Numbers 17:1-13
17 Áko Bóhólníihii éí Mózes yichʼįʼ haadzíiʼgo ííłní,
2 Ízrel dineʼé bichʼįʼ handziihgo dabizhéʼé yę́ę náás ahoolchíłígíí gish bikʼeh nítą́ągo nídidíínił; bá aląąjįʼ naazíinii tʼáá ałtso dabizhéʼé yę́ę náás ahoolchíiłii bikʼehgo gish naakitsʼáadahgo nídidííniłgo dineʼé łáʼí jinízínígo dahagish bikáaʼgi házhiʼ ádadííliił.
3 Áádóó Líívai dineʼé bigish bikáaʼgi éí Éran bízhiʼ ádíílííł; Ízrel dineʼé dahazhéʼé yę́ę náás ahoolchíiłii bá aląąjįʼ nidzizíinii gish tʼááłáʼí hakʼeh nítą́ą doo.
4 Éí níbaal biiʼ dahozdísingi tsitsʼaaʼ dílzinii neeznáago bikʼeh óʼooʼníiłii bee bééhániihii biiʼ sinilii bidááhdóó nihił ahínéishkahígi nidadoohnił.
5 Ákohgo diné bigish nídideeshtı̨́łígíí éí chʼilátah hózhóón bąąh hodooleeł, áádóó Ízrel dineʼé nichʼįʼ saad dahółónígíí dabidideeshxił.
6 Áko Mózes éí Ízrel dineʼé yichʼįʼ haadzííʼ, áádóó aląąjįʼ nidzizíinii tʼáá ádzíłtso dahagish Mózes baa dadziiznil; dahazhéʼé yę́ę náás ahoolchíiłii bikʼehgo aląąjįʼ nidzizíinii gish tʼááłáʼí hakʼeh nítą́, áko gish naakitsʼáadahgo Éran bigish éí dahagish bitah sitą́.
7 Áádóó Mózes éí níbaal biiʼ hodílzinii biiʼ neeznáago bikʼeh óʼooʼníiłii bee bééhániihii siʼánígi Bóhólníihii bidááhdóó gish niinínil.
8 Áko biiskání Mózes éí níbaal biiʼ hodílzinii biiʼ neeznáago bikʼeh óʼooʼníiłii bee bééhániihii siʼání góneʼ yah ajííyáá nítʼééʼ; jó, Éran bigish éí Líívai dineʼé bá sitánígíí bąąh hadaʼneesą́ągo bílátah daʼiigaigo bąąh bineestʼąʼ álman wolyéhígíí dadínéesą́ą́ lá.
9 Ákohgo Mózes éí Bóhólníihii bitsʼą́ą́dóó gish tʼáá átʼé Ízrel dineʼé yichʼįʼ chʼíiníjaaʼ, áko deinééłʼı̨́įʼgo diné łáʼí nízínígo dabigish nídeidiyiitą́.
10 Áádóó Bóhólníihii éí Mózes ííłní, Éran bigish éí tsitsʼaaʼ dílzinii neeznáago bikʼeh óʼooʼníiłii bee bééhániihii biiʼ sinilii bidááhdóó ninánítı̨́ı̨́h; éí bá bee ééhózinii átʼéego hashtʼeʼsitą́ą doo, áádóó shichʼįʼ saad dahółónígíí dabididííłhił, áko doo dadínóonéeł da.
11 Áádóó Mózes ákódziidzaa; Bóhólníihii hachʼįʼ yee haadzíʼígíí bikʼehgo ádziidzaa.
12 Ízrel dineʼé éí Mózes yichʼįʼ hadaasdzíiʼgo ádeiłní, Jó, daniiʼné, ánihiʼniidįįd; tʼáá áníiltso ánihiʼniidįįd.
13 Tʼáá ałtso Bóhólníihii biníbaal biiʼ hodílzinii bitʼáahjįʼ nehekáhígíí daniné. Tʼáásh áníiltso dadíníiʼnééł lá?
