíí baa niikai; tʼáá aaníí éí kéyah yáʼáhootʼéehgi abeʼ índa tsésʼná bitłʼizh bee ádaʼazįįdgo hazʼą́ą́ lá, áko díí aneestʼąʼ áádę́ę́ʼ nídashiijaaʼ.
28 Ákondi ákwii kéyahgi diné dabidziilgo kéédahatʼı̨́ índa kin hadaasʼáhígíí ayóó átʼéego binídaʼastłʼin, áádóó ałdóʼ ákwii Éínak dineʼé* ákwii kéédahatʼı̨́ı̨́ lá.
29 Ámalek dineʼé éí kéyah shádiʼááhjígo kéédahatʼı̨́; Het dineʼé, Jííbas dineʼé áádóó Ámor dineʼé éí dziłghą́ą́ʼgóó kéédahatʼı̨́ índa Kéínan dineʼé éí tónteel bibąąhgi áádóó Jórdan tooh nílíní bibąąh góyaa kéédahatʼı̨́.
30 Kéíleb éí Mózes binááł diné yidiiłheelgo ání, Tįʼ, tʼáá kʼad ákóde hidiikahgo éí kéyahígíí nihííʼ ádadiilnííł, háálá akʼeh dadidiidleełígíí bídeíníigah.
31 Nidi ákóde diné bił nidziskaígíí ádadííniid, Díí diné bichʼįʼ hidiikahígíí doo bídeíníigah da, háálá bí nihiláahgo ayóó ádabóodziil.
32 Áko kéyah hadayíísidígíí doo yáʼátʼééhgóó kéyah yaa dahalneʼgo Ízrel dineʼé ádeiłní, Kéyah hadadiilził biniyé biyiʼgóó nisiikaígíí bikááʼ diné kéédahatʼínígíí áádįįł lá, áádóó diné tʼáá ałtso ákweʼé kéédahatʼínígíí ayóó ádaníłnééz lá.
33 Éínak dineʼé yéʼiitsoh nidahalin; éí yéʼiitsoh danilı̨́įgo daʼahílchííh lá, áko nihí nahachagiigi átʼéego ádadiiltsą́, ákótʼéego binááł nahachagiigi ádaniitʼé.
Footnotes
^ Éshkol jiníigo éí Hííbrew kʼehjígo chʼil naʼatłʼoʼii bąąh dah siyíinii jiníigo óolyé.
^ Éínak dineʼé éí yéʼiitsoh danilı̨́ı̨́ nítʼééʼ.
