Numbers 19:1-22
19 Áko Bóhólníihii éí Mózes áádóó Éran yichʼįʼ haadzíiʼgo ání,
2 Díí bee hazʼáanii biyiʼ bikʼeh hoogáałii átʼé: Bóhólníihii yee haadzíiʼgo ání, Ízrel dineʼé bił hołneʼ; éí béégashii yáázh biʼáadii łichíʼígíí hadaałtʼéii índa tʼah doo azéédéetání bizéédéetįįhígíí nihaa deidoolóós.
3 Áádóó nááʼiiłniihii Eliyéízar baa doohłóosgo níbaal haalʼá bitsʼáhwiiníʼą́ąjįʼ chʼíidoolóós, índa tʼáá binááł diyoolyééł,
4 áádóó nááʼiiłniihii Eliyéízar éí béégashii bidiłígíí yiih nídílnihgo níbaal biiʼ dahozdísinii bidáahjigo tsostsʼidi yikʼíidoołtah.
5 Béégashii bikágí, áádóó bitsįʼ, áádóó bidił índa bichaan hanááł didoodlił,
6 áádóó nááʼiiłniihii éí dilkʼis áádóó chʼil hísap wolyéhígíí índa tłʼóół łichxíʼígíí néididooniłgo béégashii yáázh biʼáadii didlidgo dookʼą́ą́ł góneʼ iidiyoołkał.
7 Áko índa nááʼiiłniihii biʼééʼ yidoogis, áádóó naazbı̨́ı̨́ʼdóó bikʼijįʼ índa níbaal haalʼáajįʼ nídoodááł, nidi iʼííʼą́ąjįʼ chin bąąh hólǫ́ǫ doo.
8 Áádóó béégashii yáázh bitsʼíís yiidííłidígíí biʼééʼ yidoogis índa nidoobeeł, áko iʼííʼą́ąjįʼ chin bąąh hólǫ́ǫ doo.
9 Áko diné doo chin bąąh hólóonii łaʼ éí béégashii yáázh biʼáadii bitʼeesh néididoojihgo níbaal haalʼá bitsʼáhwiiníʼą́ądi yáʼáhootʼéehjįʼ niidoojih; éí tʼáá sahdii nideetʼáanii tó biih nájihgo ádił niʼiidzííh ididoodah biniyé Ízrel dineʼé bá hashtʼeʼshijaaʼ doo.
10 Áádóó éí béégashii yáázh biʼáadii bitʼeesh ahaniiníjaaʼígíí biʼééʼ yidoogis, áko iʼííʼą́ąjįʼ chin bąąh hólǫ́ǫ doo, índa éí Ízrel dineʼé áádóó hatahgi déʼéyóní tʼóó átsééd kééhatʼíinii bił díí hoolʼáágóó há yee nihoníʼáanii átʼé.
11 Diné tʼáá háiida éí diné daaztsą́ągo bitsʼíís yíhidééʼnáaʼgo éí tsostsʼid yiską́ąjįʼ chin bąąh hólǫ́ǫ doo.
12 Ákohgo tááʼ yiską́ągo éí tó yee ádidooldah áádóó tsostsʼid yiską́ąjįʼ doo chin bąąh hólǫ́ǫ doo, nidi tááʼ yiską́ągo tʼáadoo ádooldeeʼgóó tsostsʼid yiską́ąjįʼ chin bąąh hólǫ́ǫ doo.
13 Tʼáá háiida éí diné łaʼ daaztsą́ągo bitsʼíís yíhidééʼnáaʼgo tʼáadoo ádooldeeʼgóó éí Bóhólníihii biníbaal biiʼ hodílzinii yidoołchxǫǫł; éí Ízrel dineʼé bitsʼą́ąjįʼ bidiʼyoolyééł; tó bee iʼdidéehgo nideetʼáanii doo bikʼístahgóó biniinaa chin bąąh hólǫ́ǫ doo; jó, tʼáá bí chin tʼahdii bąąh hólǫ́.
14 Díí bee hazʼáanii átʼé: níbaal góneʼ diné łaʼ dadziztsą́ągo ákóneʼ yah ahikáhígíí áádóó ákóneʼ dahólónígíí tʼáá ałtso éí tsostsʼid yiską́ąjįʼ chin bąąh dahólǫ́ǫ doo.
15 Tʼáá ákótʼéego ałdóʼ łeetsʼaaʼ doo bidadaʼdeezʼánígíí tʼáá átʼé chin bąąh hólǫ́ǫ doo.
16 Áádóó tʼáá háiida dzígaidi diné łaʼ diltłish bee seesyı̨́įgo, doodaiiʼ atsʼíís daaztsą́ągo, doodaiiʼ diné bitsʼin łaʼ, doodaiiʼ jishcháaʼda bíhizhdééʼnáaʼgo éí tsostsʼid yiską́ąjįʼ chin bąąh hólǫ́ǫ doo.
17 Chin bąąh hólóonii bá béégashii yáázh biʼáadii bitʼeesh ádił niʼiidzííh iidiłdééh biniyé łeetsʼaaʼ bee tʼeesh haidookáałgo tó nílínídę́ę́ʼ tó łaʼ néididookáałgo yikʼi yeidooził,
18 áádóó doo chin bąąh hólóonii chʼil hísap wolyéii tó yiih yidoołjołgo níbaal áádóó łeetsʼaaʼ tʼáá átʼé áádóó ákóneʼ naháaztáanii índa tsinda, doodaiiʼ seesyíinii, doodaiiʼ daaztsáanii, doodaiiʼ jishchááʼ yíhidééʼnáʼígíí bikʼízhdoołtah,
19 áko doo chin bąąh hólóonii éí chin bąąh hólónígíí tááʼ yiską́ągo, áádóó tsostsʼid yiską́ągo tó yikʼíidoołtah, áko tsostsʼid yiską́ąjįʼ doo chin bąąh hólóonii éí chin bąąh hólónígíí yąąh hodoołdah; éí biʼééʼ yidoogis áádóó táʼádidoogis, áko iʼííʼą́ągo índa chin bąąh ádin doo.
20 Nidi diné chin bąąh hólóonii doo ádooldeeʼgóó éí Ízrel dineʼé bitsʼą́ąjįʼ bidiʼyoolyééł, háálá Bóhólníihii biníbaal biiʼ hodílzinii jííłchxǫʼ; tó bee iʼdidéehgo nideetʼáanii éí tʼáadoo hakʼístah da; éí tʼah chin bąąh hólǫ́.
21 Áko díí ahóyéelʼáágóó há yee nihoníʼáanii átʼé: tó bee iʼdidéehgo nideetʼáanii tó akʼíístahígíí biʼééʼ yidoogis, áádóó tó bee iʼdidéehgo nideetʼáanii bíhizhdééʼnáaʼgo iʼííʼą́ąjįʼ chin bąąh hólǫ́ǫ doo.
22 Áádóó chin bąąh hólóonii tʼáá haʼátʼíhída bídahizhdiyiiʼnáhígíí chin bąąh hólǫ́ nidahaleeh, índa tʼáá háiida éí chin bąąh hólǫ́ nidahaleehígíí bíhizhdééʼnáaʼgo iʼííʼą́ąjįʼ chin bąąh hólǫ́ǫ doo.
