Numbers 34:1-29
34 Áádóó Bóhólníihii éí Mózes yichʼįʼ haadzíiʼgo ííłní,
2 Ízrel dineʼé bichʼįʼ handziihgo kóbidiní, Kéínan kéyah biih woonáago, (díí Kéínan kéyah biiʼ nidahwiisdzooígíí nihííʼ ádadoohłííł:)
3 áko shádiʼááhjí hoodzo dooígíí éí honoojí Zin hoolyéédóó Íídam bihoodzo booshkʼiizhgóó éí shádiʼááhjí nihoodzo dooígíí Tónteel Dókʼǫ́ǫzhii nineelʼánídóó haʼaʼaahjigo hoodzo dooleeł,
4 áádóó shádiʼááhdóogo naanáʼásdzo dooígíí éí Akrábim kéyah góde Zingóó hoodzo doo áádóó Kéídesh-barníya shádiʼáahjigo ahoodzo doo, índa Héízar-ádar bíighahgóó Ázman hoolyéejįʼ ahoodzo doo,
5 áádóó Ázman binaagóó ahééhoodzogo Ííjip kéyahgi tooh nílíníjįʼ áádóó tónteel siyíníjįʼ hoodzo doo.
6 Índa eʼeʼaahjí hoodzooígíí éí ayóó átʼé tónteel siyínígíí bibąąhgóó hoodzo doo. Díí éí eʼeʼaahjígo hoodzooígíí átʼée doo.
7 Díí náhookǫsjí hoodzooígíí átʼée doo: ayóó átʼé tónteel siyínídóó Dził Hor siʼáníjįʼ hoodzogo ádíílííł,
8 áádóó Dził Hor siʼánídóó Héímath hoolyéejįʼ yah ahóótʼiʼígíí bíighahgóó hoodzogo ádíílííł, áádóó Zíídad hoolyéejįʼ hoodzo doo,
9 áádóó Zífran hoolyéégóó hoodzogo Héízar-íínan kin shijaaʼjįʼ hoodzo doo; díí éí náhookǫsjí hoodzooígíí átʼée doo.
10 Áádóó haʼaʼaahjígo hoodzooígíí éí Héízar-íínandóó Shíífam hoolyéejįʼ hoodzogo ádíílííł,
11 índa éí hoodzooígíí Shíífamdóó Ríblah kin haalʼáajįʼ áádóó Áyiin hoolyéii haʼaʼaahjígo hoodzo doo, áádóó haʼyaago hoodzooígíí tó siyínígíí Kíniireth hoolyéii haʼaʼaahjí hoodzo doo.
12 Áko hoodzooígíí éí Jórdan tooh nílíní góyaa áádóó Tónteel Dókʼǫ́zhíjįʼ hoodzo doo: díí éí nihináhásdzooígíí nihikéyah átʼée doo.
13 Áádóó Mózes éí Ízrel dineʼé yichʼįʼ haadzíiʼgo ání, Yááʼiiltʼeʼ bikʼehgo díí kéyah nihííʼ dadooleeł; éí dineʼé náhástʼéiigo áádóó dineʼé ałnííʼdóó bee biʼdójíii baa didootʼááł níigo Bóhólníihii haadzííʼ.
14 Rúben dineʼé dabizhéʼé yę́ę baʼáłchíní daʼahílchíihii bikʼehgo áádóó Géed dineʼé dabizhéʼé yę́ę baʼáłchíní daʼahílchíihii bikʼehgo índa Manáseh dineʼé ałnííʼdóó bee biʼdójíii éí kéyah bííʼ dadooleełgo baa dahideestʼą́.
15 Naakigo dineʼé nilíinii áádóó dineʼé ałnííʼdóó bee biʼdójíii éí kéyah bííʼ doogo Jériko binaashii Jórdan tooh nílíní haʼaʼaahjigo hááʼátʼááh bichʼįʼgo baa dahideestʼą́.
16 Áádóó Bóhólníihii éí Mózes yichʼįʼ haadzíiʼgo ííłní,
17 Díí nááʼiiłniihii Eliyéízar áádóó Nan biyeʼ Jáshowa éí kéyah danihííʼ dooleełígíí nihá ałtsʼádeidoozoh.
18 Áko dineʼé danilínígíí bitahdóó naatʼáanii danilíinii tʼááłáʼígo éí kéyah hóóʼ dadooleełígíí hazhéʼé deidoozoh biniyé nidíínił.
19 Éí hastóí kódaolyé: Júdah dineʼé bitahdóó éí Jiifáneh biyeʼ Kéíleb niiltı̨́;
20 Símiyan dineʼé bitahdóó éí Amáíhad biyeʼ Shémuʼel niiltı̨́;
21 Bénjamin dineʼé bitahdóó éí Kíslan biyeʼ Iiláídad niiltı̨́;
22 Dan dineʼé bitahdóó éí Jáglai biyeʼ naatʼáanii nilíinii Bákai niiltı̨́.
23 Jóseph baʼáłchíní ahoolchíiłii łaʼ Manáseh dineʼé danilíinii bitahdóó éí Íífad biyeʼ naatʼáanii nilíinii Hániyel niiltı̨́,
24 áádóó Íífreiyim dineʼé bitahdóó éí Shíftan biyeʼ naatʼáanii nilíinii Kémuʼel niiltı̨́.
25 Zébyulan dineʼé bitahdóó éí Párnak biyeʼ naatʼáanii nilíinii Elizéífan niiltı̨́.
26 Ísakar dineʼé bitahdóó éí Ázan biyeʼ naatʼáanii nilíinii Páltiyel niiltı̨́.
27 Ásher dineʼé bitahdóó éí Shiilómai biyeʼ naatʼáanii nilíinii Aháíhad niiltı̨́.
28 Náftalai dineʼé bitahdóó éí Amáíhad biyeʼ naatʼáanii nilíinii Pédahel niiltı̨́.
29 Díí éí naatʼáanii danilíinii éí Bóhólníihii haadzíʼígíí bikʼehgo kéyah ííʼ dooleełii Ízrel dineʼé yitaadeidoozohgo Kéínan kéyah bííʼ dadooleeł.
