Numbers 18:1-32
18 Áko Bóhólníihii éí Éran áyidííniid, Níbaal biiʼ hodílzingi nahadláhígíí bikʼijįʼ doo ákwii ádaałʼı̨́ı̨́góó éí ni áádóó niyeʼké áádóó nizhéʼé yę́ę bitsʼą́ą́dóó náás ahoolchíiłii bił bá nináhinohdéeh doo, áádóó ni áádóó niyeʼké biłgo éí nááʼiiłniihii danohłı̨́įgo doo ákwii ádaahtʼı̨́ı̨́góó bá nináhinohdéeh doo.
2 Áádóó nikʼisóó Líívai dineʼé danilíinii éí nizhéʼé yę́ę bidineʼé bitsʼą́ą́dóó danilı̨́įgo bił nídííkah, áko éí nihíká anájahgo ni áádóó niyeʼké biłgo níbaal biiʼ hodílzinii biiʼ neeznáago bikʼeh óʼooʼníiłii bee bééhániihii siʼání góneʼ nihá nidaalʼaʼ doo.
3 Áko bee nihídahólníihii éí yaa ádahalyą́ą doo, índa níbaal biiʼ hodílzinii tʼáá átʼé yaa ádahalyą́ą doo, nidi łeetsʼaaʼ chodaoʼíinii dadílzinígíí áádóó bikááʼ nááʼiiniihí éí doo yitʼáahjįʼ nidaakai da doo, ákótʼéego éí bí índa nihí ałdóʼ doo bił dadínóohnéeł da.
4 Ákohgo nihíká anídaajahgo níbaal biiʼ dahozdísinii yaa ádahalyą́ą doo; níbaal biiʼ hodílzinii binaʼanishgi tʼáá átʼé yindaalʼaʼ doo; doo Líívai dineʼé nilíinii doo łaʼ nihitʼáahjįʼ nidaakai da doo.
5 Áádóó nihí éí hodiyingo hazʼánígi áádóó bikááʼ nááʼiiniihí baa ádahołyą́ą doo, ákohgo Ízrel dineʼé tʼóó báhádzidgo bee atíʼélʼíinii doo bikʼi nááhwiidoodleeł da.
6 Shoo, shí éí Ízrel dineʼé bitahdę́ę́ʼ nihikʼisóó Líívai dineʼé nídiinil; Bóhólníihii bá aa yílyáii átʼéego nihaa diníʼą́, áko níbaal biiʼ dahozdísinii yindaalʼaʼ doo.
7 Éí bąą ni áádóó niyeʼké bił nááʼiiłniihii danohłı̨́ı̨́jí nihindaanishígíí bikááʼ nááʼiiniihí binaagi tʼáá átʼé báhígíí índa dáádiníbaal bineʼjíígíí baa ádahołyą́ą doo; díí nihindaanish átʼée doo; nááʼiiłniihii dadoohłeeł biniyé naanish nihaa diníʼą́, áko doo nááʼiiłniihii nilíinii éí áajįʼ niníyáhígíí hodiʼyoolyééł.
8 Áádóó Bóhólníihii éí Éran ííłní, Jó, Ízrel dineʼé diyingo shaa nídeidiyiiʼaahígíí bitsʼą́ą́dóó bił dah nídiʼdiilnihgo náádahaniihii tʼáá átʼé ałdóʼ nííʼ átʼé; éí niʼdoolzı̨́ʼígíí bąą naa diníʼą́, áádóó hoolʼáágóó bikʼeh hoogáałii átʼéego niyeʼké bił nihaa diníʼą́.
9 Áko aláahgo diyingo náádahizhdoołnihii doo doodlidígíí éí łaʼ niʼą́ą́hálzįįh: akʼáán náádahizhdoołnihii, ádił oodzííʼjí náádahizhdoołnihii áádóó doo ákǫ́ǫ́ ájíítʼįįdjí náádahizhdoołnihii éí tʼáá átʼé shichʼįʼ náádahizhdoołnihgo éí ni índa niyeʼké bił aláahgo nihá dílzin doo.
10 Áádóó éí aláahgo hodiyingo hazʼą́ągi nídaahdı̨́įh doo; diné nohłíinii tʼáá ánółtso díí nídaahdı̨́įh doo; éí nihá dílzingo átʼée doo.
11 Díí éí nííʼ dooleeł: Ízrel dineʼé aa deidiyiiʼaahii, tʼáá éí bił dah nídiʼdiilnihgo nááhániihii, niyeʼké índa nitsiʼké bił nihaa diníʼą́; éí ahóyéelʼáágóó bee nihoníʼáanii átʼé; nighandóó tʼáá ałtso ádąąh dah haldeehígíí tʼéí deiyą́ą doo.
12 Áádóó akʼah áádóó wáin índa tłʼoh naadą́ą́ʼ tʼáá átʼé agháago yáʼátʼéehii éí áłtsé daneestʼáanii átʼéego Bóhólníihii yaa nídeidiyiiʼaahígíí nihaa diníʼą́.
13 Kéyah bikáaʼgi tʼáá haʼátʼíhída átsé nídantʼı̨́hígíí Bóhólníihii yaa nídeidiyiiʼaah dooígíí éí naa diníʼą́; nighandóó tʼáá ałtso ádąąh dah haldéhígíí tʼéí deiyą́ą doo.
14 Ízrel dineʼé bitahgi dílzingo nidahideestʼáanii tʼáá ałtso nííʼ dooleeł.
15 Áádóó alą́ąjįʼ nidahachíhígíí tʼáá ałtso éí diné, doodaiiʼ naaldlooshii éí Bóhólníihii baa náhiditʼaahígíí ni doo, nidi diné alą́ąjįʼ nidahachíhígíí tʼą́ą́ʼ nááhidííłnih; naaldlooshii doo daadáanii áłtsé nidahachíhígíí tʼą́ą́ʼ nááhidííłnih.
16 Índa tʼą́ą́ʼ náádahidoonihii éí tʼááłáʼí bee nídeezidígíí tʼą́ą́ʼ nááhidííłnih; bą́ą́h aníłínígíí bikʼehgo béésh łigaii ashdlaʼ shékel wolyéii hodiyingo hazʼą́ą́ góneʼ chooʼíinii bikʼehgo tʼą́ą́ʼ nááhidííłnih; shékel wolyéii naadiin gíírah bą́ą́h ílı̨́ bíighah.
17 Nidi béégashii, doodaiiʼ dibé, doodaiiʼ tłʼízí áłtsé nidahachíhígíí éí doo tʼą́ą́ʼ nááhidííłnih da, háálá éí dadílzin; éí dabidiłígíí bikááʼ nááʼiiniihí bikʼídííłtah, índa dabikʼah didííłił; éí Bóhólníihii bichʼįʼ łikání halchinii didlidgo nááhániihii átʼée dooleeł.
18 Áko dabitsįʼígíí éí nihííʼ nidahaleeh doo; ajéítsʼiin náásee bił nídiʼdilnihígíí áádóó ajáád nishʼnáájíígíí nihííʼ neheleehígi átʼéego nihííʼ doo.
19 Bił dah nídiʼdiilnihgo náádahaniihii dílzinígíí tʼáá átʼé éí Ízrel dineʼé Bóhólníihii yaa deidiyiiʼaahígíí niyeʼké índa nitsiʼké bił nihaa diníʼą́; éí ahóyéelʼáágóó bee nihoníʼáanii átʼé; áshįįh* bee ahaʼdeetʼáanii ahóyéelʼáágóó Bóhólníihii binááł ni áádóó naʼáłchíní náás ahoolchíiłii nihichʼįʼ bee nihodiníʼą́.
20 Áko Bóhólníihii éí Éran ííłní, Dabikéyah doo łaʼ nihííʼ da doo, doodaiiʼ bitahdóóígíí doo łaʼ nihííʼ da doo, Ízrel dineʼé bitahgi shí nihííʼ nishłı̨́.
21 Áádóó Ízrel dineʼé ninádeidiyiiʼaahii tʼáá átʼé neeznáá daníjaaʼígíí éí tʼááłáʼígo shijaaʼ Líívai dineʼé daabííʼ dooleełgo baa diníʼą́; jó, éí yikiin níbaal biiʼ dahozdísinii yindaalʼaʼgo nidaalnish.
22 Áádóó Ízrel dineʼé níbaal biiʼ dahozdísinii yíighahjįʼ tsʼídá doo nidaakai da doo, ákódaadzaago ádił daʼdoolzihgo dadínóonééł.
23 Nidi Líívai dineʼé tʼéiyá níbaal biiʼ dahozdísinii yindaalʼaʼ doo, áádóó doo ákwii ádahatʼíinii yá nandeeh doo; díí nihá bee nihoníʼą́ągo ahóyéelʼáago náás daʼahíínółchíih doo, áko Ízrel dineʼé bitahdóó bííʼ ninádahadleeh dooleełii ádin doo.
24 Nidi Ízrel dineʼé éí neeznáá daníjaaʼígíí éí tʼááłáʼígo shijaaʼ Bóhólníihii yaa nídeidiyiiʼaahígíí Bóhólníihii bichʼįʼ bił dah nídiʼdiilnihgo náádahaniihii Líívai dineʼé daabííʼ dooleełgo baa diníʼą́; éí bąą ábidííniid, Ízrel dineʼé bitahdóó danihííʼ dooleełii ádin doo.
25 Áádóó Bóhólníihii éí Mózes yichʼįʼ haadzíiʼgo ání,
26 Kótʼéego Líívai dineʼé bichʼįʼ handziihgo ábidiní, Ízrel dineʼé éí Bóhólníihii yaa nídeidiyiiʼaahii danihííʼ dooleełgo nihaa diníʼánígíí éí bitsʼą́ą́dóó neeznáá daníjaaʼígíí éí tʼááłáʼígo shijaaʼ Bóhólníihii bichʼįʼ bił dah nídiʼdiilnihgo nááhániihii Bóhólníihii baa dahidohʼaah doo.
27 Áko díí bił dah nídiʼdiilnihgo náádahoołniiʼígíí tʼáá hanáʼálʼisídę́ʼígi átʼéego áádóó tʼáá chʼil naʼatłʼoʼii bitooʼ álʼı̨́ı̨́dę́ʼígi átʼéego nihá bił óltaʼ doo.
28 Kótʼéego Ízrel dineʼé nihaa nídeidiyiiʼaahígíí éí nihí neheleehígíí tʼáá átʼé łaʼ átʼéego Bóhólníihii bichʼįʼ bił dah nídiʼdiilnihgo nááhániihii átʼéego nááʼiiłniihii Éran baa dahohjáah doo.
29 Nihaa dadeestʼáanii tʼáá átʼé bitsʼą́ą́dóó Bóhólníihii bichʼįʼ bił dah nídiʼdiilnihgo náádahaniihii náádahołniih doo; éí dadílyinii agháadi yáʼádaatʼéehii tʼáá átʼé náádahołniih doo.
30 Éí bąą ábididííniił, Agháadi yáʼádaatʼéehii bił dah nídiʼdiilnihgo náádahoołniiʼgo, áko índa nihí Líívai dineʼé danohłíinii chʼínííłnaʼígíí nihííʼ dooleełgo bee nihaa nitsáhákees doo; éí tʼáá hanáʼálʼisídę́ę́ʼígi átʼéego áádóó tʼáá chʼil naʼatłʼoʼii bitooʼ álʼı̨́ı̨́dę́ę́ʼígi átʼéego bee nihaa nitsáhákees doo.
31 Áko nihí áádóó nihaʼáłchíní bił tʼáá nihí danohsinígi nídaohdı̨́įh doo, háálá níbaal biiʼ dahozdísinii bindaałʼaʼígíí bideená nihaa deetʼáanii átʼé.
32 Áádóó agháadi yáʼádaatʼéehii bił dah nídiʼdiilnihgo náádahoołniiʼgo ádił oodzííʼ doo bee ádidahodidoołtʼih da, nidi Ízrel dineʼé bitsʼą́ą́dóó dílzingo aa dahiditʼaahígíí doo dadoołchxǫǫł da, doodaiiʼ daołchxǫʼgo dadínóohnééł.
Footnotes
^ Áshįįh chooʼı̨́įgo éí ahaʼdeetʼáanii hoolʼáágóó biʼjiłʼı̨́ jiníigo óolyé.
