Numbers 20:1-29
20 Áádóó átsé nídízídígíí binih Ízrel dineʼé tʼáá yinééł nítʼééʼ honoojí Zin hoolyéejįʼ níná; tʼáá ákweʼé Kéídesh hoolyéegi niheezná; ákwii Míriyam daaztsą́ągo yóóʼábiʼdiilyaa.
2 Ákweʼé dah oonéłígíí bá tó ádingo biniinaa áłah ádaʼahiilyaago Mózes áádóó Éran yikʼijįʼ daazlı̨́ı̨́ʼ.
3 Áko Mózes nayíyádaałtiʼgo saad bighą́ągo kódaaní, Danihikʼisóó, Bóhólníihii binááł daneeznánígi átʼéego nihí ałdóʼ dadíníiʼnééł nítʼééʼ!
4 Haʼátʼíísh biniyé Bóhólníihii bidineʼé dah yinéłígíí díí honoojíijįʼ ííníʼeezhgo nihí áádóó nihilı̨́ı̨́ʼ bił nihiʼniiná?
5 Haʼátʼíí biniyé Ííjip kéyahdę́ę́ʼ chʼínihííníʼeezhgo díí doo yáʼáhootʼééhgóó hazʼą́ąjįʼ anihííníʼeezh? Ákweʼé tłʼoh naadą́ą́ʼ ałtah áátʼeełii, doodaiiʼ fig sikaadii bineestʼąʼ, doodaiiʼ chʼil naʼatłʼoʼii, doodaiiʼ pámgrenit bineestʼąʼ ádaadin; tó doodlı̨́įłii ałdóʼ ádaadin.
6 Áádóó Mózes índa Éran éí áłah nilínígíí bitsʼą́ą́ʼ dashdiiʼáazhgo níbaal biiʼ dahozdísinii bichʼéédą́ąʼjįʼ niʼjįʼ tséʼyaa jineeshjool, áko Bóhólníihii bitsʼádiʼnílíidii hachʼįʼ yitʼíní silı̨́ı̨́ʼ.
7 Áko Bóhólníihii éí Mózes yichʼįʼ haadzíiʼgo ání,
8 Gish nídiitįįh áádóó áłah nilínígíí tʼááłáhíjįʼ áłah óhłééh; ni áádóó nikʼis Éran bił áłah dooleełígíí binááł tsé bichʼįʼ hadíídzihgo bitsʼą́ą́dóó tó hadoonah, áko tsé biyiʼdóó tó hadoonahígíí éí áłah nilínígíí áádóó dabilı̨́ı̨́ʼ ałdóʼ deidoodlı̨́ı̨́ł.
9 Áko Bóhólníihii hólǫ́ǫ́dóó Mózes éí gish néidiitą́; bichʼįʼ bee haʼoodzíʼígíí yiʼiilaa.
10 Áko Mózes áádóó Éran éí áłah nilínígíí tʼááłáhíjįʼ tsétsı̨́įjįʼ áłah ájiilaago ábizhdííniid, Kʼad daʼíísółtsʼą́ą́ʼ. Nihí nidaałteehígíí, daʼ nihíísh díí tsé biyiʼdę́ę́ʼ tó háálı̨́įgo nihá ádiilnííł?
11 Áko Mózes éí gish yił yadidiilniiʼgo naakidi tsé néidííłhaalgo tó tʼóó ahayóí hadzííłhaal, áko áłah nilínígíí daʼoodlą́ą́ʼ áádóó dabilı̨́ı̨́ʼ ałdóʼ daʼoodlą́ą́ʼ.
12 Áádóó Bóhólníihii éí Mózes áádóó Éran ííłní, Ízrel dineʼé binááł doo shiinohdlą́ą́góó áádóó doo shidíínóhsingóó biniinaa díí áłah nilínígíí kéyah baa dinishʼaahígíí doo biih doohʼish da.
13 Díí tó háánaʼígi Méribah* hoosyeʼ, háálá ákwii Ízrel dineʼé éí Bóhólníihii yichʼįʼ saad dahasłı̨́ı̨́ʼ índa ákwii hachʼįʼ diyingo íʼdiilyaa.
Íídam dineʼé éí Ízrel dineʼé yichʼįʼ kéyah yaa dahóchįʼ
14 Áko Mózes éí Kéídeshdóó haneʼ nideiʼáhí danilíinii éí Íídam hoolyéédóó aláahgo naatʼáanii bichʼįʼ ajiisʼaʼgo ájíní, Ízrel dineʼé nikʼéí kódaaní, Díí nił bééhózin: achʼįʼ nahwiiʼná tʼáá átʼé bikʼee ka nisiikai;
15 éí danihizhéʼé yę́ę Ííjip kéyah góyaa íínáago áádóó áadi kéédahwiitʼı̨́įgo nízaad nihoolzhiizh, índa Ííjip dineʼé éí tsʼídá doo ákwii ádanihííłʼįįd da, áádóó danihizhéʼé yę́ę ałdóʼ ákódayííłʼįįd,
16 nidi Bóhólníihii bichʼįʼ deichago nihidiiztsʼą́ą́ʼ, áko diyingo naalʼaʼí yiníłʼaʼgo Ííjip kéyahdóó chʼínihiníʼeezh. Jó, nikéyah nihoneelʼą́ągi Kéídesh kin haalʼáagi dah yiiʼnééł.
17 Baa nánooshkąąh, nihíniʼdii nikéyah góneʼ chʼídiiʼnééł; nidáʼákʼeh, doodaiiʼ nichʼil naʼatłʼoʼii bitah góneʼ éí doo adiiʼnéeł da; nitóhadahadleehgi nidi nitoʼ doo łaʼ nitsʼą́ą́ʼ dadiidlı̨́įł da; aláahgo naatʼáanii beʼatiingóó tʼáá kʼéhézdon hadidiiʼnééł; nishʼnáajįʼ, doodaii nishtłʼajįʼ tʼáadoo atiin bitsʼániikáhí hadidiikah; nił hahoodzoígíí ałtso biiʼ hadiikaijįʼ.
18 Nidi Íídam wolyéii áhodííniid, Doo shíighahgóó chʼídíínéeł da, doodaiiʼ diltłish bee nihichʼįʼ nídadidiibah.
19 Ákohgo Ízrel dineʼé ádahodííniid, Tʼáá kʼéhézdon atiingóó hadidiiʼnééł; nihí índa nihilı̨́įʼda nitoʼ łaʼ nitsʼą́ą́ʼ deiidlą́ąʼgo éí bikʼé nichʼįʼ niʼdeeshłééł; tʼáadoo haa dadeitʼíní tʼóó tʼáá niʼ níighah chʼídeeshnééł.
20 Nidi Íídam ání, Doo nihíighahgóó chʼídoohnéeł da. Áko Íídam dineʼé tʼóó ahayóigo índa adziil bee dahólǫ́ǫgo hachʼįʼ chʼíníná.
21 Kótʼéego Íídam dineʼé bikéyah góneʼ Ízrel dineʼé hadidoonéełgo dayókeedígíí tʼáadoo yadaʼdeezʼą́ą da, áko Ízrel dineʼé tʼóó hatsʼą́ąjigo nákʼeeʼąądi hakʼeeʼąą ahééníná.
Dził Hor bighą́ąʼdi Éran daaztsą́
22 Ákohgo Ízrel dineʼé dah yinéłígíí tʼáá ałtso Kéídeshdóó dah náádiiʼnáago Dził Hor hoolyéejįʼ níná.
23 Áádóó Íídam kéyah hahoodzooígíí bíighahgi Dził Hor hoolyéegi Bóhólníihii éí Mózes áádóó Éran yichʼįʼ haadzíiʼgo ání,
24 Éran éí hadineʼé yę́ę bichʼįʼ nízhdoodleeł; jó, Ízrel dineʼé kéyah baa dinishʼaahígíí doo biishdoogáał da, háálá tó háánaʼgo Méribah hoosyeʼígi tʼáá ánóhłah shizaad bichʼįʼ disoołteeʼ.
25 Éran áádóó biyeʼ Eliyéízar bił nídiiʼéeshgo Dził Hor góde hashíʼéésh.
26 Áko Éran biʼééʼ baa didííniłgo biyeʼ Eliyéízar bee hadidíílííł, áádóó ákwii Éran dazdootsaałgo hadineʼé yę́ę bichʼįʼ nízhdoodleeł.
27 Áádóó Mózes éí Bóhólníihii hachʼįʼ yee haadzíʼígíí bikʼeh ádziidzaa; dah oonéłígíí tʼáá ałtso binááł Dził Hor góde hadziskai.
28 Áko Mózes éí Éran biʼééʼ yeidiinilgo Éran biyeʼ Eliyéízar yee haidiilaa; áadi dziłghą́ąʼgi Éran daaztsą́, áko Mózes áádóó Eliyéízar éí dziłghą́ą́ʼdę́ę́ʼ bidanáátʼáázh.
29 Ákohgo dah oonéłígíí éí Éran daaztsą́ągo bił béédahoozingo Ízrel dineʼé tʼáá ałtso daachago haa yínííł naakaigo tádiin yiską́.
Footnotes
^ Méribah jiníigo Hííbrew kʼehjígo baa saad dahółǫ́ jiníigo óolyé.
