Numbers 30:1-16
30 Áko Mózes éí Ízrel dineʼé yiląąjįʼ naazíinii yichʼįʼ haadzíiʼgo ání, Díí kótʼéego Bóhólníihii nihichʼįʼ haadzííʼ:
2 Diné łaʼ Bóhólníihii yichʼįʼ ádee hadoodzíiʼgo, doodaiiʼ yee nihoníʼáanii yee ádee hadoodzíiʼgo biiʼ sizíinii yá nihodiníʼą́ągo, yá nihodiníʼánígíí bizaad doo ałtah ánáyoodlíił da; yee haadzíʼígíí tʼáá átʼé bikʼehgo yeʼełʼı̨́į doo.
3 Nááʼáłdóʼ asdzání łaʼ éí Bóhólníihii yichʼįʼ ádee hadoodzíiʼgo, doodaiiʼ ániid naaghá yę́ędą́ą́ʼ bizhéʼé tʼah yił bighango tʼáá bí ádá nihodiníʼą́ągo
4 yee ádee hadoodzíʼígíí áádóó yee ádá nihodiníʼánígíí bizhéʼé yiyííniiʼgo tʼóó déesxéelgo éí yee ádee hadoodzíʼígíí tʼáá átʼé áádóó yee ádá nihodiníʼánígíí tʼáá átʼé biʼdzósin doo.
5 Nidi hazhéʼé haa hodiiztsʼą́ą́ʼ bijı̨́ı̨́ góneʼ ádee hadzoodzíʼígíí, doodaiiʼ ádá nihozhdiníʼánígíí doo há yinízingóó, éí doo bizhdoolíił da, áko Bóhólníihii há nahjįʼ ninéididooʼááł, háálá hazhéʼé doo há yinízin da.
6 Áko hahastiin hólǫ́ǫgo ádee hadzoodzíiʼgo, doodaiiʼ tʼáá hó hazaad bee ádá nihozhdiníʼą́ągo
7 nítʼééʼ hahastiin haa hodiiztsʼą́ą́ʼ bijı̨́ı̨́ góneʼ tʼóó déesxéelgo éí bee ádee hazdoodzíʼígíí áádóó bee ádá nihozhdiníʼánígíí biʼdzósin doo.
8 Nidi hahastiin haa hodiiztsʼą́ą́ʼ bijı̨́ı̨́ góneʼ doo há yinízingóó éí bee ádee hazdoodzíʼígíí índa tʼáá hó hazaad bee ádá nihozhdiníʼánígíí doo ílı̨́ı̨́góó íidoolííł, áádóó Bóhólníihii éí há yóóʼanéididooʼááł.
9 Nidi asdzání bąąh áhásdįįdii ádee haadzíʼígíí tʼáá átʼé, doodaiiʼ asdzání bahastiin yóóʼabidííʼáanii ádee hadoodzíʼígíí tʼáá átʼé biiʼ sizíinii ádá nihodiníʼą́ągo yiʼósin doo.
10 Asdzání hahastiin bighangi ádee hazdoodzíiʼgo, doodaiiʼ hwiiʼ sizíinii ádá nihodiníʼą́ągo
11 hahastiin haa hodiiztsʼą́ąʼgo tʼóó hachʼįʼ déesxéelgo áádóó doo nidi dooda hałníígóó éí bee ádee hazdoodzíʼígíí tʼáá átʼé, doodaiiʼ bee ádá nihozhdiníʼánígíí tʼáá átʼé biʼdzósin doo.
12 Nidi hahastiin haa hodiiztsʼą́ą́ʼ bijı̨́ı̨́ góneʼ tʼáá hó hazaad bee ádee hazdoodzíʼígíí, doodaiiʼ hwiiʼ sizíinii ádá nihodiníʼánígíí doo ílı̨́ı̨́góó áyiilaago doo biʼdzósin da doo;
13 tʼáá bee ádee hazdoodzíʼígíí, doodaiiʼ tʼáá bee ádá nihozhdiníʼánígíí hwiiʼ sizíinii aʼohgo íʼdólzin ájiiłʼįįhgo hahastiin éí há bohoníłdzilgo íidoolííł, doodaiiʼ doo ílı̨́ı̨́góó íidoolííł.
14 Nidi hahastiin doo áháłnínígóó iʼiiʼaahgo éí bee ádee hazdoodzíʼígíí, doodaiiʼ éí bee ádá nihozhdiníʼáanii tʼáá átʼé há chánahgo íidoolííł, háálá tʼáá éí bijı̨́ haa hodiiztsʼą́ą́ʼ yę́ędą́ą́ʼ tʼáadoo áhodííniidí da.
15 Ákondi haa hodiiztsʼą́ą́ʼdóó bikʼijįʼ índa doo ílı̨́ı̨́góó áyiilaago éí tʼáá bí asdzání doo ákwii áátʼįįdii yá ninádootłish.
16 Díí éí yee nihwiizʼáanii Bóhólníihii éí Mózes yichʼįʼ yee haadzíiʼii átʼé; diné áádóó beʼasdzą́ą́ bitaʼgi índa azhéʼé bitsiʼ ániid naagháii tʼah yił bighango bitaʼgi bá yee nihwiizʼáanii átʼé.