Numbers 28:1-31
28 Áádóó Bóhólníihii éí Mózes yichʼįʼ haadzíiʼgo ííłní,
2 Ízrel dineʼé bichʼįʼ bee nihoníʼaahgo kóbidiní, Shinááhániihii éí chʼiyáán shichʼįʼ didlidgo łikání halchingo nááhíłniih doo, áko díí baa nídahwiilzhíísh góneʼ áńdaałʼįįhgo shichʼįʼ náádahołniih doo.
3 Índa kódabididííniił, Díí didlidgo nááhániihii éí Bóhólníihii bichʼįʼ náádahołniih dooleełígíí éí dibé yázhí naakigo łaʼ binááhaaí hadaałtʼéii tʼáá ákwíí jı̨́ áłahjįʼ didlidgo náádahołniih doo.
4 Abínígo dibé yázhí łaʼ náádahołniih doo; łaʼígíí éí eʼeʼáahgo náádahołniih doo;
5 ómer bee íʼneelʼąąhí bee akʼáán tʼááłáhídi haaką́ągo éí kwáart bee íʼneelʼąąhí áníłtsooígíí bíighahgo bee akʼah níkʼíbíʼneeshtłishii haaką́ągo bił ałtahgo akʼáán náádahołniih doo.
6 Áko díí tʼáá ákwíí jı̨́ didlidgo nááʼiiniihii átʼé; éí Dził Sáínaidi bee nihootʼáanii éí łikání halchingo Bóhólníihii bichʼįʼ didlidgo nááhániih doo biniyé átʼé.
7 Índa yanáadziʼgo nááhániihii éí kwáart bee íʼneelʼąąhí bee wáin tʼááłáhídi haaką́ągo dibé yázhí tʼááłáʼígo bił náádahołniih doo; hodiyingo hazʼą́ągi wáin bidziilii yanáadziʼgo nááhániihii Bóhólníihii bichʼįʼ náádahołniih doo.
8 Áádóó dibé yázhí łaʼígíí éí eʼeʼáahgo náádahołniih doo; abínígo akʼáán nááhániihígi átʼéego índa yanáadziʼgo nááhániihígi átʼéego náádahołniihgo Bóhólníihii bichʼįʼ didlidgo łikání halchingo nááhániihii átʼée doo.
Hááʼáyı̨́ı̨́h jı̨́ áádóó náhidizíidgo náádahaniihii
9 Áko hááʼáyı̨́ı̨́h jı̨́ı̨́ góneʼ éí dibé yázhí naakigo łaʼ binááhaaí hadaałtʼéii éí ómer bee íʼneelʼąąhí bee akʼáán naakidi haaką́ągo akʼah bił ałtahgo áádóó yanáadziʼgo nááhániihii tʼáá bił ahóóltąʼgo náádahołniih doo.
10 Díí éí hááʼáyı̨́ı̨́h jı̨́ náʼádleeh bikʼeh didlidgo nááhániihii ádaatʼéego ałdóʼ náádahołniih doo; łaʼ éí tʼáá ákwíí jı̨́ didlidgo nááhániih dooígíí índa yanáadziʼgo nááhániih dooígíí óóltąʼ dooleeł.
11 Tʼáá nínádíziʼ bikʼeh łaʼa jı̨́ı̨́ góneʼ náádaʼayoołniihgo didlidgo nááhániihii Bóhólníihii bichʼįʼ náádahołniih dooígíí éí dóola yázhí naakigo, deenástsʼaaʼ tʼááłáʼígo índa dibé yázhí tsostsʼidgo łaʼ béédááhaii hadaałtʼéii
12 índa ómer bee íʼneelʼąąhí bee akʼáán táadi haaką́ągo akʼah bił ałtahgo akʼáán nááhidoonihii átʼéego dóola yázhí łaʼ bóóltąʼgo bił náádahołniih doo, áádóó ómer bee íʼneelʼąąhí bee akʼáán naakidi haaką́ągo akʼah bił ałtahgo akʼáán náhidoonihii átʼéego deenástsʼaaʼ bóóltąʼgo náádahołniih doo,
13 áádóó ómer bee íʼneelʼąąhí bee akʼáán tʼááłáhídi hahakaahgo akʼah bił ałtahgo akʼáán nááhániihii átʼéego dibé yázhí bikʼeh nítı̨́įgo bił didlidgo nááhániihii łikání halchinii átʼéego Bóhólníihii bichʼįʼ didlidgo náádahołniih doo.
14 Áádóó yanáadziʼgo nááhániihii éí kwáart bee íʼneelʼąąhí bee wáin naakidi haaką́ągo dóola yázhí łaʼ bóóltąʼgo, áádóó kwáart bitisígo bee íʼneelʼąąhí ánéeltʼeʼígíí bee wáin haaką́ągo deenástsʼaaʼ bóóltąʼgo índa kwáart bee íʼneelʼąąhí bee wáin tʼááłáhídi haaką́ągo dibé yázhí bikʼeh nítı̨́įgo náádahołniih doo, áko díí éí nináháhááh biiʼ tʼáá nínádíziʼ bikʼeh didlidgo náádahołniih doo.
15 Áádóó tłʼízíchǫǫh tʼááłáʼígo ádił niʼiidzííhjí nááhániihii átʼéego ałdóʼ Bóhólníihii bichʼįʼ náádahołniih doo. Łaʼ éí tʼáá ákwíí jı̨́ didlidgo nááhániih dooígíí índa yanáadziʼgo nááhániih dooígíí óóltąʼ dooleeł.
Hodílzingo áłah náʼádleeh nídeitʼaahgo náádahaniihii (Lev. 23:1-44)
16 Átsé nídízííd binih dı̨́ı̨́ʼtsʼáadah yoołkááł góneʼ Bóhólníihii biʼatisʼadeesdzáii bee bééhániihii átʼée doo.
17 Tʼáá díí yiziłígíí biiʼ ashdlaʼáadah yoołkááł góneʼ hodílzingo áłah náʼádleeh néiitʼaah doo; éí dííkʼǫsh tʼáágééd bááh ályaii tsostsʼid yiską́ąjįʼ nídaahdı̨́įh doo.
18 Hahóóyá bijı̨́ dahodíínóhsingo áłah náhdleeh doo; éí bijı̨́ tsʼídá doo ninádaołnish da doo,
19 nidi náádaʼayołniihgo náádahidoołnihii dadohłidgo didlidgo nááhániihii átʼéego Bóhólníihii bichʼįʼ náádahołniih dooígíí éí dóola yázhí naakigo, deenástsʼaaʼ tʼááłáʼígo, dibé yázhí tsostsʼidgo łaʼ béédááhaii dabikąʼii hadaałtʼéii,
20 áádóó akʼáán nááhániihii átʼéego ómer bee íʼneelʼąąhí bee akʼáán táadi haaką́ągo akʼah bił ałtahgo dóola yázhí łaʼ bóóltąʼgo, akʼáán naakidi haaką́ągo deenástsʼaaʼ bóóltąʼgo,
21 índa akʼáán tʼááłáhídi hahakaahgo dibé yázhí tsostsʼidígíí bikʼeh nítı̨́įgo bił náádahołniih doo,
22 áádóó tłʼízíchǫǫh tʼááłáʼígo éí ádił niʼiidzííhjí nááhániihii átʼéego éí bee nihá kʼééhoodǫǫł doo.
23 Áko díí didlidgo nááhániihii náádahidoołnihígíí éí abínígo nááhániihii átʼéego óóltąʼ dooleeł.
24 Kótʼéego tʼáá ákwíí jı̨́ tsostsʼid yiską́ąjįʼ akʼáán didlidgo nááhániihii Bóhólníihii bichʼįʼ łikání halchingo náádahołniih doo. Náádahidoonihii áłahjįʼ didlidgo nááhániihii áádóó yanáadziʼgo nááhániihii óóltąʼgo náádahołniih doo.
25 Tsostsʼid yiską́ą́ góneʼ éí dahodíínóhsingo áłah náhdleeh doo; éí bijı̨́ doo nidoołnish da.
26 Tsostsʼidi nihee damı̨́įgo daʼazlı̨́ı̨́ʼdóó bikʼijįʼ tłʼoh naadą́ą́ʼ átsé dantʼı̨́hígíí bijı̨́ı̨́ góneʼ akʼáán ániidíii Bóhólníihii bichʼįʼ náádahołniihgo dahodíínóhsingo áłah náhdleeh doo; ákóneʼ doo nidoołnish da.
27 Náádaʼayołniihgo didlidgo nááhániihii łikání halchingo Bóhólníihii bichʼįʼ náádahołniih dooígíí éí dóola yázhí naakigo, deenástsʼaaʼ tʼááłáʼígo índa dibé yázhí tsostsʼidgo łaʼ béédááhaii dabikąʼígíí,
28 áádóó akʼáán nááhániihii átʼéego ómer bee íʼneelʼąąhí bee akʼáán táadi haaką́ągo akʼah bił ałtahgo dóola yázhí bóóltąʼgo, akʼáán naakidi haaką́ągo deenástsʼaaʼ bóóltąʼgo,
29 índa akʼáán tʼááłáhídi hahakaahgo dibé yázhí tsostsʼidígíí bikʼeh nítı̨́įgo bił náádahołniih doo,
30 áádóó tłʼízíchǫǫh tʼááłáʼígo éí ádił niʼiidzííhjí nááhániihii átʼéego éí bee nihá kʼééhoodǫǫł doo.
31 Díí náádahidoołnihígíí éí áłahjįʼ didlidgo nááhániihii áádóó akʼáán nááhániihii, (alı̨́ı̨́ʼ hadaałtʼéii nááhániihii óóltąʼgo) índa yanáadziʼgo nááhániihii náádahołniih doo.