Numbers 2:1-34
2 Bóhólníihii éí Mózes áádóó Éran yichʼįʼ haadzíiʼgo ání,
2 Diné tʼááłáʼí jinítínígo Ízrel dineʼé dajílínígíí tʼáá hó hadah naʼatʼaʼí bíighahgi dahazhéʼé yę́ę baʼáłchíní bił bidah naʼatʼaʼí bíighahgi ninádajiʼnéeh doo; níbaal biiʼ dahozdísinii binaadi ninádajiʼnéeh doo.
3 Haʼaʼaahjí hááʼátʼááh bichʼįʼgo éí Júdah bisiláo deínéehii bikʼehgo tʼáá bí bidah naʼatʼaʼí yíighahgi ninádaaʼnéeh doo; Amínadab biyeʼ Náshan éí Júdah dineʼé yinanitʼaʼí nilı̨́.
4 Júdah bisiláo dah yinéełii dayééltaʼígíí tsostsʼidiindóó baʼaan dı̨́įdi mííldóó baʼaan hastą́ądi neeznádiingo ánéelą́ą́ʼ.
5 Áádóó bíighah góneʼ Ísakar dineʼé nináʼnéeh doo; Zúʼer biyeʼ Niithániyel éí Ísakar dineʼé yinanitʼaʼí nilı̨́.
6 Ísakar bisiláo dah yinéełii dayééltaʼígíí ashdladiindóó baʼaan dı̨́įdi mííldóó baʼaan dı̨́įdi neeznádiingo ánéelą́ą́ʼ.
7 Éí bíighah góneʼ Zébyulan dineʼé nináʼnéeh doo; Híílan biyeʼ Iiláíyab éí Zébyulan dineʼé yinanitʼaʼí nilı̨́.
8 Zébyulan bisiláo dah yinéełii dayééltaʼígíí ashdladiindóó baʼaan tsostsʼidi mííldóó baʼaan dı̨́įdi neeznádiingo ánéelą́ą́ʼ.
9 Díí tʼáá ałtso Júdah bisiláo deínéehii bikʼehgo dabiʼdééltaʼígíí tʼááłáhídi neeznádiindóó baʼaan tseebídiindóó baʼaan hastą́ądi mííldóó baʼaan dı̨́įdi neeznádiingo ánéelą́ą́ʼ. Díí éí alą́ąjįʼ yinéeł doo.
10 Áádóó shádiʼááhjígo éí Rúben bisiláo deínéehii bikʼehgo tʼáá bí bidah naʼatʼaʼí yíighahgi ninádaaʼnéeh doo; Shédiyer biyeʼ Iiláízer éí Rúben dineʼé yinanitʼaʼí nilı̨́.
11 Rúben bisiláo dah yinéełii dayééltaʼígíí dízdiindóó baʼaan hastą́ądi mííldóó baʼaan ashdladi neeznádiingo ánéelą́ą́ʼ.
12 Éí bíighah góneʼ Símiyan dineʼé nináʼnéeh doo; Zúrishádai biyeʼ Shiilúmiyel éí Símiyan dineʼé yinanitʼaʼí nilı̨́.
13 Símiyan bisiláo dah yinéełii dayééltaʼígíí ashdladiindóó baʼaan náhástʼéidi mííldóó baʼaan táadi neeznádiingo ánéelą́ą́ʼ.
14 Éí bíighah góneʼ Géed dineʼé nináʼnéeh doo; Rúwel biyeʼ Iiláíyasaf éí Géed dineʼé yinanitʼaʼí nilı̨́.
15 Géed bisiláo dah yinéełii dayééltaʼígíí dízdiindóó baʼaan ashdladi mííldóó baʼaan hastą́ądi neeznádiindóó baʼaan ashdladiingo ánéelą́ą́ʼ.
16 Díí tʼáá ałtso Rúben bisiláo deínéehii bikʼehgo dabiʼdééltaʼígíí tʼááłáhídi neeznádiindóó baʼaan ashdladiindóó baʼaan tʼááłáhídi mííldóó baʼaan dı̨́įdi neeznádiindóó baʼaan ashdladiingo ánéelą́ą́ʼ. Éí naaki góneʼ yinéeł doo.
17 Dah dajínéehgo joonéełii haníiʼgi Líívai dineʼé éí níbaal biiʼ dahozdísinii deíyeehgo hoł náás yinéeł doo. Ninádeiʼáahgo áádóó náádeiʼdiiʼáahgo kótʼéego tʼáá ałkééʼ dah dajínéehii tʼáá hó hadah naʼatʼaʼí bikʼehgo dah nídazhdiiʼnéeh doo.
18 Eʼeʼaahjígo éí Íífreiyim bisiláo deínéehii bikʼehgo tʼáá bí bidah naʼatʼaʼí yíighahgi ninádaaʼnéeh doo; Amáíhad biyeʼ Iilíshama éí Íífreiyim dineʼé yinanitʼaʼí nilı̨́.
19 Íífreiyim bisiláo dah yinéełii dayééltaʼígíí dízdiindi mííldóó baʼaan ashdladi neeznádiingo ánéelą́ą́ʼ.
20 Éí bíighah góneʼ Manáseh dineʼé nináʼnéeh doo; Piidázer biyeʼ Gaméíliyel éí Manáseh dineʼé yinanitʼaʼí nilı̨́.
21 Manáseh bisiláo dah yinéełii dayééltaʼígíí tádiindóó baʼaan naakidi mííldóó baʼaan naakidi neeznádiingo ánéelą́ą́ʼ.
22 Éí bíighah góneʼ Bénjamin dineʼé nináʼnéeh doo; Gídiyónai biyeʼ Abáídan éí Bénjamin dineʼé yinanitʼaʼí nilı̨́.
23 Bénjamin bisiláo dah yinéełii dayééltaʼígíí tádiindóó baʼaan ashdladi mííldóó baʼaan dı̨́įdi neeznádiingo ánéelą́ą́ʼ.
24 Éí tʼáá ałtso Íífreiyim bisiláo deínéehii bikʼehgo dabiʼdééltaʼígíí tʼááłáhídi neeznádiindóó baʼaan tseebíidi mííldóó baʼaan neeznádiingo ánéelą́ą́ʼ. Éí tááʼ góneʼ yinéeł doo.
25 Náhookǫsjígo éí Dan bisiláo deínéehii bikʼehgo tʼáá bí bidah naʼatʼaʼí yíighahgi ninádaaʼnéeh doo; Amishádai biyeʼ Eihaiyíízer éí Dan dineʼé yinanitʼaʼí nilı̨́.
26 Dan bisiláo dah yinéełii dayééltaʼígíí hastą́diindóó baʼaan naakidi mííldóó baʼaan tsostsʼidi neeznádiingo ánéelą́ą́ʼ.
27 Éí bíighah góneʼ Ásher dineʼé nináʼnéeh doo; Ákran biyeʼ Péígiyel éí Ásher dineʼé yinanitʼaʼí nilı̨́.
28 Ásher bisiláo dah yinéełii dayééltaʼígíí dízdiindóó baʼaan tʼááłáhídi mííldóó baʼaan ashdladi neeznádiingo ánéelą́ą́ʼ.
29 Éí bíighah góneʼ Náftalai dineʼé nináʼnéeh doo; Íínan biyeʼ Aháíra éí Náftalai dineʼé yinanitʼaʼí nilı̨́.
30 Náftalai bisiláo dah yinéełii dayééltaʼígíí ashdladiindóó baʼaan táadi mííldóó baʼaan dı̨́įdi neeznádiingo ánéelą́ą́ʼ.
31 Éí tʼáá ałtso Dan bisiláo deínéehii bikʼehgo dabiʼdééltaʼígíí tʼááłáhídi neeznádiindóó baʼaan ashdladiindóó baʼaan tsostsʼidi mííldóó baʼaan hastą́ądi neeznádiingo ánéelą́ą́ʼ. Díí éí akéédę́ę́ʼ tʼáá bí bidah naʼatʼaʼí bikʼehgo yinéeł doo.
32 Díí éí Ízrel dineʼé dabizhéʼé yę́ę bitsʼą́ą́dóó daʼahílchíihii bikʼehgo dabiʼdééltaʼ; siláo deínéehii tʼáá ałtso dabiʼdééltaʼígíí hastą́ądi neeznádiindóó baʼaan táadi mííldóó baʼaan ashdladi neeznádiindóó baʼaan ashdladiingo ánéelą́ą́ʼ.
33 Nidi Líívai dineʼé éí Ízrel dineʼé tʼáadoo bił biʼdééltaʼ da; Bóhólníihii éí Mózes yichʼįʼ haadzíʼígi ádaadzaa.
34 Ízrel dineʼé tʼáá ákǫ́ǫ́ ádaadzaago Bóhólníihii éí Mózes yichʼįʼ yee haadzíʼígíí tʼáá ałtso yikʼeh ádaadzaa; bidah naʼatʼaʼí yíighahgi ninádaaʼnééh nítʼééʼ áádóó ahiiʼ hááʼahiyoolchíiłii tʼáá ałtso dabizhéʼé yę́ę baʼáłchíní náás ahoolchíiłii bikʼehgo yił neeʼniʼjįʼ dah nídadiiʼnééh.
