Numbers 22:1-41
22 Áádóó Ízrel dineʼé dah náádiiʼnáago Jériko kin haalʼáii binaashiijí Jórdan tooh nílíní haʼaʼaahjígo Móʼab kéyah nidzisgaigi niníná.
2 Áko Zípor biyeʼ Béílak wolyéii Ízrel dineʼé éí Ámor dineʼé ádayííłʼįįdígíí tʼáá átʼé bił bééhózin.
3 Ákohgo Móʼab dineʼé éí tʼóó báhádzidgo bił yééʼ dahazlı̨́ı̨́ʼ, háálá Ízrel dineʼé ayóó ánéelą́ąʼgo yinééł, áádóó Móʼab dineʼé éí Ízrel dineʼé yikʼee yééʼ biiʼ dahazlı̨́įʼgo niseekai.
4 Áko Móʼab dineʼé éí Mídiyan dineʼé hastóí aląąjįʼ naazíinii ádeidííniid, Kʼad díí diné tʼóó ahayóí. Béégashii éí tłʼoh ałtso yaa nahodikahígi átʼéego yinéłígíí nihinaagóó kéédahatʼínígíí ałtso yił nidínóodah. Áko Zípor biyeʼ Béílak wolyéii éí íídą́ą́ʼ Móʼab dineʼé aláahgo yinanitʼaʼí nilı̨́ı̨́ nítʼééʼ;
5 éí bąą haneʼ nideiʼáhí dah deidiyiiłʼaʼgo bidineʼé baʼáłchíní dabikéyahgi tooh nílínígíí bíighahgi Pííthor hoolyéejįʼ Bíyor biyeʼ Béílam wolyéii hágo deididooniił biniyé yíká iʼííłʼaʼgo ání, Jó, Ííjip kéyahdę́ę́ʼ dineʼé léiʼ chʼídahaazná; jó, kweʼé kéyahgóó tʼáá átʼé yílʼá, áko shinaashiidę́ę́ʼ nidahaazná.
6 Éí bąą kʼad nánooshkąąh, shaa díínááł; díí dineʼé shá bidíníídzįįł, háálá shilááh ádabóodziil; tʼáá shı̨́ı̨́ bikʼeh dideeshdleełgo bikʼidiyaa dadiidleeł, áádóó kéyahdóó chʼíhodínéeshkał; jó, tʼáá háiida bikʼidahojidliihígíí éí bikʼidahojidliih, índa tʼáá háiida hóyéeʼjįʼ bá handzihígíí éí hwíínídziih.
7 Áádóó Móʼab dineʼé índa Mídiyan dineʼé hastóí aląąjįʼ naazíinii éí naʼídídóokił biniyé bee iidookąąłii dah deidiijaaʼgo Béílam yaa yíkaigo Béílak áníinii yee yił dahoolneʼ.
8 Áko Béílam áhodííniid, Tʼáá kǫ́ǫ́ danihiidoołkááł, áko Bóhólníihii shichʼįʼ yee haadzíʼígíí éí bee nihił náhodeeshnih. Ákohgo Móʼab dineʼé aląąjįʼ naazíinii éí Béílam bighangi dabiiską́.
9 Áádóó Diyin God éí Béílam yaa honíleʼgo ííłní, Diné nił naháaztánígíí lá háí ádaatʼı̨́?
10 Áko Béílam éí Diyin God ííłní, Zípor biyeʼ Béílak éí Móʼab dineʼé aláahgo binanitʼaʼí nilı̨́įgo shaaʼníłʼaʼgo ání,
11 Shoo, Ííjip kéyahdę́ę́ʼ dineʼé léiʼ chʼídahaaznáago éí kweʼé kéyahgi tʼáá átʼé yílʼá, áko kʼad shaa nínáahgo shá bidiníídzįįł; tʼáá daatsʼí bikʼeh dideeshdleeł bíneeshʼą́ągo shaa chʼíhidoojah.
12 Áádóó Diyin God éí Béílam ííłní, Doo bił nihidííkah da; díí dineʼé doo bidíníídzįįł da, háálá éí bikʼidahojisdliʼ.
13 Abínígo Béílam nídiiʼnaʼgo Béílak bitsʼą́ą́dę́ę́ʼ naatʼáanii yíkaígíí ííłní, Nihílááh, nihikéyahgóó nídóhkááh; jó, nihił nihéédeeshkahgi tʼáadoo Bóhólníihii shadiʼníʼą́ą da.
14 Ákótʼéego Móʼab dineʼé binanitʼaʼí danilíinii dah nídiikaigo Béílak yaa nákaigo ádaaní, Béílam éí doo nihił nihideeshkah da, nihiłní.
15 Nítʼééʼ Béílak éí naatʼáanii átséhígíí bilááh ánéelą́ąʼgo tʼáá íiyisí aláahgo ił danilíinii anááyííłʼaʼ.
16 Áko éí Béílam yaa yíkaigo ádeidííniid, Zípor biyeʼ Béílak kóní, Baa nánooshkąąh, bíniʼ tʼáadoo naniníłtłʼaaígóó shaa nínááh,
17 háálá tʼáá íiyisí ayóó átʼéego ił ídlı̨́ bee náás nideeshtʼeeł, áádóó tʼáá áshidinínígi ádeeshnííł, áko tʼáá shǫǫdí, shaa nínáahgo díí dineʼé shá bidíníídzįįł.
18 Áádóó Béílam éí Béílak yá nidaalʼaʼígíí áyidííniid, Azhą́ béésh łigaii áádóó óola Béílak bikin biiʼ hadeezbingo sheideeʼaah nidi, Bóhólníihii shiDiyin God áníinii doo biʼoh, doodaiiʼ doo bilááh ádeeshłíił da.
19 Éí bąą kʼad tʼáá shǫǫdí, tʼáá kǫ́ǫ́ danihiyółkááł, áko átsé shił bééhodoozįįł: Bóhólníihii haʼátʼíí nááshididooʼniił.
20 Áko Diyin God éí tłʼéeʼgo Béílam yaa honíleʼgo ííłní, Diné naa yíkaigo tįʼ dandííniidgo nídidííʼnahgo bił dah nídidííkah, nidi saad bee nichʼįʼ hahasdziihígíí tʼéiyá biʼíínísin doo.
Diyingo naalʼaʼí áádóó Béílam bitélii
21 Áádóó abínígo Béílam nídiiʼnaʼgo bitélii yikʼi dah aznil áádóó Móʼab dineʼé bindanitʼaʼí yił dah diikai.
22 Nidi dashdiiyáhígíí biniinaa Diyin God báhóóchįįd, áko Bóhólníihii bidiyingo naalʼaʼí hakʼijįʼ nilı̨́įgo hadáahgi yiizįʼ. Áko télii hoł yildlosh áádóó há naalʼaʼí nidiltʼéego hoł yikah.
23 Áko télii éí Bóhólníihii bidiyingo naalʼaʼí diltłish dah yootı̨́įłgo atiingi sizı̨́įgo yiyiiłtsą́, áko télii éí atiin kʼeeʼąą haaldloozhgo tʼáá áhoodzaajigo hoł niheeldloozh, nítʼééʼ Béílam éí atiinjįʼ télii bił anídooldloosh biniyé télii yijaatʼah adziisxaal.
24 Nidi chʼil naʼatłʼoʼii yílʼáhígíí bitaʼgi tsé ałtsʼą́ą́hjí yítłʼingo atiinígi Bóhólníihii bidiyingo naalʼaʼí yiizįʼ.
25 Áko télii éí Bóhólníihii bidiyingo naalʼaʼí yiyiiłtsą́ągo tsé yítłʼinígíí hoł yídeezgohgo tsé bikʼijįʼ Béílam bikeeʼ yishjizh, áko Béílam éí télii yijaatʼah anáádziisxaal.
26 Áádóó Bóhólníihii bidiyingo naalʼaʼí náás náádeesdzáago tʼáá íiyisí áhoołtsʼóózígo ahóótʼiʼ léiʼ góneʼ yiizįʼgo nishʼnáajigo índa nishtłʼajigo doo dashdooyaʼ átʼéégóó dáádinízı̨́.
27 Áko télii éí Bóhólníihii bidiyingo naalʼaʼí yiyiiłtsą́ągo Béílam yił neeztı̨́įgo Béílam báhóóchįįdgo bigish yee télii néineesxaal.
28 Áádóó Bóhólníihii éí télii hayiyííłdzíiʼgo Béílam ííłní, Haash niishłaago díí táadi náshiníníłhaal?
29 Áko Béílam éí télii ííłní, Jó, tʼóó shá nahółtʼiʼ, éí bąą; diltłish łaʼ dah naashtingo éí kʼad nidiyeeshxééł nítʼééʼ.
30 Áádóó télii éí Béílam ííłní, Daʼ doósh nitélii nishłı̨́įgo nííʼ sélı̨́ı̨́ʼ bijı̨́ı̨́dóó wóshdę́ę́ʼ díí jı̨́įjįʼ tándííyı̨́į da? Łahdaásh kóniishłaa? Ákohgo, Nidagaʼ, jidííniid.
31 Nítʼééʼ Bóhólníihii éí Béílam binááʼ yee iidoołtséełgo áyiilaa índa Bóhólníihii bidiyingo naalʼaʼí diltłish dah yootı̨́įłgo atiingi dáádinízı̨́įgo jiiłtsą́, áko niʼjįʼ tséʼyaa jineeshjool.
32 Áádóó Bóhólníihii bidiyingo naalʼaʼí áhodííniid, Haʼátʼéegoshąʼ táadi nitélii náníníłhaal? Jó, nichʼą́ą́h nideeshááł biniyé naa honíleʼ, háálá doo tsʼííd ánítʼéégóó niníshʼı̨́.
33 Áko díí télii náshiiltséehgo táadi shikʼeeʼąą hááyá; éí tʼáadoo ákódzaagóó niyéłhı̨́ı̨́ shı̨́ı̨́ doo nítʼééʼ; bí éí tʼáá hináa doo.
34 Áádóó Béílam éí Bóhólníihii bidiyingo naalʼaʼí ííłní, Ádił asésiih; jó, shidáádíínízínígíí doo shił bééhózin da lá, nidi kʼad yisháłígíí doo nił yáʼátʼééhgóogo tʼóó tʼą́ą́ʼ nihéédeeshdááł.
35 Bóhólníihii bidiyingo naalʼaʼí Béílam ííłní, Nílááh, diné bił yíkah, nidi saad bee nił hashneʼ dooígíí tʼéiyá bee hahídziih doo. Kótʼéego Béílam éí Béílak yił naatʼáanii danilíinii bił dah náázhdiikai.
Béílam áádóó Béílak
36 Áko Béílak éí aadę́ę́ʼ Béílam yigáałgo yaa hodiiztsʼą́ą́ʼ, áko Móʼab kéyah biyiʼ kin haalʼáhídi Árnan tooh nílíní bee hoodzooígi yidááh doogáałgo ákǫ́ǫ́ dah diiyá.
37 Béílak éí Béílam ííłní, Daʼ doósh tʼáá íiyisí shaa díínááł nidideeshniił biniyé nichʼįʼ iʼííłʼaʼ da? Haʼátʼéegoshąʼ tʼáadoo shéíníyáa da? Ił ídlíinii bee náás nideeshtʼeełígíísh doo bíneeshʼą́ą da?
38 Áádóó Béílam éí Béílak ííłní, Jó, kʼad kǫ́ǫ́ naa níyá; kʼadísh shí bee óhólnííh shee hólǫ́ǫgo bee hadeesdzih? Jó, Diyin God éí saadígíí shizeidooléełgo bee yáshtiʼ doo.
39 Áko Béílam éí Béílak bił dashdiiʼáazhgo Kírjath-házath kin shijaaʼjįʼ jiníʼáázh.
40 Áádóó Béílak éí béégashii áádóó dibé nááyiisniiʼ, áádóó Béílam índa naatʼáanii hoł naakaígíí ałdóʼ łaʼ yaʼníłtsood.
41 Áko biiskání Béílak éí Béílam yił dah diiʼáazhgo Béíyal eʼelyaii yichʼįʼ ninádahałaah doo biniyé wódah nahazʼą́ągo ádayiilaadóó Ízrel dineʼé tʼáá dah yinééł nítʼééʼ yizdoołtsééł biniyé ákóde hoł haazhʼáázh, ndi tʼáadoo ałtso jiiłtsą́ą da.
