Numbers 23:1-30
23 Áádóó Béílam éí Béílak ííłní, Kweʼé bikááʼ nááʼiiniihí tsostsʼidgo shá ádíílííł índa béégashii tsostsʼidgo áádóó deenástsʼaaʼ tsostsʼidgo kweʼé shá hashtʼedíílííł.
2 Ákohgo Béílam ádííniidígíí bikʼehgo Béílak ádzaa, áádóó Béílak índa Béílam éí dóola yázhí áádóó deenástsʼaaʼ éí bikááʼ nááʼiiniihí yikʼeh nítı̨́įgo nááyiyiisniiʼ.
3 Áko Béílam éí Béílak ííłní, Didlidgo nááhíłniihígíí bíighahgi sínízı̨́; shí níláhgóó deeshááł, Bóhólníihii daatsʼí shaa hodooleeł; tʼáá shił ííshją́ą́ áyiilaaígíí bee nił náhodeeshnih. Áko yílkʼid góde haayá.
Béílam éí Ízrel dineʼé yikʼijisdliʼ
4 Béílam éí Diyin God baa honíleʼgo áyidííniid, Bikááʼ nááʼiiniihí tsostsʼidgo hashtʼedaashłaa; éí bikáaʼgi dóola yázhí áádóó deenástsʼaaʼ náádaháłniiʼ.
5 Áádóó Bóhólníihii éí bizaadígíí Béílam yizayííláago ííłní, Béílak bichʼįʼ nídídáahgo kótʼéego bichʼįʼ hadíídzih.
6 Béílam éí Béílak yaa nádzá, áko didlidgo nááhániihígíí yíighahgi sizı̨́; bí áádóó Móʼab dineʼé binanitʼaʼí tʼáá ałtso yił naazı̨́.
7 Áádóó Béílam éí bee akʼidiʼdootı̨́įłii yee haadzíiʼgo ání,
Móʼab kéyahdóó Béílak aláahgo naatʼáanii nilíinii éí Áram kéyah haʼaʼaahjí dził naaznildę́ę́ʼ shił nátʼáazhgo ání,Hágo, Jéíkab shá bidíníídzįįł;Hágo, Ízrel dineʼé binídzin.
8 Haʼátʼéegoshąʼ hóyéeʼgo bá haasdziih doo, éí Diyin God doo hóyéeʼgo bá haadzííʼgóó?Haʼátʼéegoshąʼ hóyéeʼgo bá hadeesdzih, éí Diyin God doo hóyéeʼgo bá haadzííʼgóó?
9 Jó, tsénítʼiʼ bighą́ą́ʼdóó yishʼı̨́, índa yílkʼid bighą́ą́ʼdóó yishʼı̨́; jó, tʼáá sahdii kééhatʼı̨́, áádóó ałʼąą dineʼé bitahgóó doo bił óltaʼ da.
10 Łeezh dibahí doo jóołtaʼ ánéelą́ąʼdaígi átʼéego Jéíkab dineʼé doo jóołtaʼ átʼée da.Ízrel dineʼé dı̨́įʼgo dashijaaʼígíí éí tʼááłáʼí shijaaʼ tʼáásh yídóoltah?Tʼáá ákogi átʼéii nilínígíí daaztsánígi átʼéego hániʼdii dadeestsaał; hániʼdii bí átʼéé nítʼééʼ yę́ęgi átʼéego shá nihonítʼiʼ doo!
11 Áko Béílak éí Béílam ííłní, Haa lá shííníłʼįįd? Shą́ą́ʼ shidaʼanaʼí bidíníídzįįł biniyé níká iʼííłʼaʼ, nidi shoo, tʼóó bikʼijiisínídliʼ.
12 Áádóó ábizhdííniid, Jó, Bóhólníihii tʼéí yíísínístsʼą́ąʼgo shichʼįʼ yee hahadziihígíí tʼéiyá bee hahasdziih doo.
13 Áko Béílak áháłní, Hágo, nánooshkąąh, łahdę́ęʼgo anáádiitʼashgo áádę́ęʼgo náádínííłʼįįł, nidi doo tʼáá átʼé yidííłtséeł da; tʼáá áhánígóóígíí tʼéiyá dínííłʼįįłgo áádóó shá bidíníídzįįł.
14 Áádóó Dził Pízgah bighą́ąʼdi Zófim dzígaijįʼ hoł níʼáazhgo bikááʼ nááʼiiniihí tsostsʼidgo áyiilaago bikáaʼgi dóola yázhí áádóó deenástsʼaaʼ bikʼeh nítı̨́įgo nááyiyiisniiʼ.
15 Béílam éí Béílak ííłní, Kweʼé didlidgo nááhíłniihígíí bíighahgi sínízı̨́; shí éí níláahdi Bóhólníihii bidááh deeshááł.
16 Áko Bóhólníihii éí Béílam yaa honíleʼii áádóó bizaadígíí Béílam yizayííláago ííłní, Béílak bichʼįʼ nídídáahgo kótʼéego bichʼįʼ hadíídzih.
17 Áádóó Béílak baa nídzídzáago, shoo, didlidgo nááyiyiiłniihígíí yíighahgi Móʼab dineʼé bindanitʼaʼí yił naazı̨́. Áko Béílak áháłní, Bóhólníihii lá, haʼátʼíí ní?
18 Ákohgo Béílam bee akʼidiʼdootı̨́įłii yee haadzíiʼgo ání,
Béílak yiizįįhgo shíísíníłtsʼą́ą́ʼ,Zípor biyeʼ nílíinii, shíísíníłtsʼą́ą́ʼ,
19 Diyin God éí doo diné átʼée dago doo biyoochʼíid da,doodaiiʼ doo diné biyeʼ átʼée dago doo łahgo átʼéego tsíńdíkees da.Yee haadzíʼígíí lá íidoolíił ni.Doodaiiʼ yee haadzíiʼii lá nizhónígo yiʼdoolíił ni.
20 Jó, akʼidajishdliih doogo bee shichʼįʼ haʼoodzííʼ;akʼidzisdliʼígíí doo łahgo áńdeeshdlíił da.
21 Jéíkab dineʼé hachʼįʼ doo ákwii átʼéii tʼah doo ánéeh da,doodaiiʼ hodílgizgo áhólzinii Ízrel dineʼé bitahgi doo łaʼ yooʼı̨́į da.Bóhólníihii haDiyin God hoł hólǫ́,áádóó hatahgóó aláahgo naatʼáanii baa haʼniihii bee nahoʼdighaash.
22 Diyin God éí Ííjip kéyahdę́ę́ʼ chʼééhoníʼeezh.Jó, béégashii ałchinii bideeʼ báhádzidii há nahalin.
23 Álíleego bee ééhózingo bee nahadláii doo bee Jéíkab dineʼé bikʼijįʼ ídlı̨́į da;binahjįʼ ił ééhodoozįįłgo nahagháii doo bee Ízrel dineʼé bikʼijįʼ ídlı̨́į da;díí hoolzhishdóó Jéíkab dineʼé áádóó Ízrel dineʼé baa yátiʼgo áhodidooʼniił,Haʼátʼíí lá yówééʼátʼéego Diyin God naashnish lá!
24 Shoo, dineʼé éí náshdóítsoh bitsiijįʼ ditłʼooii ayóó átʼéii nahalingo nídahididookah,áádóó náshdóíyáazhgi átʼéego nídahididookah,áko yił deezdéelii ałtso yoolghalgo áádóó yiyiisxínígíí bidił yoodlą́ąʼgo índa dínóotééł.
25 Áádóó Béílak éí Béílam ííłní, Tsʼídá doo bidíníídzįįł da. Tsʼídá doo bikʼijiidíídliił da.
26 Nidi Béílam haadzíiʼgo Béílak ííłní, Shą́ą́ʼ nił hweeshneʼgo ádíshní, Bóhólníihii ánínígíí tʼéiyá tʼáá átʼé biʼdeeshłííł, dishníi niʼ?
27 Áko Béílak éí Béílam ánéidooʼniid, Nánooshkąąh, hágo, náánáłahdę́ęʼgo nił anáádeeshtʼashgo Diyin God bił yáʼátʼéehgo éí áádę́ęʼgo shá bidíníídzįįł.
28 Áko Dził Píyor bighą́ą́ʼgóó Béílak éí Béílam yił náánátʼáázh; éí áádóó Jiisháíman honoojíí góyaa ayootʼı̨́ı̨́ʼ.
29 Ákohgo Béílam éí Béílak ííłní, Kweʼé bikááʼ nááʼiiniihí tsostsʼidgo shá ádíílííł, índa dóola yázhí tsostsʼidgo áádóó deenástsʼaaʼ tsostsʼidgo kweʼé shá hashtʼedíílííł.
30 Áádóó Béílam ádííniidígíí bikʼehgo Béílak ádzaa; éí dóola yázhí índa deenástsʼaaʼ éí bikááʼ nááʼiiniihí tʼáá ałtso yikʼeh nítı̨́įgo nááyiyiisniiʼ.
