Numbers 33:1-56
33 Ííjip kéyahdę́ę́ʼ Ízrel dineʼé bisiláo yił daníjaaʼgo Mózes áádóó Éran booʼishgo kótʼéego chʼídahaazná.
2 Áko Mózes yee akʼeʼashchínígíí bikʼehgo Bóhólníihii yee nihoníʼáanii bikʼehgo chʼízhníná, áko díí bikʼehgo joonéełgo jíkai.
3 Átsé nídízídígíí binih ashdlaʼáadah yoołkááł góneʼ, atisʼadeesdzá biiskání éí Rámsiiz kin haalʼáádóó Ízrel dineʼé chʼínáʼná; Ííjip dineʼé tʼáá ałtso tʼáadoo náhoniyésí Ííjip dineʼé binááł chʼízhníná.
4 Áko Ííjip dineʼé bitahgóó alą́ąjįʼ nidabiʼdiizhchíinii Bóhólníihii nabistseedígíí yóóʼádeileʼgo chʼízhníná; bidiyin dabidiʼníinii ałdóʼ Bóhólníihii atíbiilaa.
5 Áádóó Rámsiizdóó Ízrel dineʼé dah náádiiʼnáago Sákathgi niníná.
6 Sákathdóó dah náádiiʼnáago honoojí bibąąhgi Ííthandi nináánáʼná.
7 Áádóó Béíyal-zíífan nahósʼaʼgi Páí-haháírath bíighahgóó chʼínínáago Mígdal hoolyéhígíí bíighahgi nináánáʼná.
8 Páí-haháírath bíighahdóó nínáádiiʼnáago tó ałnííʼgóó honoojíijįʼ chʼíníná, áko Íítham nahósʼaʼdóó honoojíhígóó tágí jı̨́ joonéełgo Méírah hoolyéegi nináánáʼná.
9 Méírahdóó dah náázhdiiʼnáago Íílim hoolyéegi jiníná; ákwii naakitsʼáadahgo tó hadaazlı̨́ índa páam tsostsʼidiingo naazkaadgo ákweʼé nizhníná.
10 Íílim hoolyéédóó dah náádiiʼnáago Tónteel Łichííʼ bibąąhgi nináánáʼná.
11 Tónteel Łichííʼ bibąąhdóó dah náádiiʼnáago honoojí Sin hoolyéegi nináánáʼná.
12 Áádóó honoojí Sin hoolyéédóó dah náádiiʼnáago Dáfkah hoolyéegi nináánáʼná.
13 Dáfkahdóó dah náádiiʼnáago Éílash hoolyéegi nináánáʼná.
14 Éílashdóó dah náádiiʼnáago Réfidim hoolyéegi nináánáʼná; ákwii éí tó bídin hóyééʼ lá.
15 Réfidimdóó dah náádiiʼnáago Sáínai honoojíigi nináánáʼná.
16 Sáínai honoojíídóó dah náádiiʼnáago Kíbrath-hatéíʼavah hoolyéegi nináánáʼná.
17 Kíbrath-hatéíʼavahdóó dah náádiiʼnáago Hazíírath hoolyéegi nináánáʼná.
18 Hazíírathdóó dah náádiiʼnáago Ríthmah hoolyéegi nináánáʼná.
19 Áádóó Ríthmahdóó dah náádiiʼnáago Ríman-píírez hoolyéegi nináánáʼná.
20 Ríman-píírezdóó dah náádiiʼnáago Líbnah hoolyéegi nináánáʼná.
21 Áádóó Líbnahdóó dah náádiiʼnáago Rísah hoolyéegi nináánáʼná.
22 Rísahdóó dah náádiiʼnáago Kííhiiléíthah hoolyéegi nináánáʼná.
23 Kííhiiléíthahdóó dah náádiiʼnáago Dził Shéífer siʼánígi nináánáʼná.
24 Dził Shéíferdóó dah náádiiʼnáago Haréídah hoolyéegi nináánáʼná.
25 Haréídahdóó dah náádiiʼnáago Makhíílath hoolyéegi nináánáʼná.
26 Makhíílathdóó dah náádiiʼnáago Téíhath hoolyéegi nináánáʼná.
27 Téíhathdóó dah náádiiʼnáago Téírah hoolyéegi nináánáʼná.
28 Téírahdóó dah náádiiʼnáago Míthkah hoolyéegi nináánáʼná.
29 Míthkahdóó dah náádiiʼnáago Hashmónah hoolyéegi nináánáʼná.
30 Hashmónahdóó dah náádiiʼnáago Mosíírath hoolyéegi nináánáʼná.
31 Mosíírathdóó dah náádiiʼnáago Béne-jéíyakan hoolyéegi nináánáʼná.
32 Béne-jéíyakandóó dah náádiiʼnáago Hor-hagídgad hoolyéegi nináánáʼná.
33 Hor-hagídgadóó dah náádiiʼnáago Játbathah hoolyéegi nináánáʼná.
34 Játbathahdóó dah náádiiʼnáago Iibrónah hoolyéegi nináánáʼná.
35 Iibrónahdóó dah náádiiʼnáago Ííziyan-gííber hoolyéegi nináánáʼná.
36 Ííziyan-gííberdóó dah náádiiʼnáago Zin honoojí nahósʼaʼgi tʼáá ákwii Kéídesh hoolyéego ákwii nináánáʼná.
37 Kéídeshdóó dah náádiiʼnáago Íídam kéyah nihoodzogi Dził Hor siʼánígi nináánáʼná.
38 Nááʼiiłniihii Éran éí Bóhólníihii bizaadkʼehgo Dził Hor góde haayá, índa áadi daaztsą́; Ízrel dineʼé Ííjip kéyahdę́ę́ʼ chʼínínáádóó bikʼijįʼ dízdiin nááhaigo ashdlaʼ nídízííd binih łaʼa jı̨́ı̨́ góneʼ áhóótʼįįd.
39 Áko Éran tʼááłáhídi neeznádiindóó baʼaan naadiin tááʼ binááhaigo Dził Hor bighą́ąʼdi daaztsą́.
40 Ákohgo Éírad kin haalʼáádóó aláahgo naatʼáanii Kéínan dineʼé nilíinii éí Kéínan kéyah biiʼ shádiʼááh hoolyéegi kééhatʼı̨́įgo Ízrel dineʼé yinéłígíí yaa hodiiztsʼą́ą́ʼ.
41 Áko Dził Hor siʼánídóó dah náádiiʼnáago Zalmónah hoolyéegi nináánáʼná.
42 Zalmónahdóó dah náádiiʼnáago Púnan hoolyéegi nináánáʼná.
43 Púnandóó dah náádiiʼnáago Óbath hoolyéegi nináánáʼná.
44 Óbathdóó dah náádiiʼnáago Móʼab kéyah bibąąhgi Áíjii-ábarim hoolyéegi nináánáʼná.
45 Áíyimdóó dah náádiiʼnáago Dáíban-géed kin haalʼáagi nináánáʼná.
46 Dáíban-géedóó dah náádiiʼnáago Álman-diblathéíyim kin haalʼáagi nináánáʼná.
47 Álman-diblathéíyimdóó dah náádiiʼnáago Dził Ábarim daníʼáagi Dził Nííbo bitsı̨́įdi nináánáʼná.
48 Dził Ábarim daníʼáádóó dah náádiiʼnáago Móʼab kéyah nidzisgaigi Jériko binaashiijí Jórdan tooh nílíní bibąąhgi nináánáʼná.
49 Áko Jórdan tooh nílíní bibąąhgi Beth-jéshimath kin haalʼáádóó Éíbel-shíttim hoolyéejįʼ Móʼab kéyah nidzisgaigi nidahaazná.
Kéínan kéyah bináhásdzo áádóó ahádaasdzo
50 Áádóó Jériko binaashiijí Jórdan tooh nílíní bibąąhgóó Móʼab kéyah nidzisgaigi Bóhólníihii éí Mózes yichʼįʼ haadzíiʼgo ání,
51 Ízrel dineʼé bichʼįʼ handziihgo ábidiní, Jórdan tooh haʼnaa Kéínan kéyah góneʼ oonáago
52 kéyahgi kéédahatʼínígíí tʼáá ałtso átsʼą́ąjįʼ chʼídahidínóołkał áádóó tsé bee edaʼalyaii áádóó béésh doolyı̨́įʼgo bee edaʼalyaii índa ninádahałaah doo biniyé wódah nahazʼą́ągo ádayiilaaígíí ałtso bitsʼą́ą́ʼ nidahidoołchxǫǫł,
53 áko dabikéyah bigha dahodidoohtʼáałgo biiʼ kéédahohtʼı̨́į doo, háálá kéyah danihííʼ dooleeł biniyé nihaa diníʼą́.
54 Índa dineʼé danohłíinii kéyah danihííʼ dadooleełígíí yááʼiiltʼeʼ bikʼehgo nihikéyah ałtaa doohdzoh; ląʼí danołtʼéhígíí bikʼehgo kéyah dahótsaago hadahidoohsoh áádóó ádanołchʼı̨́dígíí bikʼehgo kéyah tʼáá nihidahoníłtsóhígo hadahidoohsoh; yááʼiiltʼeʼ bikʼehgo diné hakéyah hóóʼ nidahaleeh; dineʼé danohłíinii bikʼehgo kéyah danihííʼ nidahaleeh doo.
55 Nidi díí baa hodoolzhish: kéyahgi kéédahatʼínígíí tʼáadoo ádítsʼą́ąjįʼ nihaa chʼídahaazhjééʼgóogo kéyahgi nidaakaigo ádaałaaígíí nihinákʼee nídaʼajiłígi átʼéego, doodaiiʼ nihooshkʼiizh góneʼ nihaa inídaʼajiłígi átʼéego hóyéeʼgo nihichʼįʼ nidahwiiłnáago kéyah biiʼ kéédahohtʼı̨́į doo.
56 Nááʼáłdóʼ díí baa hodoolzhish: atídeeshłííł nisinígíí, jó, nihída atínihideeshłííł.
