Numbers 27:1-23
27 Nítʼééʼ Jóseph biyeʼ Manáseh baʼáłchíní náás ahoolchíiłii Méíkir éí Manáseh biyeʼ, Gíliyad éí Méíkir biyeʼ, Híífer éí Gíliyad biyeʼ, Ziilófehad éí Híífer biyeʼ, éí Ziilófehad bitsiʼké yíkai; éí bitsiʼké kódaolyé: Mála, Nóah, Hágla, Mílka índa Térza.
2 Áko éí níbaal biiʼ dahozdísinii bichʼéédą́ąʼgi Mózes áádóó nááʼiiłniihii Eliyéízar áádóó naatʼáanii danilíinii índa dah oonéłígíí tʼáá ałtso yidááhdóó niikaigo ádaaní,
3 Nihizhéʼé yę́ę honoojíidi ádin; éí Kórah yił ahíikaigo Bóhólníihii yichʼįʼ nidaalteeh nítʼéʼígíí doo yił naakai da nítʼééʼ, nidi tʼáá bí ádił niʼiisíihgo daaztsą́, áko biyeʼké éí tʼáadoo hazlı̨́įʼ da.
4 Haʼátʼíísh biniyé nihizhéʼé yę́ę biyeʼké tʼáadoo hazlı̨́ʼígíí biniinaa dabikʼis bitahdóó bízhiʼ doo bééhodoozįįł da? Éí bąą nihizhéʼé yę́ę dabikʼis bitahdóó kéyah nihííʼ dooígíí łaʼ nihaa dinohʼaah.
5 Kótʼéego Mózes éí díí yaa nídaatʼínígíí Bóhólníihii baazhdiníʼą́.
6 Áko Bóhólníihii éí Mózes yichʼįʼ haadzíiʼgo ííłní,
7 Ziilófehad bitsiʼké tʼáá aaníígóó hadaasdzííʼ; tʼáá aaníí bizhéʼé yę́ę bikʼis bitahdóó kéyah daahóóʼ dooígíí hataadidííʼaał, áko bizhéʼé yę́ę bikéyah baa dadidííʼááł.
8 Áádóó Ízrel dineʼé bichʼįʼ hadíídzihgo kóbididííniił, Diné łaʼ biyeʼ tʼáadoo hazlı̨́ı̨́ʼgóó bí daaztsą́ągo bikéyah bitsiʼké bííʼ nidahaleehgo ádaałeʼ doo.
9 Nidi bitsiʼ tʼáadoo hazlı̨́ı̨́ʼgóó éí bikʼisóó bííʼ dooleełgo baa dahidohʼaah doo.
10 Bikʼisóó ałdóʼ doo hólǫ́ǫ́góó bizhéʼé yázhí bííʼ dooleełgo baa dahidohʼaah doo.
11 Nidi bizhéʼé yázhí doo łaʼ hólǫ́ǫ́góogo éí tʼáá hakʼéí nilínígíí łaʼ kéyah bííʼ dooleeł, áko Ízrel dineʼé bichʼįʼ yee nihoníʼáanii bee nihodiitʼaah doogo Bóhólníihii éí Mózes yichʼįʼ yee haadzííʼ.
Mózes á dzizı̨́ı̨́ nítʼééʼ yę́ęjįʼ Jáshowa adoogááł biniyé nizhníłtı̨́ (Deut. 31:1-8)
12 Áádóó Bóhólníihii éí Mózes ííłní, Nílááh, díí Dził Ábarim góde hasínáahgo kéyah éí Ízrel dineʼé baa diníʼánígíí dínííłʼįįł.
13 Áko nííníłʼı̨́įʼgo tʼáá nikʼis Éran anábiʼdooltínígi átʼéego ni ałdóʼ nidineʼé daazlı̨́ʼígóó ándiʼdoolnííł.
14 Háálá honoojí Zin hoolyéegi dah oonéłígíí saad dahółǫ́ yę́ędą́ą́ʼ shibikʼeh óʼooʼníiłii bikʼijįʼ níínílteeʼ; tóogi dabinááł tsʼídá dinishyingo áshíínísin doo nítʼééʼ; éí Méribah tóodi Kéídesh nahósʼaʼ Zin honoojíigi áhóótʼįįd.
15 Ákohgo Mózes éí Bóhólníihii yichʼįʼ haadzíiʼgo ání,
16 Bíniʼ Bóhólníihii éí nihokááʼ dineʼé tʼáá ałtso biníłchʼi yiDiyin God nilíinii diné łaʼ dah oonéłígíí yá sizı̨́įgo íidoolííł;
17 éí yá chʼénádáah doo índa yilą́ąjįʼ yah anáhádáahgo yooʼish doo índa yah anáyiiʼéesh doo, áko éí Bóhólníihii bitsʼą́ą́dóó dah oonéłígíí doo dibé yaa áhályáanii bee ádinígíigi ádaatʼée da doo.
18 Áko Bóhólníihii éí Mózes ííłní, Nan biyeʼ Jáshowa bił nídiitʼaash; éí yáʼátʼéehgo diné biiʼ honítʼiʼii bikʼi dah didíílnihgo
19 nááʼiiłniihii Eliyéízar áádóó dah oonéłígíí tʼáá ałtso bidááhdóó bił nidííʼash, áko tʼáá dabinááł bee óhólnííh baa díísįįł.
20 Áádóó bee níhólníhígíí bąąh nidíílééł, áko Ízrel dineʼé dah yinéłígíí tʼáá ałtso bikʼeh dahółʼı̨́į doo.
21 Áádóó nááʼiiłniihii Eliyéízar wolyéii yidááhdóó néidzįįhgo, áko há naʼakʼíyáłtiʼgo Yúrim bibee nihodiitʼaahii há bee Bóhólníihii binááł há naʼídíkid doo, áko éí bikʼehgo Jáshowa áádóó Ízrel dineʼé dah yinéłígíí tʼáá ałtso hazaad kʼehgo chʼénákah doo índa yah anákah doo.
22 Ákohgo Mózes éí Bóhólníihii áhodííniidígíí biʼjiilaa; Jáshowa bił nízhdiitʼáazhgo nááʼiiłniihii Eliyéízar áádóó dah oonéłígíí tʼáá ałtso bidááhdóó bił nizhníʼáázh,
23 áádóó Jáshowa bikʼi dasdeesʼniiʼgo binaanish dooleełígíí baa dadzisįįdgo Mózes hwee Bóhólníihii yee haadzíʼígíí ájiilaa.
