Numbers 16:1-50
16 Nítʼééʼ Líívai biyeʼ Kóhath, éí biyeʼ Ízxar, éí biyeʼ Kórah wolyéego Déíthan áádóó Abáíram índa Án ahíjiiʼeezh. (Déíthan áádóó Abáíram éí Iiláíyab biyeʼké nilı̨́ áádóó Án éí Pííleth biyeʼ nilı̨́; éí tʼáá ałtso Rúben dineʼé danilı̨́.)
2 Éí Mózes bidááhdóó Ízrel dineʼé yił nídahidiikaigo naakidi neeznádiindóó baʼaan ashdladiingo naatʼáanii ánéelą́ą́ʼ; dah deínéehii béédahoʼdílzinii yił ałtah ahiisdlááʼ.
3 Áko áłah ádaʼdiilyaago Mózes áádóó Éran yikʼijįʼ danilı̨́įgo ádeiłní, Nihí tʼáá íiyisí ádíhwíínółnííh, háálá oonéłígíí tʼáá ałtso dadiyin áádóó bitahgi Bóhólníihii hólǫ́, ákoshąʼ haʼátʼíí biniyé Bóhólníihii bidineʼé dah yinéłígíí bilááh ánóhtʼéego íʼdoołyaa?
4 Áko Mózes éí yidiiztsʼą́ąʼgo niʼjįʼ tséʼyaa neeshjool,
5 áádóó Kórah índa yił dah yikahígíí ábijiní, Yiską́ągo tʼah abínídą́ą́ʼ Bóhólníihii háí bííʼ jílı̨́įgo áádóó jidiyingo ííshjání áhodoolííł, índa ádíighahjįʼ nihodoolóós; éí néidiiłtíinii ádíighahjįʼ niidoolóós.
6 Kótʼéego ádaʼdoohłííł; Kórah áádóó nił dah yikahígíí tʼáá ałtso éí tsin bijeeh dilidgo łikání halchinii bee naakáhí nídahididoohnił;
7 éí kǫʼ biih dahidoohkááł áádóó yiską́ągo Bóhólníihii binááł tsin bijeeh dilidgo łikání halchinii bikʼi yadeidoohjih, áko Bóhólníihii náhodiiłtíinii bidiyı̨́ı̨́ʼ jílı̨́į doo; Líívai dineʼé nohłíinii, ayóogo ádídahwíínółnííh.
8 Áko Mózes éí Kórah ííłní, Daʼíísółtsʼą́ą́ʼ, baa nánihooshkąąh, Líívai dineʼé nohłíinii, daʼíísółtsʼą́ą́ʼ.
9 Díísh doo ílı̨́įgo baa nitsídaahkees da? Ízrel dineʼé biDiyin God éí Ízrel dineʼé dah yinéełgo yitsʼánihinínilii tʼáá bí áháníjįʼ ádíchʼįʼ ninihiiʼéshígíí Bóhólníihii biníbaal biiʼ hodílzin góneʼ nidaałnish doo índa dah oonéłígíí binááł nidaałʼaʼ doo biniyé nánihidiinil.
10 Jó, nihí índa danihikʼis Líívai dineʼé danilíinii tʼáá ałtso tʼáá nihił áháníjįʼ ádíchʼįʼ kónihiilaa. Daʼ ákoósh nihí nááʼiiłniihii ałdóʼ dadoohłeełgo hádaahtʼı̨́?
11 Áko ni áádóó nił dah yikahígíí tʼáá ałtso bił Bóhólníihii bikʼijįʼ danohłı̨́įgo áłah íʼdoołyaa. Áádóó Éranshąʼ éí haʼátʼíí nilı̨́įgo bichʼįʼ saad dahonohłǫ́?
12 Áko Mózes éí Iiláíyab biyeʼké Déíthan áádóó Abáíram hágo yididooniił biniyé yíká iʼííłʼaʼ; nítʼééʼ ábiʼdooʼniid, Doo akǫ́ǫ́ diitʼash da.
13 Díísh tʼįįhdígo átʼé nínízin? Kéyah yáʼáhootʼéehgi abeʼ índa tsésʼná bitłʼizh bee ádaʼazįįdgo hazʼą́ą́dę́ę́ʼ chʼínihííníʼeezhgo honoojíidi nanihidííłtsiłgo ánítʼı̨́. Tʼáá hazhóʼó tʼáá ni tʼéí nihinanítʼáago ádiʼnilyaa.
14 Áádóó ałdóʼ kéyah yáʼáhootʼéehgi abeʼ índa tsésʼná bitłʼizh bee ádaʼazįįdgo hazʼą́ąjįʼ tʼah doo anihíʼéesh da, doodaiiʼ dáʼákʼeh índa chʼil naʼatłʼoʼii nihííʼ dadooleełígíí tʼah doo nihaa diníʼaah da. Daʼ díísh diné binááʼ hahidíínił? Nihí doo akǫ́ǫ́ diitʼash da.
15 Áko Mózes tʼáá íiyisí báhóóchįįdgo Bóhólníihii ííłní, Bináádahaniihii tʼáadoo nił nilíní; dabitélii tʼááłáʼí nidi doo bighanishtı̨́į da, doo nidi łaʼda atíhooshłaa da.
16 Áádóó Mózes éí Kórah ííłní, Ni áádóó nił dah yikahígíí tʼáá ałtso Éran bił yiską́ągo Bóhólníihii bidááhdóó nidoohkah;
17 bíniʼdii diné łáʼí nízínígo tsin bijeeh dilidgo łikání halchinii bee naakáhí nídeididooniłgo tsin bijeeh dilidgo łikání halchinii yiih deidoojih; Bóhólníihii binááł łáʼí nootínígo tsin bijeeh bee naakáhí nidahidoohjih; naakidi neeznádiindóó baʼaan ashdladiingo bee nidaʼohkáa doo; ni áádóó Éran ałdóʼ nidinołtʼéego tʼáá ałʼąą tsin bijeeh dilidgo łikání halchinii bee naakáhí doohjih.
18 Áko diné łáʼí nízínígo tsin bijeeh dilidgo łikání halchinii bee nidaakáhígíí nídeidiinilgo kǫʼ yiih deizką́ągo bikáaʼjįʼ tsin bijeeh dilidgo łikání halchinii yadayiijaaʼ, áádóó níbaal biiʼ dahozdísinii yah eʼetiinídóó Mózes áádóó Éran yił deizįʼ.
19 Nítʼééʼ Kórah éí tʼáá dah oonééł nítʼééʼ áłah áyiilaago níbaal biiʼ dahozdísinii yah eʼetiiní bidááhdóó Kórah éí Mózes áádóó Éran yikʼijįʼ danilı̨́įgo nidaazįʼ; Bóhólníihii bitsʼádiʼnílíidii éí dah oonéłígíí tʼáá ałtso bichʼįʼ yitʼíní silı̨́ı̨́ʼ.
20 Áádóó Bóhólníihii éí Mózes áádóó Éran ííłní,
21 Díí dah oonéłígíí bitsʼánóhʼaash, áko tʼóó hodíínááʼígo áhodeeshdįįł.
22 Áko tséʼyaa jineeshjoolgo ájíní, Diyin God nílíinii, atsʼíís dabiníłchʼi tʼáá ałtso biDiyin God nílíinii, diné tʼááłáʼí ádił asiih; ákoósh dah oonéłígíí tʼáá ałtso bichʼįʼ náhóóchįįd?
23 Áádóó Bóhólníihii éí Mózes yichʼįʼ haadzíiʼgo ííłní,
24 Dah oonéłígíí ábidiní, Kórah, Déíthan índa Abáíram dabiníbaal naaznilídóó nahgóó oohjeeh.
25 Nítʼééʼ Mózes nídiiʼnaʼgo Déíthan áádóó Abáíram yichʼįʼ níyá áádóó Ízrel dineʼé badahastóí hakééʼ yíkai.
26 Ákohgo dah oonéłígíí áyidííniid, Baa nídanihooshkąąh, díí diné doo yáʼádaashóonii dabiníbaalídóó nahgóó oohjeeh, índa daabíhígíí tʼááká łaʼ daosił lágo, doodaiiʼ éí ádił daʼasiihígíí tʼáá átʼé tʼáá bił ádoohdįįł.
27 Áko Kórah, Déíthan índa Abáíram dabiníbaalídóó tʼáá daʼníłtsʼą́ąjigo bitsʼájiizhjééʼ, áko Déíthan áádóó Abáíram chʼíníʼáazhgo biníbaal bichʼéédą́ą́ʼdóó bizáanii, dabiyeʼké índa baʼáłchíní yił deizįʼ.
28 Áádóó Mózes ání, Díí bee nihił béédahózin doo; naanish tʼáá átʼé ááshłíił doo biniyé Bóhólníihii shiníłʼaʼ áádóó doo tʼáá shí shíniikʼeh ááshníił da.
29 Díí diné jidínóonéłígíí diné tʼáá ałtso daninéhígi átʼéego, doodaiiʼ atíbidiʼdoolníłígíí diné tʼáá ałtso atídabidiʼdoolníłígi átʼéego ákóhodooníiłgo éí doo Bóhólníihii shiníłʼaʼ da.
30 Nidi Bóhólníihii tʼáadoo leʼé ániidí ííléehgo niʼ ąą ádzaago abiisnaʼgo, dabinaalyeʼé tʼáá átʼé tʼáá bił áádóó tʼáá dahináago niʼ ąą ádzaa góyaa daazlı̨́įʼgo índa díí diné éí Bóhólníihii bá dahojííłchįįdígíí bikʼidadiʼdoohtı̨́ı̨́ł.
31 Ałtso saad bee niyázhníłtiʼgo tʼáá naazínígóó biyaagi niʼ ałtsʼáádláád,
32 áádóó niʼ ąą ádzaago haʼáłchíní tʼáá bił, Kórah yidiikaii yę́ę tʼáá ałtso índa hwee dahólónígíí tʼáá átʼé ałdóʼ tʼáá bił niʼ abiisnaʼ.
33 Hó áádóó tʼáá átʼé bídazhdéétʼiʼígíí tʼáá dajiináago niʼ ąą ádzaa góyaa azhníídeeʼgo hakʼijįʼ niʼ ałchʼįʼ ánádzaa, áko dah oonéłígíí bitsʼą́ą́ʼ ałtso diné neezná.
34 Áko binaagóó Ízrel dineʼé tʼáá ałtso haalʼáhígíí éí hadazhdeeshghaazhgo hakʼee dah diijéeʼgo ádaaní, Nihí éí niʼ doo adanihidoołnah da.
35 Áádóó Bóhólníihii bitsʼą́ą́dę́ę́ʼ kǫʼ bidadíínáadgo naakidi neeznádiindóó baʼaan ashdladiin diné, tsin bijeeh dilidgo łikání halchinii náádayiisniiʼígíí íísdįįd.
36 Ákohgo Bóhólníihii éí Mózes yichʼįʼ haadzíiʼgo ání,
37 Nááʼiiłniihii Éran biyeʼ Eliyéízar bichʼįʼ handziih, Tsin bijeeh dilidgo łikání halchinii bee nidaakáhígíí néididooniłgo kǫʼ daʼníłtsʼą́ąʼjįʼ níléígóó iidiyoołkał, háálá tsin bijeeh dilidgo łikání halchinii bee nidaakáhígíí dílzin.
38 Díí diné ádił daʼasiihgo tʼáá bí yá nináninídeeʼ; bíniʼdii tsin bijeeh dilidgo łikání halchinii bee nidaakáhígíí éí dootsiłgo niteelgo ádadoolníiłgo didlidgo bikááʼ nááʼiiniihí bikʼínáltihígíí ádoolnííł, háálá Bóhólníihii binááł bee náádaʼiiniihgo chodaoʼı̨́ı̨́ nítʼééʼ; éí bąą dadílzin; éí Ízrel dineʼé bichʼįʼgo bee ééhózinii átʼée doo.
39 Nááʼiiłniihii Eliyéízar éí díí diné daneeznánígíí béésh łitsoii bee tsin bijeeh dilidgo łikání halchinii nideikáago yee náádayiiłniih nítʼéʼígíí néidiinil, áádóó éí ałʼąą yídaʼdeesʼneʼgo bikááʼ nááʼiiniihí yikʼi ninádeiʼniłgo ádayiilaa.
40 Díí Ízrel dineʼé bichʼįʼ bee ééhániihii átʼée doo, áko diné łaʼ doo Éran biyeʼké náás ahoolchíiłii jílı̨́ı̨́góó Bóhólníihii binááł tsin bijeeh dilidgo łikání halchinii nááhizhdoołnih biniyé doo áháníjįʼ nizhdoogáał da; éí doo Kórah áádóó bił dah yikah yę́ę ádabiʼdiilyaaígi doo áhodiʼdoolníił da. Díí éí Mózes binahjįʼ Bóhólníihii hachʼįʼ haadzííʼ.
41 Nidi biiskání Ízrel dineʼé dah yinéłígíí tʼáá ałtso Mózes áádóó Éran yichʼįʼ saad dahasłı̨́įʼgo ádaaní, Bóhólníihii bidineʼé nisoołtseed.
42 Ákohgo dah oonéłígíí ahíikaigo Mózes áádóó Éran yikʼijįʼ daazlı̨́įʼgo níbaal biiʼ dahozdísinii deiníłʼı̨́ı̨́ nítʼééʼ; jó, kʼos bikʼiildoh lá, áko Bóhólníihii bitsʼádiʼnílíidii yitʼíní silı̨́ı̨́ʼ.
43 Áko Mózes áádóó Éran éí níbaal biiʼ dahozdísinii bidááhdę́ęʼgo niníʼáázh.
44 Áko Bóhólníihii éí Mózes yichʼįʼ haadzíiʼgo ání,
45 Díí dah oonéłígíí bitahdę́ę́ʼ bitsʼánóhʼaash, áko tʼóó hodíínááʼígo áhodeeshdįįł. Áko Mózes áádóó Éran tséʼyaa jineeshjool.
46 Ákohgo Mózes éí Éran ííłní, Tsin bijeeh dilidgo likání halchinii bee naakáhí łaʼ nídiiʼaahgo bikááʼ nááʼiiniihí bikááʼdę́ę́ʼ kǫʼ łaʼ biih nijáahgo bikáaʼgi tsin bijeeh dilidgo łikání halchinii yaajáahgo oonéłígíí bichʼįʼ tsxı̨́įłgo bił dílyeedgo bee á kʼééhoodǫǫłii bá ánílééh, háálá Bóhólníihii bitsʼą́ą́dę́ę́ʼ atíʼélʼı̨́ naałniih hááłniiʼ.
47 Áko Éran éí Mózes áhodííniidígi ádziidzaa; tsin bijeeh dilidgo łikání halchinii diltłiʼgo nízhdiiką́ągo dah oonéłígíí bitah góneʼ bił nízhdiilwod; jó, diné bitahgi naałniih hááłniiʼ lá, áko tsin bijeeh dilidgo łikání halchinii jidiiłtłah áádóó bee á kʼééhoodǫǫłii diné bá náádziisniiʼ.
48 Ákohgo daneeznánígíí áádóó dahinánígíí bitaʼgi dzizı̨́, áko naałniih ánáhodiilzeeʼ.
49 Áko naałniih dahóóghą́ʼígíí éí dı̨́ı̨́ʼtsʼáadahdi mííldóó baʼaan tsostsʼidi neeznádiin ázhnéelą́ą́ʼ; Kórah bił ałchʼodadzisneʼgo ádzísdįįdígíí bilááh ázhnéelą́ą́ʼ.
50 Áádóó Éran éí níbaal biiʼ dahozdísinii bichʼéédą́ąʼgi Mózes baa nídzídzá, áko naałniih ánásdįįd.
