Numbers 31:1-54
31 Áádóó Bóhólníihii éí Mózes yichʼįʼ haadzíiʼgo ííłní,
2 Ízrel dineʼé bá Mídiyan dineʼé kʼéédidíídlííł áádóó bikʼijįʼ índa danikʼéí yę́ę aheeskaigóó dííleeł.
3 Áko Mózes éí diné yichʼįʼ haadzíiʼgo ání, Nihitahdóó łaʼ anaaʼ biniyé hashtʼeʼádadidoołníiłgo bíniʼ Mídiyan dineʼé yichʼįʼ nídahididoobahgo Bóhólníihii yá kʼéédeididoodlííł.
4 Ízrel dineʼé danilíinii tʼáá ałtso bitahdę́ę́ʼ tʼááłáhídi mííl ádanéelą́ąʼgo anaaʼgóó bidadiʼyoołnih.
5 Áko Ízrel dineʼé tʼóó ahayóí daamiilgo bitsʼą́ą́dóó tʼááłáhídi míilgo bitsʼáhaasʼnil; tʼáá ałtsogo naakitsʼáadadi míilgo anaaʼ yiniyé hashtʼeʼádadiilyaa.
6 Ákohgo Mózes díí anaaʼgóó diné bidaʼdziisʼniiʼ; diné tʼáá ałtso bitahdę́ę́ʼ tʼááłáhídi mííl ádanéelą́ąʼgo nááʼiiłniihii Eliyéízar biyeʼ Fíniyas éí dadílyingo chodaoʼíinii áádóó béésh łigaii dilní bee áńdazhdiʼniih dooígíí yoojihgo bizhʼníłniiʼ.
7 Áko Mídiyan dineʼé bichʼįʼ anaaʼ dahodzisłı̨́ı̨́ʼ; Bóhólníihii éí Mózes yichʼįʼ yee haadzíiʼii bikʼehgo diné danilínígíí tʼáá ałtso nideistseed.
8 Mídiyan dineʼé aláahgo binanitʼaʼí danilíinii nideistseed; diné nidabiʼdiztseedígíí bitahdóó aláahgo naatʼáanii nideistseed; éí Íívai, Rííkem, Zer, Her índa Rííba daolyé; Bíyor biyeʼ Béílam ałdóʼ diltłish yee dayiisxı̨́.
9 Ízrel dineʼé éí Mídiyan dineʼé asdzání danilíinii tʼáá ałtso áádóó baʼáłchíní tʼáá bił yisnááh ádayiilaa; bibéégashii áádóó bidibé índa binaalyeʼéda deisná.
10 Bikin hadaasʼáhígi kéédahatʼı̨́ı̨́ nítʼééʼ yę́ęgóó áádóó bikin naazhjaaʼígíí tʼáá átʼé adeideeskʼą́ą́ʼ.
11 Áko Mídiyan dineʼé yę́ę dabinaalyeʼé tʼáá átʼé áádóó daasnánígíí tʼáá ałtso éí diné danilínígíí áádóó daʼalı̨́ʼígíí tʼáá bił dadzisná.
12 Áádóó deisnáanii áádóó yąąh daʼííghą́ąʼii índa dabinaalyeʼé éí Mózes áádóó nááʼiiłniihii Eliyéízar índa Ízrel dineʼé dah yinéełii éí Jériko kin haalʼáádóó Jórdan tooh haʼnaa Móʼab kéyah dzígaigi dah yinéełgo áadi yaa áłah ádayiilaa.
13 Áko Mózes áádóó nááʼiiłniihii Eliyéízar índa dah oonéełii binanitʼaʼí tʼáá ałtso éí níbaal haalʼá bitsʼáhwiiníʼą́ądi siláo bidááh jiiskai.
14 Ákohgo Mózes éí siláo dah deínéehii binanitʼaʼí danilíinii éí mííl daníjaaʼgo índa neeznádiin daníjaaʼgo yinanitʼaʼí danilíinii anaaʼdę́ę́ʼ náʼnánígíí yichʼįʼ báhóóchįįd.
15 Áko Mózes áhodííniid, Asdzáníísh tʼáá ałtso áá dah soohsįįd?
16 Shą́ą́ʼ, Píyor hoolyéedi Béílam binaʼnitin bikʼehgo díí asdzání éí Ízrel dineʼé danilíinii Bóhólníihii yichʼįʼ doo ákǫ́ǫ́ ádaatʼı̨́ı̨́góó ádayiilaa, áko Bóhólníihii bidineʼé naałniih bitah níłniiʼ.
17 Áko kʼad áłchíní bitahdóó ashiikéhígíí ałtso nidaałtseed áádóó asdzání éí diné hoł nídabiilkááh nítʼéʼígíí ałtso nidahołtseed.
18 Nidi atʼééké tʼahdoo diné yeinítʼįįhii tʼáá ałtso dahinánígíí éí danihííʼ doo.
19 Áádóó diné łaʼ soołhínígíí, doodaiiʼ atsʼíís daaztsą́ągo bíhidoohnáaʼii éí tsostsʼid yiską́ąjįʼ níbaal haalʼá bitsʼáhwiiníʼą́ądi nihighan doo, áko nihí áádóó yisnááh óołaaígíí biłgo tááʼ yiłkaah bijı̨́ áádóó tsostsʼid yiłkaah bijı̨́ diyingo ádadidoołdah.
20 Áko danihiʼééʼ tʼáá átʼé áádóó akágí bee ádaalyaii tʼáá átʼé áádóó tłʼízí bighaaʼ bee ádaalyaii tʼáá átʼé índa haʼátʼíhída tsin bee ádaalyaii tʼáá átʼé bąąh dahodoołdah.
21 Áádóó nááʼiiłniihii Eliyéízar éí diné nidaazbaaʼdę́ę́ʼ nákaígíí ííłní, Díí bee hazʼáanii bikʼehgo hoogáałii Bóhólníihii éí Mózes yichʼįʼ yee haadzííʼ;
22 óola, béésh łigaii, béésh łitsoii, béésh nitłʼizii, béésh kágí, béésh diłhı̨́įhii,
23 índa tʼáá haʼátʼíhída kǫʼ yídaníłdzilii tʼéiyá kǫʼ biih dadoohniłgo bidaʼdidoodah. Ákótʼée nidi tó tʼáá sahdii nideetʼáanii bee iʼdidéehii bikʼídadoołtah. Áádóó tʼáá haʼátíhída kǫʼ doo yídaníłdzilii éí tó bee iʼdidéehii biih dadoohnił.
24 Áko tsostsʼid yiską́ą́ góneʼ nihiʼééʼ dadoohgis, áko nihidaʼdeezdeeʼdóó bikʼijįʼ níbaal haalʼáajįʼ yah áńdoohkah.
Naalyeʼé ahááʼnil
25 Áádóó Bóhólníihii éí Mózes yichʼįʼ haadzíiʼgo ííłní,
26 Ni áádóó nááʼiiłniihii Eliyéízar índa dah oonéełgi azhéʼé á naazíinii éí daasnánígíí tʼáá ałtso diné danilínígíí áádóó daʼalı̨́ʼígíí tʼáá bił deídóołtah.
27 Áko daasnánígíí ahádadoohniłgo nidaazbaaʼígíí éí ałnííʼdóó baa dadoohnił áádóó łahjįʼígíí éí dah oonéłígíí baa dadoohnił.
28 Nidaazbaaʼii baa dahaasʼnilígíí bitsʼą́ą́dóó Bóhólníihii bichʼįʼ nályééh nideidiyooleełgo bichʼįʼ daałʼá; tʼáá haʼátʼíhída ashdladi neeznádiin ánéelą́ąʼgo bitsʼą́ą́dóó tʼááłáʼígo atsʼádahidoołtééł: éí bílaʼ ashdlaʼii nilíinii áádóó béégashii áádóó télii índa dibé.
29 Díí łaʼ ałnííʼdóó bitsʼą́ą́ʼ nídadidoohniłgo nááʼiiłniihii Eliyéízar baa dadoohniłgo éí Bóhólníihii yichʼįʼ yił dah nídiilnihgo néidiyoołnih.
30 Áádóó łahjįʼ ałnííʼdóó Ízrel dineʼé baa dahaasʼnilígíí tʼáá haʼátʼíhída ashdladiin ánéelą́ąʼgo bitsʼą́ą́dóó tʼááłáʼígo atsʼádahidoołtééł: éí bílaʼ ashdlaʼii nilíinii áádóó béégashii áádóó télii áádóó dibé índa daʼalı̨́ʼígíí tʼáá ałʼąą ádaatʼéii éí Líívai dineʼé Bóhólníihii biníbaal biiʼ hodílzinii yaa ádahalyáanii baa dadidoohʼááł.
31 Áko Mózes áádóó nááʼiiłniihii Eliyéízar, Bóhólníihii éí Mózes yichʼįʼ yee haadzíʼígíí bikʼehgo ádziidzaa.
32 Áko nidaazbaaʼii tʼáá haʼátʼíhída daasnáanii daadziihígíí éí dibé hastą́ądi neeznádiindóó baʼaan tsostsʼidiindóó baʼaan ashdladiindi miil ánéelą́ą́ʼ,
33 béégashii éí tsostsʼidiindóó baʼaan naakidi miil ánéelą́ą́ʼ,
34 télii éí hastą́diindóó baʼaan tʼááłáhídi miil ánéelą́ą́ʼ.
35 Chʼikéí éí tʼahdoo diné yeinítʼįįhii tádiindóó baʼaan naakidi miil ánéelą́ą́ʼ.
36 Tʼáá haʼátʼíhída daasnáanii ałnííʼdóó nidaazbaaʼii baa dahaasʼnilígíí éí dibé táadi neeznádiindóó baʼaan tádiindóó baʼaan tsostsʼidi mííldóó baʼaan ashdladi neeznádiin ánéelą́ą́ʼ,
37 áádóó dibé éí Bóhólníihii bichʼįʼ nályéhígíí éí hastą́ądi neeznádiindóó baʼaan tsostsʼidiindóó baʼaan ashdlaʼ ánéelą́ą́ʼ.
38 Béégashii éí tádiindóó baʼaan hastą́ądi miil ánéelą́ą́ʼ, áko Bóhólníihii bichʼįʼ nályéhígíí éí tsostsʼidiindóó baʼaan naaki lá.
39 Télii éí tádiindi mííldóó baʼaan ashdladi neeznádiin éí bitsʼą́ą́dóó Bóhólníihii bichʼįʼ nályéhígíí hastą́diindóó baʼaan tʼááłáʼí lá.
40 Dahoʼdisnáanii éí hastą́ʼáadahdi mííl, éí bitahdóó Bóhólníihii bichʼįʼ nályéhígíí éí tádiindóó baʼaan naaki lá.
41 Áko Mózes éí Bóhólníihii bichʼįʼ bił dah nídiʼdiilnihgo nááhániihii nályééh átʼéego nááʼiiłniihii Eliyéízar yeinínil; Bóhólníihii éí Mózes áyidííniidígíí yikʼehgo ádzaa.
42 Áádóó Ízrel dineʼé éí siláo nidaazbaaʼígíí deisnánígíí há ałnííʼdóó éí Mózes ałtsʼáyíínil,
43 (dah oonéłígíí ałnííʼdóó daabíhígíí éí dibé táadi neeznádiindóó baʼaan tádiindóó baʼaan tsostsʼidi mííldóó baʼaan ashdladi neeznádiin ánéelą́ą́ʼ,
44 béégashii éí tádiindóó baʼaan hastą́ądi miil ánéelą́ą́ʼ,
45 télii éí tádiindi mííldóó baʼaan ashdladi neeznádiin ánéelą́ą́ʼ,
46 dahoʼdisnáanii éí hastą́ʼáadahdi miil ázhnéelą́ą́ʼ,)
47 Ízrel dineʼé ałnííʼdóó bííʼ silı̨́ʼígíí éí dahoʼdisnáanii ashdladiin jiníjaaʼgo hatahdóó tʼáá dajíłáʼígo áádóó daʼalı̨́ʼígíí ashdladiin níjaaʼgo bitahdóó tʼáá daałáʼígo éí Mózes atsʼáyiiznilgo Líívai dineʼé danilíinii Bóhólníihii biníbaal biiʼ hodílzinii yaa ádahalyánígíí yeinínil. Áko Bóhólníihii éí Mózes áyidííniidígíí yikʼehgo ádzaa.
48 Áádóó miilgo siláo dah deínéehii binanitʼaʼí danilíinii éí daamííl daníjaaʼgo índa neeznádiin daníjaaʼgo yindantʼáii éí Mózes yaa daaskai.
49 Mózes yił dahoolneʼgo ádaaní, Ná nidaalʼaʼí niidlíinii nihiyaadóó siláo sinilii bee nihídahólníhígíí dayíiltaʼgo doo łaʼ bá hályáah da.
50 Bóhólníihii bichʼįʼ nááhániihii daniijaaʼgo diné łah hoditéhee nidayiizhjaaʼii yódí éí óola bee ádaalyaii, béésh daʼahólzhaʼii, látsínída, yoostsahda, jaatłʼóołda índa yooʼda éí Bóhólníihii binááł bee á kʼééhoodǫǫłii nihiiʼ naazíinii bá náádahidiilnih.
51 Áko Mózes áádóó nááʼiiłniihii Eliyéízar éí yódí óola bee ádaalyaii deizhjaaʼígíí tʼáá ałtso néidiinil.
52 Ákohgo miilgo daníjaaʼgo yindantʼáii índa neeznádiin daníjaaʼgo yindantʼáii éí Bóhólníihii bichʼįʼ nááhaazniiʼígíí éí óola tʼáá átʼé hastą́ʼáadahdi mííldóó baʼaan tsostsʼidi neeznádiindóó baʼaan ashdladiin shékel wolyéii dah hidiidloh.*
53 (Diné nidaazbaaʼígíí éí naalyeʼé deisnánígíí ádá ą́ą́deisįįd.)
54 Áko Mózes áádóó nááʼiiłniihii Eliyéízar éí miilgo siláo daníjaaʼgo yindantʼáii índa neeznádiingo siláo daníjaaʼgo yindantʼáii éí óola nidayiizhjaaʼígíí néidiinilgo níbaal biiʼ dahozdísinii góneʼ yah ayííjaaʼ; éí Bóhólníihii binááł Ízrel dineʼé danilíinii bá bee ééhániihii átʼée doo.
Footnotes
^ Éí dah hidiidlohígíí dı̨́įdi neeznádiindóó baʼaan náhástʼéítsʼáadah dah hidiidloh bíighah óolyé.
