Numbers 32:1-42
32 Rúben dineʼé áádóó Géed dineʼé baʼáłchíní bilı̨́ı̨́ʼ tʼóó adahayóí, áko Jéízer hoolyéedi áádóó Gíliyad hoolyéedi kéyah hadeideesʼı̨́ı̨́ʼ; jó, éí hazʼą́ągi nidaʼnilkaadígi leʼ áhootʼé.
2 Ákohgo Géed dineʼé áádóó Rúben dineʼé éí Mózes áádóó nááʼiiłniihii Eliyéízar índa dah oonéełii binanitʼaʼí danilíinii yaa yíkaigo ádeiłní,
3 Díí Átarath, Dáíban, Jéízer, Nímrah, Héshban, Ííliyéíleh, Shííbam, Nííbo índa Bíyan dahoolyéego kin dah naazhjaaʼígi,
4 éí keyáhgi Ízrel dineʼé dabinááł Bóhólníihii akʼeh deesdlı̨́ʼígi nidaʼnilkaadígi leʼ ádahootʼé, áko ná nidaalʼaʼí bilı̨́ı̨́ʼ dahólǫ́.
5 Áko ádadííniid, Ajoobaʼ bee nihichʼohaʼnéego nihąąh tsídasidookééz ládą́ą́ʼ, bíniʼdii ná nidaalʼaʼí niidlíinii kéyah nihííʼ dadooleełii nihaa dahidohʼaah, áko Jórdan tooh nílíní doo haʼnaa adanihidiyoohʼish da.
6 Mózes éí Géed dineʼé áádóó Rúben dineʼé ííłní, Daʼ nihikʼisóósh tʼéiyá anaaʼgóó dadookahgo nihí éí tʼáá kǫ́ǫ́ nahísóotą́ą doo?
7 Haʼátʼíísh biniyé Ízrel dineʼé éí kéyah Bóhólníihii beidiníʼáanii yiih dookah nítʼéʼígíí bąąh nidahoyołkaad?
8 Danihizhéʼé yę́ę ałdóʼ ákódáátʼįįd; Kéídesh-barníyadóó kéyah hadeidoohsił biniyé nidaséłʼaʼ yę́ędą́ą́ʼ ákódaadzaa.
9 Jó, Éshkol honíteel góde haaskai yę́ędą́ą́ʼ kéyah dayiiłtsą́ągo Ízrel dineʼé yąąh nidahwiiskaadgo biniinaa kéyah Bóhólníihii beidiníʼáanii tʼáadoo yiih yínáa da.
10 Áko éí bijı̨́ı̨́dą́ą́ʼ Bóhólníihii báhóóchįįdgo ádee haadzíiʼgo ání,
11 Tʼáá aaníí, Ííjip kéyahdę́ę́ʼ diné chʼínákaígíí naadiindóó yówehgo béédááhaígíí tʼááłáʼí nidi éí Éíbraham áádóó Áízak índa Jéíkab bichʼįʼ kéyah bee ádee haasdzíʼígíí éí kéyahgi doo dahwiizdoołtséeł da, háálá doo tʼáá íiyisí shikʼehgo dajíkáah da nítʼééʼ.
12 Tʼáá hazhóʼó Jiifáneh éí Kíínez diné nilíinii biyeʼ Kéíleb áádóó Nan biyeʼ Jáshowa tʼéiyá kéyah yiih dooʼash, háálá tʼáá dzizı̨́ı̨́ nítʼééʼ Bóhólníihii bikʼehgo jooʼash nítʼééʼ.
13 Áko Bóhólníihii éí Ízrel dineʼé yichʼįʼ báhóóchįįdgo honoojíigi dízdiin nááhaijįʼ naanááʼnéełgo áyiilaa; Bóhólníihii binááł náás ahoolchíiłgo doo yáʼáshónígi ádaatʼı̨́ı̨́góó tʼáá ałtso ábísdįįd.
14 Áádóó, jó, nihí danihizhéʼé yę́ę bitsáskʼehgi diné nidaʼiisíihgo háánootʼánígíí danohłı̨́įgo Ízrel dineʼé bikʼijįʼ Bóhólníihii tʼóó yówehgo bánáádahodoołchįįł.
15 Bóhólníihii bitsʼą́ąjigo dah doohkaigo honoojíijįʼ díí dineʼé tʼóó yinááʼdoołnih, áko díí dineʼé ałtso ádadoołdįįł.
16 Nidi áháníjįʼ hachʼįʼ niikaigo ádahodííniid, Kweʼé dibé bighan nihilı̨́ı̨́ʼ bá ádadiilnííł áádóó nihaʼáłchíní bá kin hadaasʼáago ádadiilnííł.
17 Nidi nihí éí Ízrel dineʼé bilą́ąjįʼ anaaʼ biniyé hashtʼeʼádadidiilnííł; kéyah daabííʼ dooleełíjįʼ bił niniikaigo kéyahgi kéédahatʼínígíí biniinaa kin hadaasʼá ditą́ągo binaa ahéédaʼastłʼin góneʼ nihadaʼáłchíní kéédahatʼı̨́į doo.
18 Ízrel dineʼé kéyah bííʼ dooleełii shódayoostʼeʼjįʼ índa nihighangóó nátʼą́ą́ʼ nihééhidiikah.
19 Jórdan tooh nílíní biláahdi wónaaníjí nihikʼéí bił kéyah doo łaʼ nihííʼ dooleeł da, háálá tʼáá kweʼé Jórdan tooh nílíní haʼaʼaahjígo nihikéyah dahazlı̨́ı̨́ʼ.
20 Áko Mózes áhodííniid, Jó, ákódaahnééh ládą́ą́ʼ, tʼáá nihí hashtʼeʼádadołnééh ládą́ą́ʼ Bóhólníihii binááł ákǫ́ǫ́ dadohbáahgo
21 tʼáá ánółtso Bóhólníihii binááł Jórdan tooh nílíní haʼnaagóó dadohbááh ládą́ą́ʼ, Bóhólníihii ádílą́ąjįʼ biʼanaʼí chʼíininíłkaadjįʼ áadi nidaahbaahgo
22 Bóhólníihii binááł éí kéyahgi kéédahatʼínígíí bikʼeh dasidoohdlı̨́įʼgo índa nídoohkah, áádóó Bóhólníihii índa Ízrel dineʼé binááł doo nihihodiitʼiʼ da doo, áko Bóhólníihii binááł díí kéyah danihííʼ dooleeł.
23 Nidi tʼáadoo ádaahdzaagóogo, jó, Bóhólníihii bichʼįʼ ádił daʼsoołziih dooleeł, áádóó tʼáá aaníí ádił daʼsoołziihígíí ííshjání ánihidoolííł.
24 Nihadaʼáłchíní bá kin hadaasʼáago ádaahłééh, nihidibé bighan ádaahłééh índa bee hadahisoohdzíʼígíí bidaʼohłééh.
25 Géed dineʼé áádóó Rúben dineʼé Mózes yichʼįʼ hadaasdzíiʼgo ádaaní, Nihinanitʼaʼí nílíinii, ná nidaalʼaʼí bá bee hwiiniłʼaʼígíí ádayoolíił doo.
26 Nihadaʼáłchíní, nihidaʼasdzą́ąda, danihidibéda, danihilı̨́įʼda tʼáá átʼé Gíliyad kéyahdi kin hadaasʼáágóó dahólǫ́ǫ doo,
27 nidi nihinanitʼaʼí ánínígi átʼéego ná nidaalʼaʼí éí dadoobah yiniyé hashtʼeʼádadiilyaaígíí tʼáá ałtso Bóhólníihii yinááł haʼnaa nidoonééł.
28 Áko tʼáá bí bídadéétʼiʼii Mózes éí nááʼiiłniihii Eliyéízar áádóó Nan biyeʼ Jáshowa índa Ízrel dineʼé dabizhéʼé á naazíinii ídaʼdoolíłígíí yee hachʼįʼ haadzííʼ.
29 Ákohgo Mózes áhodííniid, Géed dineʼé áádóó Rúben dineʼé Jórdan tooh nílíní haʼnaa nihił niikaigo Bóhólníihii binááł diné tʼáá ałtso dadoobah yiniyé hashtʼeʼádadiilyaaígíí nihilą́ąjįʼ kéyahgi kéédahatʼínígíí yikʼeh dadeesdlı̨́ı̨́ʼ ládą́ą́ʼ ííshją́ą́ Gíliyad kéyah daabííʼ dooleeł biniyé baa dadidoohʼááł,
30 nidi dadoobah yiniyé doo nihił haʼnaa niikaigóó, éí Kéínan hahoodzogi nihitahgóó kéyah łaʼ daabííʼ dooleeł.
31 Áádóó Géed dineʼé índa Rúben dineʼé hachʼįʼ hadaasdzíiʼgo ádaaní, Ná nidaalʼaʼí bichʼįʼ Bóhólníihii haadzíʼígi átʼéego nihí ákódadiiʼnííł.
32 Nihí dadiibah biniyé hashtʼeʼádadiilyaago Bóhólníihii binááł Kéínan kéyahjįʼ haʼnaa nidiiʼnééł, áko Jórdan tooh nílíníjí kéyah nihííʼ dooleeł.
33 Áko Mózes haa hodiníʼánígíí éí Géed dineʼé áádóó Rúben dineʼé índa Jóseph biyeʼ Manáseh dineʼé ałnííʼdóóígíí éí Ámor dineʼé aláahgo binanitʼaʼí Sáíhan bee bóhólnííh yę́ę índa Béíshan hahoodzodóó aláahgo naatʼáanii Ag bee bóhólnííh yę́ę kéyahgi kin hadaasʼáhígíí índa binaagóó kédaayah haidiníʼą́.
34 Áádóó Géed dineʼé éí Dáíban, Átarath áádóó Aróʼer dahoolyéegi kin hadaasʼáago ádayiilaa,
35 áádóó Átrath, Shófan, Jéízer áádóó Jagbíyah,
36 Beth-nímrah índa Beth-héíran dahoolyéegi ditą́ągo binaa ahéédaʼastłʼingo ádayiilaa áádóó dibé dabighan ałdóʼ ádayiilaa.
37 Índa Rúben dineʼé éí Héshban, Ííliyéíleh áádóó Kíriyathéíyim dahoolyéegi kin hadaasʼáago ádayiilaa,
38 Nííbo áádóó Béíyal-míyan (éí bízhiʼ łahgo áńdaalyaa,) índa Shíbmah; díí kin hadaasʼáago ádaalyaaígíí ałdóʼ náánáłaʼ bee dayééjiʼ.
39 Áádóó Manáseh biyeʼ Méíkir baʼáłchíní éí Gíliyad kéyahgóó nidaazbaaʼgo deisnáago Ámor dineʼé ákwii kéédahatʼínígíí yighadahodeestʼą́.
40 Áko Mózes éí Manáseh biyeʼ Méíkir wolyéii Gíliyad kéyahgi yaa hodiníʼą́ągo ákwii niníná.
41 Manáseh biyeʼ Jéíyer éí kin naazhjaaʼígíí yisnáago Hávath-jéíyer yee dayíízhiʼ.
42 Áádóó Nóbah éí Kíínath kin haalʼáii áádóó kin naazhjaaʼígíí tʼáá bił yisná, áko tʼáá bí bízhiʼígíí yee yiyíízhiʼ.
