Numbers 21:1-35
21 Nítʼééʼ Kéínandóó aláahgo naatʼáanii Éírad wolyéii Kéínan nahósʼaʼgi shádiʼáahjigo kééhatʼı̨́. Ízrel dineʼé éí naalchiʼí yíkai yę́ędę́ę́ʼ yinéełgo yaa hodiiztsʼą́ą́ʼ. Áko Ízrel dineʼé yichʼįʼ nídiibaaʼgo łaʼ deisná.
2 Áko Ízrel dineʼé ádee hadaasdzíiʼgo Bóhólníihii yichʼįʼ ádee hadaasdzíʼígíí ádaaní, Díí dineʼé tʼáá aaníí nihílákʼee dííníʼą́ągo bikin hadaasʼáii tsʼídá ałtso atídadiilnííł.
3 Áádóó Bóhólníihii éí Ízrel dineʼé yidiiztsʼą́ąʼgo Kéínan dineʼé hálákʼee yidííʼą́ągo bikin hadaasʼáii tʼáá bił tsʼídá ałtso ádadzisdįįd, áko éí nahósʼaʼgi Hórmah hoolyée doo, jidííniid.*
Tłʼiish báádahadzidii
4 Áko Dził Hordóó dah náázhdiiʼnáago Íídam kéyah bikʼeeʼąą ahéézhdooʼnééł biniyé Tónteel Łichííʼ bíighahjígo chʼízhníná, áko diné yinéłígíí doo ashtʼéʼégóó bąąh nidahwiizkaad.
5 Ákohgo diné éí Diyin God áádóó Mózes yikʼijįʼ hadahadziihgo ádaaní, Haʼátʼéegoshąʼ honoojíigi daniiʼnée dooleeł biniyé Ííjip kéyahdę́ę́ʼ chʼínihííníʼeezh? Jó, kweʼé bááh ádin, tó nidi ádin áádóó díí mána yilzhólíii deidą́ągo doo binádadiidzįįd da.
6 Nítʼééʼ Bóhólníihii éí tłʼiish báádahadzidii diné yitahjįʼ yiʼníłniiʼgo diné ahidayiishxazh, áko Ízrel dineʼé tʼóó ahayóí daneezná.
7 Áádóó diné éí Mózes yaa yíkaigo ádaaní, Ádił daʼsiilziihéi; Bóhólníihii bikʼijįʼ áádóó ni nikʼijįʼ hadahaadzííʼ lá; Bóhólníihii nihá néinikąąh, áko díí tłʼiish nihitsʼą́ąjįʼ yééʼdoołnih. Ákohgo Mózes éí diné yá sodoolzin.
8 Áko Bóhólníihii éí Mózes ííłní, Tłʼiish bááhádzidii bééʼdíídlíiłgo tsin adíítsihgo bąąh dah hididííłtʼeeł, áko tłʼiish ahidahwiishxazhígíí tʼáá ádzíłtso éí tłʼiish bééʼályaago dah hidiiltʼeʼígíí bikʼi dadzizghalii éí dajiináa doo.
9 Áádóó Mózes éí béésh łitsoii bee tłʼiish bééʼjiidlaago tsin adzíítsigo bąąh dah dzistı̨́; diné tʼáá háiida tłʼiish bishxashii éí tłʼiish dah hidiiltʼeʼígíí yikʼi níghalii éí hináa doo.
Ízrel dineʼé éí Móʼab yikʼeeʼąą ahénáʼná
10 Ízrel dineʼé dah náádiiʼnáago Óbathgi nináánáʼná.
11 Áádóó Óbathdóó náás náádeesnáago Áíjii-ábarim honoojíigi Móʼab kéyah binaashiijí hááʼátʼááhjígo nináánáʼná.
12 Éí áádóó dah náádiiʼnáago Zííred yíldzisgi níbaal nináádeisnil.
13 Kodóó dah náádiiʼnáago éí Árnan tooh nílínígíí wónaaníjígo éí Ámor dineʼé bikéyah bibąąhdę́ę́ʼ honoojíidi nináánáʼná, háálá Árnan tooh nílínígíí éí Móʼab dineʼé bikéyah áádóó Ámor dineʼé bikéyah bitaʼdę́ę́ʼ chʼínílı̨́įgo bee hoodzo.
14 Éí bąą Bóhólníihii ninábah yę́ę bee naaltsoos siʼánígíí biyiʼ góneʼ áháʼní, Tónteel Łichíiʼgi áádóó Árnan tooh nílínígi naazbaaʼ;
15 éí Ar kin shijaaʼ bichʼįʼgo taah daasdzisígóó, éí Móʼab dineʼé bikéyah hoodzo bibąąhgóó naazbaaʼ, haʼní.
16 Kodóó Ízrel dineʼé éí Bíyergóó dah náádiiʼná; ákweʼé Bóhólníihii éí Mózes yichʼįʼ tó hahadleeh dooleełígíí yaa yáłtiʼgo ání, Diné áłah ánílééh, áko tó baa dideeshʼááł.
17 Áko Ízrel dineʼé díí sin yee dahóótáál,
Tó hahadleeh nílíinii, tó haninééh!Tó bichʼįʼ dahohtaał;
18 naatʼáanii danilíinii tó yíkáidaʼiizgeed; diné binanitʼaʼídanilíinii bigish yee tó yíkánidaʼazgeed.
Áko honoojíídóó Mátanah hoolyéégóó Ízrel dineʼé dah náádiiʼná;
19 Mátanah hoolyéédóó Nahéíliyel hoolyéejįʼ náánáʼná, índa Nahéíliyel hoolyéédóó Béímath hoolyéejįʼ náánáʼná.
20 Béímath hoolyéédóó Móʼab kéyahgi Dził Pízgah bighą́ąʼdi yíldzisjįʼ náánáʼná, Dził Pízgah hoolyéédóó Jiisháíman honoojíí góyaa ayootʼı̨́ı̨́ʼ.
Ízrel dineʼé éí Sáíhan yikʼeh dadeesdlı̨́ı̨́ʼ (Deut. 2:26-37)
21 Áko Ízrel dineʼé éí Ámor dineʼé aláahgo binanitʼaʼí Sáíhan wolyéii yichʼįʼ adaʼasʼaʼgo ádaaní,
22 Nihíniʼdii nikéyah góneʼ chʼídiiʼnééł; nidáʼákʼeh, doodaiiʼ nichʼil naʼatłʼoʼii bitah góneʼ éí doo adiiʼnéeł da, áádóó nitóhadahadleehgi nidi nitoʼ doo nitsʼą́ą́ʼ dadiidlı̨́įł da; aláahgo naatʼáanii beʼatiingóó hadidiiʼnéełgo nił hahoodzooígíí ałtso biiʼ hadidiikah.
23 Áko Sáíhan bikéyah bił hahoodzo góneʼ Ízrel dineʼé hadidoonéłígíí tʼáadoo yadiʼníʼą́ą da, nidi Sáíhan bidineʼé tʼáá ałtso áłah áyiilaago honoojíígóó Ízrel dineʼé yichʼįʼ nídiibaaʼ; Jéíhazjįʼ aníʼeezhgo Ízrel dineʼé yił daʼahoogą́ą́ʼ.
24 Ákohgo Ízrel dineʼé éí diltłish yee ałtso nidahastseed; Sáíhan bidineʼé Árnan tooh nílínídóó Jábak tooh nílíníjįʼ tʼáá Áman dineʼé bihoodzooíjįʼ bikéyah yę́ę hóóʼ daazlı̨́ı̨́ʼ, háálá Áman dineʼé bikéyah bidziilgo bichʼą́ą́h hoodzo.
25 Áko Ízrel dineʼé díí kin hadaasʼá tʼáá átʼé deisnáago Ámor dineʼé bikin hadaasʼáá nítʼééʼ yę́ęgóó tʼáá átʼé Ízrel dineʼé kéédahatʼı̨́; Héshban kin haalʼáhígi áádóó binaagóó tʼáá átʼé kin dah naazhjaaʼígóó kéédahatʼı̨́.
26 Jó, Héshban kin haalʼáii éí Ámor dineʼé aláahgo binanitʼaʼí Sáíhan wolyéii bikin haalʼáá nítʼééʼ; bí átséédą́ą́ʼ Móʼab dineʼé aláahgo binanitʼaʼí yił ahóbáahgo hakéyah tʼáá átʼé Árnan tooh nílíníjįʼ ałtso haghaiideetʼą́.
27 Éí bąą saad bee hódzą́ yee yádaałtiʼígíí ádaaní,
Hágo Héshban kin haalʼáajįʼ dadohkááh,hániʼdii Sáíhan bikin haalʼá ánáhódleʼgo bidziil leʼ;
28 jó, Héshban kin haalʼáádę́ęʼgo hodiiltłah;Sáíhan bikin haalʼáádę́ę́ʼ kǫʼ doonał;éí Móʼab kéyahgi Ar kin shijaaʼídi índa Árnan tooh nílínígi dah daaskʼid bighą́ąʼdi ádaalyaii bee hódahólníhígíí ahodiiskʼą́ą́ʼ.
29 Móʼab dineʼé nohłíinii, doo hojoobaʼ ájíníi da!Kíímash yichʼįʼ nahałáhí nohłíinii, dooládóʼ hojoobaʼ ánihiʼdiilyaa da;biyeʼké nidabidiʼnilchée doogo ninéidiníʼą́ índa bitsiʼké yisnááh dadooleełgo Ámor dineʼé aláahgo binanitʼaʼí Sáíhan wolyéii yichʼįʼ ninéidiníʼą́.
30 Naaʼabídadziyeeltʼohgo bikʼeh dadeedlı̨́ı̨́ʼ; Héshban kin haalʼáádóó Dáíban kin haalʼáajįʼ ałtso ádahosiildįįd, áádóó Nófah kin haalʼáajįʼ éí Médiiba kin haalʼáii bíighahjįʼ tʼáá átʼé doo siláhígóó ádeiilyaa.
Ízrel dineʼé éí Béíshan kéyahdóó Ag wolyéii yikʼeh dadeesdlı̨́ı̨́ʼ (Deut. 3:1-11)
31 Kótʼéego Ámor dineʼé bikéyahgi Ízrel dineʼé kééhatʼı̨́ı̨́ nítʼééʼ.
32 Áádóó Mózes éí Jéízer kin haalʼáii hadoolziłgo ákǫ́ǫ́ iʼjííłʼaʼ, áko kin dah naazhjaaʼígíí deisná; ákwii Ámor dineʼé kéédahatʼínígíí chʼídeineeskaad.
33 Áádóó dah náádiikaigo Béíshan kéyah bichʼįʼ atiingóó yíkai, áko Béíshan kéyahdóó aláahgo naatʼáanii Ag wolyéii bidineʼé tʼáá ałtso yił hakʼijįʼ danilı̨́įgo Édriyai kin haalʼáagi hachʼįʼ anaaʼ daniidzı̨́ı̨́ʼ.
34 Nidi Bóhólníihii éí Mózes ííłní, Tʼáadoo bikʼee nił yéʼí; bidineʼé tʼáá ałtso índa bikéyah ałdóʼ tʼáá bił nílákʼee hodííʼą́, áko Ámor dineʼé aláahgo binanitʼaʼí Sáíhan wolyéii Héshban kin haalʼáagi kééhatʼínígíí íinilaaígi átʼéego hó ałdóʼ ákóhodíílííł.
35 Ízrel dineʼé éí Ag wolyéii áádóó hayeʼké índa hadineʼé ałtso nideistseedgo doo łaʼ hináágóó ádayiilaa, áko hakéyah bííʼ daazlı̨́ı̨́ʼ.
Footnotes
^ Hórmah jiníigo Hííbrew kʼehjígo ałtso íísdįįd jiníigo óolyé.
