Numbers 15:1-41
15 Áko Bóhólníihii éí Mózes yichʼįʼ haadzíiʼgo ání,
2 Ízrel dineʼé bichʼįʼ handziihgo ábidiní, Kéyah biiʼ kéédahohtʼı̨́į dooleełii nihaa dinishʼaahígíí biih woonáago
3 áádóó Bóhólníihii bichʼįʼ didlidgo náádahidoołnihii ádadoohłíiłgo, éí didlidgo nááhániihii, doodaiiʼ nááhániihii bee ádee hadaohdzíiʼii, doodaiiʼ nááhániihii tʼáá nihí ádeinohsingo nidadinooʼáanii, doodaiiʼ hodílzingo áłah náʼádleeh nídaołʼaahgo éí béégashii bitahdę́ę́ʼ béégashii łaʼ, doodaiiʼ dibé bitahdę́ę́ʼ dibé łaʼ nídidoohłóosgo Bóhólníihii bichʼįʼ łikání halchingo náádahołniih doo,
4 áko Bóhólníihii bichʼįʼ nááʼjiiłniihígíí éí akʼáán nááhidoonihii éí ómer bee íʼneelʼąąhí bee akʼáán tʼááłáhídi haaką́ągo éí kwáart* bee íʼneelʼąąhí áníłtsooígíí bíighahgo bee akʼah haaką́ągo bił ałtahgo néidiyoołnih.
5 Índa kwáart bee íʼneelʼąąhí bee wáin tʼááłáhídi haaką́ągo yanáadziʼgo nááhidoonihii átʼéego hashtʼeidoolííł éí didlidgo nááhániihii, doodaiiʼ nááhániihii átʼéego dibé yázhí tʼááłáʼígo bikʼeh níką́ągo hashtʼeidoolííł.
6 Doodaiiʼ deenástsʼaaʼ nááhániihgo éí ómer bee íʼneelʼąąhí bee akʼáán naakidi haaką́ągo éí kwáart bitísígo bee íʼneelʼąąhí bikʼehgo akʼah haaką́ągo bił ałtahgo hashtʼeidoolííł.
7 Áádóó kwáart bitísígo bee íʼneelʼąąhí bikʼehgo wáin haaką́ągo yanáadziʼgo nááhidoonihii Bóhólníihii bichʼįʼ łikání halchingo néidiyoołnih.
8 Áko dóola yázhí didlidgo nááhániihii, doodaiiʼ nááhidoonihii ádee háínídzííʼjí nááhániihii, doodaiiʼ hózhǫ́ǫ́jí nááhániihii hashtʼenéinilʼįįhgo Bóhólníihii bichʼįʼ nááhidííłnihgo
9 ómer bee íʼneelʼąąhí bee akʼáán táadi haaką́ągo áádóó kwáart bee íʼneelʼąąhí bee akʼah naakidi haaką́ągo bił ałtahgo éí dóola yázhí bóóltąʼgo nááhániih doo.
10 Áádóó kwáart bee íʼneelʼąąhí bee wáin naakidi haaką́ągo éí yanáadziʼgo nááhániihii átʼéego łikání halchingo Bóhólníihii bichʼįʼ didlidgo nááhidííłnih.
11 Kótʼéego dóola yázhí, doodaiiʼ deenástsʼaaʼ, doodaiiʼ dibé yázhí, doodaiiʼ tłʼízí yázhí tʼááłáʼí nítínígo ákónálʼįįh doo.
12 Tʼáá ánéeltʼeʼgo hashtʼenídaałʼįįhígíí bikʼehgo tʼáá ałtso ádanéeltʼeʼígíí bikʼehgo ákónídaałʼįįh doo.
13 Tʼáá ałtso kéyahgi nidahaazhchínígíí bikʼehgo hoogáałii yikʼehgo ádaʼałʼı̨́įgo łikání halchingo Bóhólníihii bichʼįʼ didlidgo náádaʼiiłniih doo.
14 Áádóó déʼéyóní łaʼ nihitahgi kééhatʼı̨́įgo, doodaiiʼ náás daʼahíínółchíihii nihitahgi łahdę́ę́ʼ nilíinii éí didlidgo nááʼiiniih ádeeshłííł nízingo łikání halchingo Bóhólníihii bichʼįʼ náádaʼayołniihígi átʼéego bí ałdóʼ ákódaatʼı̨́į doo.
15 Nihí dah wohnéłígíí áádóó déʼéyóní nihitahgi kéédahatʼínígíí ałdóʼ bikʼeh hoogáałii tʼááłáʼí nihá átʼé; náás daʼahíínółchíihii hoolʼáágóó bikʼeh hoogáałii nihá átʼé; tʼáá nihí ádanohtʼéhígi átʼéego déʼéyóní Bóhólníihii binááł tʼáá ákódaatʼée dooleeł.
16 Bee hazʼáanii tʼááłáʼígíí índa bikʼehgo hoogáałii tʼááłáʼígíí éí nihí áádóó déʼéyóní tʼóó átsééd kéédahatʼínígíí bił nihá átʼée doo.
17 Áko Bóhólníihii éí Mózes yichʼįʼ haadzíiʼgo ání,
18 Ízrel dineʼé bichʼįʼ handziihgo ábidiní, Kéyah biih nihideeshʼishígíí biih woonáago
19 éí kéyahdóó chʼiyáán daohsą́ągo bił dah nídiʼdiilnihgo nááhániihii Bóhólníihii bichʼįʼ náádahołniih doo;
20 áłtsé akʼáán taosniiʼígíí bááh ályaago bił dah nídiʼdiilnihgo náádahołniih doo; tʼáá haʼínáʼálʼisídóó bił dah nídiʼdiilnihgo nááhániihígi átʼéego éí bił dah nídadidoołnih doo.
21 Náás daʼahíínółchííhgóó áłtsé akʼáán taosniiʼígíí Bóhólníihii bichʼįʼ bił dah nídiʼdiilnihgo náádahołniih doo.
22 Daʼsoohsiihgo áádóó díí bikʼeh óʼooʼníiłii tʼáá átʼé doo bidaʼoołaagóogo Bóhólníihii éí Mózes áyidííniidígi ádaahdzaa lá;
23 tʼáá éí Bóhólníihii ánihidííniidii tʼáá ałtso Mózes binahjįʼ ákóní; éí Mózes tʼáá hó tʼéí Bóhólníihii áhodííniid bijı̨́ı̨́dóó wóshdę́ę́ʼ nihaʼáłchíní náás ahoolchíiłii bitahgóó
24 éí tʼáadoo baa ákohwiindziní ádił oodzíiʼgo áádóó dah oonéłígíí doo bił béédahózingóogo dah oonéłígíí tʼáá ałtso éí dóola yázhí tʼááłáʼígo didlidgo nááhániihii átʼéego Bóhólníihii bichʼįʼ łikání halchingo náádayiiłniih doo; éí bikʼeh hoogáałii bikʼehgo akʼáán áádóó yanáadziʼgo nááhániihii yił náádayiiłniih doo, áádóó tłʼízíchǫǫh tʼááłáʼígo ádił niʼiidzííhjí nááhániihii átʼéego náádayiiłniih doo.
25 Áádóó nááʼiiłniihii éí á bee kʼééhodǫǫłii Ízrel dineʼé tʼáá dah yinééł nítʼééʼ yá nááyiiłniih doo, áko ádił nidaʼiisíʼígíí bá yóóʼadidootʼááł, háálá tʼáadoo yaa ákodaníziní ádił nidaʼiisííʼ, áádóó nááhániihii nidayiiʼéeshgo Bóhólníihii bichʼįʼ didlidgo nááhániihii átʼéego náádayiiłniih doo índa ádił niʼiidzííhjí nááhániihii átʼéego Bóhólníihii binááł náádayiiłniih doo; jó, tʼáadoo yaa ákodaníziní ádił daʼasiih.
26 Ízrel dineʼé tʼáá dah yinééł nítʼééʼ índa déʼéyóní hatahgi tʼóó átsééd kéédahatʼínígíí ádił nidaʼiisíʼígíí bá yóóʼanídidootʼááł, háálá tʼáadoo yaa ákodaníziní ádił nidaʼiisííʼ.
27 Diné tʼáá háiida tʼáadoo yaa ákoníziní ádił asiihgo éí tłʼízítsaʼii łaʼ binááhaaí ádił niʼiidzííhjí nááhániihii átʼéego néidiyoołnih.
28 Áko nááʼiiłniihii éí á bee kʼééhodoodǫǫłii doo tʼáá ákójínééhgóó ádił adzisiihii há néidiyoołnihgo doo tʼáá ákójínééhgóó ádił adzisiihígíí Bóhólníihii binááł há bee kʼééhoodǫǫłii há nááhidoonihgo ádił adzisiihígíí há yóóʼanídidootʼááł.
29 Áádóó bee hazʼáanii tʼááłáʼígíí éí doo tʼáá ákójínééhgóó ádił adzisiihii há nihee hólǫ́; éí Ízrel dineʼé bitahdóó yizhchíinii, doodaiiʼ bitahgi déʼéyóní tʼóó átsééd kéédahatʼínígíí nidi bá átʼé.
30 Nidi diné łaʼ tʼáá bizááká ádił niʼiilzíihgo éí kéyahgi hoʼdizhchı̨́įgo, doodaiiʼ déʼéyóní jílı̨́į dago, Bóhólníihii doo jidísingóó bikʼijįʼ hadziidziihii éí Ízrel dineʼé bitsʼą́ąjįʼ hodiʼyoolyééł.
31 Bóhólníihii bizaad jííʼįįdígíí áádóó bikʼeh óʼooʼníiłii kʼízhnítiʼígíí biniinaa tsʼídá hodiʼyoolyéłí; jó, ádił ajisiihígíí tʼáá hó bá ninázhdootłish.
Hááʼáyı̨́ı̨́h jı̨́ doo yidísinii bił nidzilniih
32 Ízrel dineʼé éí honoojíidi joonéełgo hááʼáyı̨́ı̨́h jı̨́ı̨́ góneʼ diné léiʼ chizh náyiiláahgo bikʼídadziskai.
33 Áko chizh náyiiláahgo bikʼídadziskaígíí éí Mózes áádóó Éran índa oonéłígíí tʼáá ałtso bichʼįʼ bił nijíkai.
34 Áádóó dayiiłtsood, háálá bee baa hwiidínóotʼįįłii tʼah doo bee hoł dahaneʼ da.
35 Áko Bóhólníihii éí Mózes ííłní, Díí diné tsʼídá bidiʼyoolyéłí; dah oonéłígíí tʼáá ałtso níbaal haalʼá bitsʼáhwiiníʼą́ądi tsé yee hoł nidazdoołniił.
36 Áádóó tʼáá dah oonééł nítʼééʼ éí níbaal haalʼá bitsʼáhwiiníʼą́ą́góó éí diné yił adaaskaigo tsé yee yił nidadzisneʼgo daaztsą́; Bóhólníihii éí Mózes áyidííniidígíí yidaʼiilaa.
Ééʼ bibąąhgi bijádaanilígíí
37 Áko Bóhólníihii éí Mózes yichʼįʼ haadzíiʼgo ání,
38 Ízrel dineʼé bichʼįʼ handziihgo ábidiní, Náás daʼahíínółchííhgóó danihiʼééʼ bibąąhdi bijánil áńdaałʼįįh doo, áádóó bijánil bikáaʼgi tłʼóół yá nahalingo dootłʼizh danítʼiʼgo áńdaałʼįįh doo,
39 áádóó nihichʼįʼ díigi átʼéhígíí hazhóʼó danółʼı̨́, áko díí béédaałniih dooígíí éí Bóhólníihii bibikʼeh óʼooʼníiłii tʼáá átʼé bidaʼíínóhsin doo, áko danihijéí bikʼehgo índa daahʼínígíí bikʼehgo doo ádaahníił da doo; jó, éí ajiłda bee tʼóó ádee nidaahnéé nítʼééʼ; shoo, díí béédaałniih.
40 Shibikʼeh óʼooʼníiłii tʼáá átʼé bidaʼíínóhsin, áádóó nihiDiyin God bichʼįʼgo dadinohyin doo.
41 Shí Bóhólníihii nihiDiyin God nishłı̨́; éí shí Ííjip kéyahdę́ę́ʼ chʼéénihiníʼeezhgo nihiDiyin God nishłı̨́; jó, shí Bóhólníihii nihiDiyin God nishłı̨́.
Footnotes
^ Kwáart bee íʼneelʼąąhígíí éí bąąh haʼíízhahí dı̨́įdi bee ookáałgo bíighah.
