Numbers 14:1-45
14 Áko Ízrel dineʼé dah yinéłígíí tʼáá ałtso yéego hahodííłdláád áádóó tłʼééʼ bíighah daachago yiską́.
2 Áádóó Ízrel dineʼé tʼáá dah yinééł nítʼééʼ Mózes áádóó Éran yichʼįʼ saad dahasłı̨́įʼgo ádahodííniid, Tʼáá Ííjip kéyahdi daneeʼnáago nihá yáʼátʼéeh doo nítʼééʼ, doodaiiʼ, Díí honoojíigi daneeʼnáago nihá yáʼátʼéeh doo nítʼééʼ!
3 Haʼátʼíí lá biniyé Bóhólníihii díí kéyahjįʼ chʼínihiníʼeezh? Daʼ diltłishísh bee naaʼadanihízdiyoolghałgo nihidaʼasdzą́ą́ índa nihadaʼáłchíní yisnááh dadooleeł? Tʼóó Ííjip kéyahgóó nihéédahaakaigo nihá yáʼátʼéeh doo nítʼééʼ.
4 Ákohgo tʼáá bí ádaʼahidooʼniid, Haaʼíshąʼ nihinanitʼaʼí łaʼ nidadiiltéełgo Ííjip kéyahgóó hániʼdii nihéénihidooʼish.
5 Nítʼééʼ Mózes áádóó Éran éí Ízrel dineʼé dah yinéłígíí tʼáá ałtso binááł tséʼyaa jineeshjool.
6 Áko Nan biyeʼ Jáshowa áádóó Jiifáneh biyeʼ Kéíleb éí atah kéyah hajíísidígíí haʼééʼ ákʼi nijooldláadgo
7 Ízrel dineʼé dah yinéłígíí tʼáá ałtso bichʼįʼ hadzoodzíiʼgo ájíní, Kéyah hadadiilził biniyé biyiʼgóó hadiikaígíí kéyah tʼáá íiyisí ayóó áhonóolnin.
8 Bóhólníihii nihaa bił hózhǫ́ǫgo díí kéyah nihaididooʼáałgo yiih nihidooʼish; éí kéyah yáʼáhootʼéehgi abeʼ índa tsésʼná bitłʼizh bee ádaʼazįįdgo hazʼą́.
9 Áko tʼáadoo Bóhólníihii bichʼįʼ nidaałteehí, doodaiiʼ díí kéyah yiiʼ kéédahatʼíinii tʼáadoo bikʼee nihił daayéʼí, háálá éí nihibááh dajílı̨́; ádíchʼą́ą́h nideilyéé nítʼééʼ yę́ę bitsʼą́ąjįʼ kódzaa; nihí éí Bóhólníihii nihił hólǫ́; tʼáadoo nihiʼanaʼí bikʼee nihił daayéʼí.
10 Nidi tʼáá dah yinééł nítʼééʼ ádadííniid, Tsé bee bił nidaznołneʼ.
Ákohgo níbaal biiʼ dahozdísinii biiʼjįʼ Ízrel dineʼé tʼáá ałtso binááł Bóhólníihii yee ayóó átʼéii yitʼíní silı̨́ı̨́ʼ.
11 Áko Bóhólníihii éí Mózes ííłní, Haa nízáagishąʼ díí diné shił nidaʼíʼįįh doo? Haa nízáadishąʼ índa dashiizhdoodląął? Jó, bee éédahózinii tʼáá átʼé dahatahgi hoł ííshjání ádaashłaa.
12 Naałniih bee ádahodeeshdįįłgo, doo shidineʼé dajílı̨́į da doo, áko ni éí dahaláahgo nitsʼą́ą́dóó náás ahoolchíiłii ayóó átʼéego bidziilgo ádeeshłííł.
13 Áádóó Mózes éí Bóhólníihii ííłní, Áko haniih ákwíinilaago Ííjip dineʼé yaa dahodidootsʼı̨́ı̨́ł; (jó, nibee adziilii bee éí hatahdóó díí dineʼé chʼííníʼeezh,)
14 áko díí kéyahgi kéédahatʼínígíí yił dahodoolnih; Bóhólníihii nílíinii, díí dineʼé bitahgi honílǫ́ǫgo naa dahodiiztsʼą́ą́ʼ; Bóhólníihii nílíinii, niʼdootʼı̨́įgo nitsʼą́ą́dóó kʼosígíí bikʼi dah yildohgo índa bilą́ąjįʼ jı̨́įgo kʼos níyizgo áádóó tłʼéeʼgo kǫʼ níyizgo bee hóóleełgo naa dahodiiztsʼą́ą́ʼ.
15 Kʼad diné tʼáá łáʼí dziisxínígi átʼéego díí dineʼé tʼáá ałtso nisíníłtseedgo ałʼąą dineʼé naa dahodidootsʼı̨́įłgo ádadidooniił,
16 Bóhólníihii éí díí dineʼé kéyah biih nihideeshʼish yiłníigo, yichʼįʼ ádee hadoodzíiʼii doo yínéésʼąądgóó, éí bąą honoojíigi neistseed.
17 Ákohgo kʼad, baa nánooshkąąh, bíniʼdii shiBóhólníihii nílíinii, bee nidziilii ayóó átʼée leʼ; jó, adííníniidígíí bikʼehgo háínídzííʼ.
18 Bóhólníihii éí nízaadgóó haʼólní áádóó ayóó átʼéego aa aʼááh nízin, índa doo ákwii áhátʼíinii áádóó bee hazʼáanii hetíihii á yóóʼahizhdiʼaahii jílı̨́, nidi diné łaʼ haʼátʼeʼígíí tsʼídá doo hąąh ádin áhóleʼ átʼée da; daʼazhéʼé doo ákwii ádáátʼįįdígíí baʼáłchíní náás ahoolchíiłii táadi índa dı̨́įdi ałkʼi náʼazhchı̨́įjįʼ bikʼi hwiileehgo yá nináhwiiʼnííł.
19 Bá yóóʼanídíʼaah, baa nánooshkąąh; díí diné doo ákwii ádáátʼįįdígíí bee aa aʼááh nínízinii ayóó átʼéii bikʼehgo bá yóóʼanídíʼaah, áádóó Ííjip kéyahdóó chʼínínáádóó díí jı̨́įjįʼ ákódaatʼíinii bá yóóʼanídiyíʼaahígi átʼéego yóóʼanídíʼaah.
Diyin God éí Ízrel dineʼé atíyiilaa (Deut. 1:34-40)
20 Ákohgo Bóhólníihii ání, Nizaad kʼehgo bá yóóʼanídííʼą́,
21 nidi tʼáá aaníí hinishnánígi átʼéego nahasdzáán tʼáá átʼéé nítʼééʼ biiʼ Bóhólníihii yee ayóó átʼéii hadeezbin doo.
22 Díí dineʼé tʼáá ádzíłtso Ííjip kéyahdi áádóó honoojíigi bee ayóó áníshtʼéii índa álíleego íʼiishłaaígíí dajiiłtsą́ą nidi, díí kʼad neeznáadi shínídaneeztą́ąʼgo ádíshnínígíí doo dayíístsʼą́ą́ʼgóó naaldeeh.
23 Dabizhéʼé yę́ę kéyah baa dideeshʼáałgo bee bichʼįʼ ádee hadeesdzíʼígíí tsʼídá doo deizdoołtséeł da índa éí shá nídahojiłchįįh yę́ę doo łaʼ kéyahgi hwiizdoołtséeł da,
24 nidi shá naalʼaʼí, Kéíleb, éí tʼáá sahdii átʼéego biyiʼ honítʼiʼígíí áádóó tʼáá aaníí shikééʼ yigáłígíí bąą kéyah yiiʼgóó tádííyáhígíí bił biih deeshʼash, índa baʼáłchíní náás ahoolchíiłii daabí doo.
25 (Íídą́ą́ʼ Ámalek dineʼé áádóó Kéínan dineʼé deíldzis góyaa kéédahatʼı̨́.) Yiską́ągo Tónteel Łichííʼ bichʼįʼ bíhodíłgizgo honoojíí góneʼ aníʼdoohnééł.
26 Áádóó Bóhólníihii éí Mózes áádóó Éran yichʼįʼ haadzíiʼgo ání,
27 Haa nízáagishąʼ díí doo yáʼáshónígi ádaatʼı̨́įgo dah yinéłígíí shikʼijįʼ danilı̨́įgo saad dahółǫ́ǫ doo? Ízrel dineʼé shikʼijįʼ danilı̨́įgo saad dahółǫ́ǫgo shikʼijįʼ yádaałtiʼgo disétsʼą́ą́ʼ.
28 Kóbidohní, Tʼáá aaníí hinishnánígi átʼéego, ní Bóhólníihii, ákótʼéego yádaałtiʼgo nihidisétsʼą́ʼígi átʼéego tʼáá ádadohnínígi ánihideeshłííł.
29 Díí honoojítahgi danihitsʼíís dadínóonééł; jó, danihiʼdééltaʼígíí tʼáá ánółtso naadiindóó yówehgo nihéédááhaii shichʼįʼ saad dahonohłǫ́ǫ́ nítʼeʼígíí nanihídoodįįł.
30 Tʼáá aaníí doo łaʼ kéyah biih doohkah da. Díí kéyah biiʼ kéédahohtʼı̨́į doo, dishníigo bee ádee haasdzííʼ nítʼééʼ; tʼáá hazhóʼó Jiifáneh biyeʼ Kéíleb áádóó Nan biyeʼ Jáshowa tʼéiyá yah adooʼash.
31 Nidi nihadaʼáłchíní tʼéiyá, éí azadoohkah dabidohníí nítʼéʼígíí, éí ákóneʼ yah adeeshʼish; éí kéyah doo danoozı̨́įʼii yéédahodoosįįł.
32 Nidi nihí tʼéiyá tʼáá kǫ́ǫ́ honoojíigi nihitsʼíís dadínóonééł.
33 Áádóó nihadaʼáłchíní tʼéiyá honoojíigi naanááʼnéełgo dízdiin nídoohah áádóó doo nihadaʼahóodlíí átʼéégóó biniinaa honoojíigi danihitsʼíís dadííyahjįʼ tiʼdahwiidoohnih.
34 Kéyah hadaasíidgo dízdiin yiskánígíí bikʼehgo łaʼa jínígíí łaʼ nááhai bikʼeh níʼą́ągo dízdiin nááhaijįʼ doo ákwii ádaotʼįįdígíí biniinaa nihidahodiitʼiʼgo nídeínóhkáah doo; jó, shí nihá bee nihoníʼáanii kʼínítiʼgo nihił béédahodoozįįł.
35 Shí Bóhólníihii nishłíinii haasdzííʼ, Tʼáá aaníí, díí doo yáʼáshónígi ádaatʼínígíí tʼáá ałtso ahíikaigo shikʼijįʼ danilíinii kóhodeeshłííł; díí honoojíigi ázhdoodįįł; dazhdínóonééł.
Naalchíʼí neeználtʼéego doo yáʼádaashóonii neezná
36 Áko Mózes éí kéyah hadoolził biniyé ákǫ́ǫ́ diné ajiisʼaʼ nítʼéʼígíí áádę́ę́ʼ nákaigo doo yáʼátʼééhgóó kéyah yaa dahoolneʼígíí biniinaa tʼáá dah oonééł nítʼééʼ hachʼįʼ saad dahasłı̨́ı̨́ʼ;
37 éí diné tʼáá hó doo yáʼátʼééhgóó kéyah baa chʼídahodziizʼánígíí Bóhólníihii binááł naałniih bikʼee dazneezná.
38 Nidi díí kéyah hadayíísidígíí bitahdóó Nan biyeʼ Jáshowa índa Jiifáneh biyeʼ Kéíleb tʼéí tʼáá hiná.
Hórmahgi Ízrel dineʼé bikʼeh hodeesdlı̨́ı̨́ʼ (Deut. 1:41-46)
39 Áko Mózes éí Ízrel dineʼé tʼáá ałtso díí haʼiisdzíʼígíí bee bił hojoolneʼ, áko ayóó átʼéego chaał hahóółʼá.
40 Áádóó tʼah abínídą́ą́ʼ nídiijéeʼgo dziłghą́ą́ʼ góde haaskaigo ádaaní, Jó, kǫ́ǫ́ neiikai; Bóhólníihii nihaa hodiníʼání góde hadiikah daniidzin, háálá ádił daʼsiilziih.
41 Ákohgo Mózes ání, Kʼad haʼátʼéegoshąʼ Bóhólníihii bibikʼeh óʼooʼníiłii tsʼídá dahohtííh? Ákondi yáʼátʼéehgo doo nihá áhodooníił da.
42 Tʼááká ákǫ́ǫ́ hasohkááh lágo, háálá Bóhólníihii doo nihitah hólǫ́ǫ da, ákondi akʼeh dahonołʼı̨́įgo nihiʼanaʼí binááł doo ánihidiʼdooldįįł da.
43 Háálá Ámalek dineʼé áádóó Kéínan dineʼé nihidáahdi nidaakai áádóó diltłish yee nihił nidazdiyoołhał; jó, Bóhólníihii bitsʼą́ąjįʼ noojéʼígíí biniinaa Bóhólníihii doo nihił hólǫ́ǫ da.
44 Nidi tʼáá ákóde hadiikahí daniizı̨́įʼgo wókʼą́ąjįʼ haaskai; ákondi dah oonéłídóó Bóhólníihii bitsitsʼaaʼ dílzinii bee ahaʼdeetʼáanii biiʼ sinilii tʼáadoo dah deidiiʼą́ą da áádóó Mózes ałdóʼ tʼáadoo chʼíníyáa da.
45 Nítʼééʼ Ámalek dineʼé áádóó Kéínan dineʼé éí wókʼą́ądi kéédahatʼínígíí Ízrel dineʼé yichʼįʼ hadáájéeʼgo nideistseed, índa tʼáá níléí Hórmahjįʼ tʼą́ą́ʼ anídeineeskaad.
