Numbers 24:1-25
24 Áko Béílam éí Bóhólníihii bił hózhǫ́ǫgo Ízrel dineʼé yikʼiizhdoodliiłígíí yaa ákoniizı̨́ı̨́ʼ; átséédą́ą́ʼ biniyé ałnáájídáhígíí álíleego bee ééhózingo bee nahadláii tʼáadoo bíkajiyáa da, nidi tʼóó honoojíijigo jidééʼı̨́ı̨́ʼ.
2 Nítʼééʼ Béílam hajííghalgo Ízrel bidineʼé danilínígíí bikʼehgo dabiníbaal yiiʼ dabighango dziiłtsą́, áko Diyin God biNíłchʼi hakʼi hooleʼ.
3 Áádóó haneʼ bee akʼidiʼdootı̨́įłii baa ahozhniilneʼgo ájíní,
Bíyor biyeʼ Béílam kódííniid;bił ééhózingo ooʼíinii ání:
4 kóní, Diyin God bizaad yidiiztsʼą́ąʼii éí Aláahgo Ayóóʼábóodziilii bił ádzaago yiyiiłtsą́ągo niʼjįʼ íítłizh, nidi tʼáá yiníłʼı̨́:
5 Jéíkab dineʼé nohłíinii, dooládóʼ nihiníbaal danizhóní da;Ízrel dineʼé nohłíinii, dooládóʼ nihighan nizhóní da!
6 Téehgi átʼéego índa tooh nílı̨́ bibąąhgóó dádaʼakʼehígi átʼéego,Bóhólníihii éí álooz naazkaadii kʼeiidííláigi átʼéego,índa tábąąhgóó gad yílʼáhígi átʼéego kʼeeʼąą nídeelʼá.
7 Bidaʼásaaʼ biiʼdóó tó wóʼą yííłı̨́į doo índa tʼóó ahayóí tooh danílínígíí bibąąhgóó baʼáłchíní náás ahoolchíiłii kéédahatʼı̨́į doo.Aláahgo binanitʼaʼí éí Éígag aláahgo naatʼáanii nilíinii yiláahgo ayóó átʼée doo,índa bibee óhólníihgo bił hazʼáanii tsʼídá ayóó átʼéego hazʼą́ą doo.
8 Diyin God éí Ííjip kéyahdę́ę́ʼ chʼééhoníʼeezh; jó, béégashii ałchinii bideeʼ báhádzidii há nahalin;ałʼąą dineʼé hweʼanaʼí danilíinii ałtso íidoołdįįł,índa dabitsʼin niidiyootih,áádóó bikʼaaʼ yee yigházdiyoołtʼoh.
9 Náshdóítsoh bitsiijįʼ ditłʼooígíí ayóó átʼéegi átʼéego sitı̨́,áádóó náshdóítsoh átʼéhígi átʼéego háishąʼ nábididoołtʼeeł?Tʼáá háiida nikʼijidlíii bikʼihojidlíi doo, índa tʼáá háiida hóyéeʼgo ná haadzíiʼii hóyéeʼgo bá haʼdoodzih.
Béílam áhodooníiłii yaa hoolneʼ
10 Áko Béílak éí Béílam yichʼįʼ báhóóchįįdgo bílaʼ yee ahíideezkadgo Béílam ííłní, Shiʼanaʼí bidíníídzįįł biniyé níká iʼííłʼaʼ; shoo, díí táadi tʼóó bikʼijiisínídliid.
11 Éí bąą kʼad nílááh, náálwoł; jó, ayóó átʼéego ił nílı̨́įgo ándeeshłííł nisin nítʼééʼ, nidi ił ídlı̨́ bitsʼą́ąjįʼ Bóhólníihii tʼą́ą́ʼ ánóhsin nítʼééʼ.
12 Ákohgo Béílam éí Béílak áyidííniid, Shą́ą́ʼ, ná haneʼ nideiʼáhí shichʼįʼ ííníłʼaʼ yę́ę kóbidííniid niʼ.
13 Azhą́ béésh łigaii áádóó óola éí Béílak bikin biiʼ hadeezbingo sheideeʼaah nidi, Bóhólníihii yee haadzíiʼii bilááhgóó tʼáá shí shíniikʼeh yáʼátʼéehgi, doodaiiʼ doo yáʼátʼéehgi ádeeshníłígíí doo bíneeshʼą́ą da; Bóhólníihii yee haadzíʼígíí tʼéiyá bee hadeesdzih.
14 Jó, kʼad shidineʼé bichʼįʼ déyá; hágo, díí bee nił chʼíhonishʼaah: beiníłką́ądi díí dineʼé éí nidineʼé kódeidoolííł.
15 Áádóó Béílam éí haneʼ bee akʼidiʼdootı̨́įłii yaa áhoʼniilneʼgo ání,
Bíyor biyeʼ Béílam kódííniid;bił ééhózingo ooʼíinii ání,
16 kóní, Diyin God bizaad yidiitsʼaʼii áádóó Aláahgo Ayóóʼátʼéii bitsʼą́ą́dóó ił ééhózin bił bééhózinii índa Aláahgo Ayóóʼábóodziilii ił ádzaii yiníłʼíinii niʼjįʼ íítłizh, nidi tʼáá yiníłʼı̨́:
17 Yiideestsééł, nidi kʼad éí dooda; dínéeshʼįįł, nidi áyídíjįʼ éí dooda; Jéíkab dineʼé bitsʼą́ą́dóó Sǫʼ hadoogááłínda Ízrel dineʼé bitsʼą́ą́dóó Naatʼá Gish hahodooleeł;éí tʼáá ałchʼishjí Móʼab dineʼé atíidoolííł áádóó Sheth dineʼé tʼáá ałtso iidoołdįįł.
18 Íídam dineʼé áádóó bikéyah Síyer hoolyéegi hwedaʼanaʼí bííʼ dazhdooleeł,nidi Ízrel dineʼé éí tsʼídá doo nídanilyées da doo.
19 Jéíkab dineʼé bitsʼą́ą́dóó bóhólníih dooleełii hahodooleeł;kin haalʼáagi dadzidziihígíí áhodiʼdooldįįł.
20 Ákohgo Ámalek dineʼé yichʼįʼgo náádéétʼı̨́įʼgo haneʼ bee akʼidiʼdootı̨́įłii yaa nááhálneʼgo ání,
Ałʼąą dineʼé bitahdóó Ámalek dineʼé dajílíinii hó alą́ąjįʼ tsʼídá bidziilgo dah jookah nítʼééʼ,nidi nihoolzhíishdi hoolʼáágóó áhodiʼdooldįįł.
21 Áádóó Kííni dineʼé yichʼįʼgo náádéétʼı̨́įʼgo haneʼ bee akʼidiʼdootı̨́įłii yaa nááhálneʼgo ání,
Kééhótʼı̨́įgi nihoníłdzil ni,índa tsétáhtʼahgi nitʼoh dah síníʼą́.
22 Ákótʼée nidi Ásher dineʼé yisnááh ániilaago adanizlóozjįʼ Kííni dineʼé éí tʼáadoo nídoodleełí da.
23 Áádóó Béílam éí haneʼ bee akʼidiʼdootı̨́įłii yaa nááhalneʼgo ání,
Yíiyáhą́ą Diyin God díí yaa nídiidzáago háísh hináa doo?
24 Nidi Kítim tábąąhdę́ę́ʼ tsinaaʼeeł nihidooʼołgo Ásher dineʼé áádóó Ííber dineʼé yichʼįʼ nahodiyoołnaał,áko hó ałdóʼ hoolʼáágóó áhodiʼdooldįįł.
25 Ákohgo Béílam nídiiʼnaʼgo tʼáá bí bighangóó anáádzá; Béílak ałdóʼ dah nídiidzá.
