Numbers 25:1-18
25 Shíttimgi Ízrel dineʼé kééhatʼı̨́įgo Móʼab dineʼé bitsiʼké yił ajił yaa nídiikai.
2 Móʼab dineʼé bidiyin dabidiʼníinii yichʼįʼ náádaʼiiłniihjįʼ Ízrel dineʼé hágo deiłníigo índa yił daʼayą́ągo áádóó bidiyin dabidiʼníinii yichʼįʼ yaa áńdaatʼįįhgo nidahałá.
3 Áko Ízrel dineʼé éí Béíyal-píyor idaʼalyaii yikééʼ dah diikai; éí bąą Bóhólníihii éí Ízrel dineʼé yichʼįʼ báhóóchįįd.
4 Áádóó Bóhólníihii éí Mózes ííłní, Diné bitahdóó hastóí aląąjįʼ naazíinii tʼáá ałtso éí Bóhólníihii binááł shą́ąʼjįʼ dahidiinííł, áko Bóhólníihii tʼóó báhádzidgo yee bánáháchįįhígíí Ízrel dineʼé bitsʼą́ąjįʼ kónídooʼnííł.
5 Áko Mózes éí Ízrel dineʼé yá ándahodiiʼaahii ííłní, Nihidineʼé bitahdóó Béíyal-píyor idaʼalyaii yikééʼ dah dahidiikaígíí tʼáá ałtso nidaałtseed.
6 Shoo, Ízrel dineʼé łaʼ níyáago Mídiyan dineʼé asdzání léiʼ éí Mózes áádóó Ízrel dineʼé dah yinéłígíí tʼáá ałtso binááł hakʼisóó bitahjįʼ bił yah ajííʼáázh; jó, Ízrel dineʼé éí níbaal biiʼ dahozdísinii bichʼéédą́ąʼgi daacha.
7 Áko Eliyéízar biyeʼ Fíniyas éí Éran nááʼiiłniihii nilı̨́ı̨́ nítʼééʼ yę́ę binálí díí yiyiiłtsą́ągo dah oonééłdóó dah diiyáago tsiidétáán néidiitą́.
8 Áko Ízrel diné áádóó Mídiyan dineʼé asdzání bikééʼ níbaal góneʼ yah ajoolwodgo tʼáá áłah bitsą́ʼniiʼ góneʼ yigháʼníłgeed. Kódzaago Ízrel dineʼé éí naałniih bitsʼáldoh.
9 Áko naałniih dahóóghą́ʼígíí naadiin dı̨́įdi mííl ázhnéelą́ą́ʼ.
10 Áádóó Bóhólníihii éí Mózes ííłní,
11 Eliyéízar biyeʼ Fíniyas éí Éran nááʼiiłniihii nilı̨́ı̨́ nítʼééʼ yę́ę binálí Ízrel dineʼé baa łeʼnisinígi átʼéego łeʼnízingo sháhóóchįįdígíí Ízrel dineʼé yitsʼą́ąjįʼ kóyiilaa, áko baa łeʼnisingo ábiʼniiłdįįdígíí tʼáadoo atíshłaa da.
12 Éí bąą shá kódidííniił, Jó, hózhǫ́ǫ́jí bee ahaʼdeetʼą́ baa diníʼą́.
13 Áko bí doo, índa baʼáłchíní náás ahoolchííłgóó ałdóʼ daabí doo; náádaʼiiłniihii bibee ahaʼdeetʼáanii hoolʼáágóó daabí doo, háálá biDiyin God yá łeʼnízingo Ízrel dineʼé yá kʼééhásdǫǫd.
14 Ízrel dinéhígíí éí Mídiyan dineʼé asdzání nilíinii bił nahoʼdiztseed yę́ę éí Zímrai joolyéego éí Símiyan dineʼé bizhéʼé yę́ę bitsʼą́ą́dóó náás ahoolchíiłii Séílu aląąjįʼ sizíinii biyeʼ jílı̨́ı̨́ nítʼééʼ.
15 Índa Mídiyan dineʼé asdzání biʼdiisyínígíí éí Kázbai wolyéego éí Mídiyan dineʼé bizhéʼé yę́ę bitsʼą́ą́dóó náás ahoolchíiłii łaʼ Zer aląąjįʼ sizíinii yitsiʼ nilı̨́ı̨́ nítʼééʼ.
16 Áádóó Bóhólníihii éí Mózes ííłní,
17 Mídiyan dineʼé bichʼįʼ nidahoyołnáago nidaałtseed,
18 háálá bindahagiz yee nihichʼįʼ nidahwiiłnáá nítʼééʼ; éí Píyor bichʼįʼ nahadláhígíí índa Mídiyan dineʼé bilah Kázbai wolyéii biniinaa nihidaʼdeezloʼ; éí Mídiyan dineʼé yá aląąjįʼ sizíinii yitsiʼ nilı̨́ı̨́ nítʼééʼ; Píyor bichʼįʼ nahadláii biniinaa naałniih níłniiʼ bijı̨́ı̨́dą́ą́ʼ biʼdiisyı̨́.
