Numbers 35:1-34
35 Áádóó Móʼab kéyah nidzisgaigi éí Jériko binaashiijí Jórdan tooh nílíní haʼaʼaahjigo hazʼánígi Bóhólníihii éí Mózes yichʼįʼ haadzíiʼgo ííłní,
2 Ízrel dineʼé díí bee bichʼįʼ handziih; Líívai dineʼé bííʼ dooleełii kin hadaasʼáii yiiʼ kéédahatʼı̨́į doo biniyé yaa deididooʼááł, áádóó kin hadaasʼáii binaagóó dahootsooígíí ałdóʼ baa dadidoohʼááł.
3 Áko kin hadaasʼáii bííʼ dadooleełgo yiiʼ kéédahatʼı̨́į doo, áádóó binaagóó dahootsooígi bilı̨́ı̨́ʼ dah danéelkaadii tʼáá átʼé ákwii nidanilkaad doo.
4 Áádóó kin hadaasʼá binaagóó dahootsooígi Líívai dineʼé bá dahwiidoołʼaał; éí kin haalʼá binaa ahééʼítłʼinídóó tʼááłáhídi mííldóó baʼaan ashdladi neeznádiin ké silá bíighahgo ahééhoolʼáa doo.
5 Áko kin haalʼá binaagi ahééhoolʼáhídóó bínáádíʼnííłʼąął; haʼaʼaahjigo táadi mííl ké silá áhonízahjįʼ; shádiʼáahjigo táadi mííl ké silá áhonízahjįʼ; eʼeʼaahjigo táadi mííl ké silá áhonízahjįʼ; náhookǫsjigo táadi mííl ké silá áhonízahjįʼ bídadíʼnííłʼąął, áko éí ałníiʼgi kin haalʼáa dooleeł. Díí kin hadaasʼáago binaagi dahootsooígíí daabííʼ dooleeł.
6 Áádóó kin hadaasʼáii Líívai dineʼé baa dahodidoohʼáłígíí éí hastą́ągo kin haalʼáii biiʼjįʼ yisdáʼniichéeh dooleeł biniyé baa dahodidoohʼááł; éí diné yiyiisxíinii áajįʼ yisdádahinichéeh doo; éí bighą́ąhjįʼ dízdiindóó baʼaan naakigo kin haalʼáii bá bídeidoohnił.
7 Áko kin hadaasʼáhígíí tʼáá átʼé Líívai dineʼé baa deetʼaahgo dízdiindóó baʼaan tseebíí kin haalʼá índa binaagóó dahootsooígíí ałdóʼ baa didootʼááł.
8 Kin hadaasʼáii aa dahidohʼaah dooígíí éí Ízrel dineʼé danilíinii kin hadaasʼáii tʼóó ahayóí bee dahólónígíí kin hadaasʼáii ląʼí nideidiiʼaah doo; tʼáá díkwíí bee dahólónígíí kin hadaasʼáii tʼáá díkwíí nideidiiʼaah doo; dineʼé tʼáá ádzíłtso hakin hadaasʼáii hóóʼ daazlı̨́įʼii bikʼehgo Líívai dineʼé baa dahizhdidooʼááł.
Kin hadaasʼáii biiʼjįʼ yisdáʼniichéehii (Deut. 19:1-13; Josh. 20:1-9)
9 Áádóó Bóhólníihii éí Mózes yichʼįʼ haadzíiʼgo ííłní,
10 Ízrel dineʼé bichʼįʼ handziihgo ábidiní, Jórdan tooh nílíní haʼnaa ninoonáago Kéínan kéyah biih doohnéełgo
11 kin hadaasʼáii biiʼjįʼ yisdáʼniichéeh dooígíí tʼáá nihí ádá ádahodoohłííł, áko doo tʼáá ákójínééhgóó diné jiisxíinii áajįʼ yisdázhdínóochééł.
12 Áko dił biniinaa diné kʼééhodidoodlíiłii bitsʼąą kin hadaasʼáii biiʼ yisdáʼniichéehjįʼ azhdínóochééł, áko diné jiisxíinii doo dazdootsaałígíí biniyé átsé hazhóʼó haa hwiidínóotʼįįł.
13 Díí kin hadaasʼáii aa dahidohʼaah dooígíí éí hastą́ągo kin haalʼáii biiʼjįʼ yisdádahinohchéehii átʼée doo.
14 Jórdan tooh nílíní haʼaʼaahjígo táaʼgo kin haalʼáii áádóó Kéínan kéyah biiʼ táaʼgo kin haalʼáii éí Líívai dineʼé baa dadidoohʼááł; éí kin hadaasʼáii biiʼjįʼ yisdáʼniichééh biniyé nihá átʼée doo.
15 Díí hastą́ągo kin haalʼáii biiʼjįʼ yisdáʼniichééh biniyéhígíí Ízrel dineʼé áádóó déʼéyóní nilíinii índa tʼóó átsééd nihitahgi kéédahatʼínígíí bá átʼée doo, áko tʼáá háiida doo tʼáá ákójínééhgóó diné jiisxíinii áajįʼ yisdázhdínóochééł.
16 Áko béésh bee diné bił niizhníłhaalgo éí diné jiisxíinii jílı̨́; diné jiisxíinii tsʼídá hodiʼyoolyéłí.
17 Índa tsé bee diné bił niizhníłneʼgo éí diné jiisxíinii jílı̨́; diné jiisxíinii tsʼídá hodiʼyoolyéłí.
18 Doodaiiʼ tsin bee diné bił niizhníłhaalgo éí diné jiisxíinii jílı̨́; diné jiisxíinii tsʼídá hodiʼyoolyéłí.
19 Bikʼéí bidił biniinaa diné kʼéédidooʼníłígíí tʼáá bí diné iisxínígíí yidááh níyáago yidiyoołhééł.
20 Doodaiiʼ yikʼee diniihgo tʼáá naʼníleʼdii nihíideestsisgo, doodaiiʼ yaa niheedzáago tʼáadoo leʼé yee yííníiłneʼgo yiyiisxı̨́ı̨́ ládą́ą́ʼ,
21 doodaiiʼ yijoołxáago yił niizníłtsʼin ládą́ą́ʼ; éí ił niizníłtsʼinígíí tsʼídá hodiʼyoolyéłí, háálá diné yiyiisxíinii jílı̨́, áko bikʼéí bidił biniinaa diné kʼéédidooʼníłígíí tʼáá bí diné iisxínígíí yidááh níyáago yidiyoołhééł.
22 Nidi doo yijoołxáágóó tʼáadoo kótʼé ílíní atíyiilaago, doodaiiʼ doo yaa neheedzáágóó tʼáadoo leʼé yikʼijįʼ ayiyííłhango,
23 doodaiiʼ tʼáadoo yooʼíní tsé yee néidííłneʼígíí daaztsą́ą́ ládą́ą́ʼ; éí doo yiʼanaʼí nilı̨́ı̨́góó, doodaiiʼ atízhdoolíiłgi doo binahodzizʼą́ą́góó,
24 áko dah oonéłígíí díí diné iisxínígíí áádóó kʼéézhdidooʼníłígíí díí bee nihodiitʼaahii bikʼehgo haa hwiidínóotʼįįł.
25 Áádóó dah oonéłígíí éí diné bikʼéí bidił biniinaa kʼéédidooʼníłígíí bitsʼą́ąjįʼ diné iisxíinii yisdádeidoołtééł, áko kin haalʼáii biiʼ yisdáʼniichéehjįʼ anííchą́ą́ʼ yę́ęjįʼ yił nídadookah, áádóó aláahgo nááʼiiłniihii akʼah bikʼi yaadziidgo biʼdoolzı̨́ʼígíí daaztsą́ąjįʼ ákwii kééhojitʼı̨́į doo.
26 Nidi diné iisxíinii kin haalʼáii biiʼjįʼ yisdázhnííchą́ʼídóó tʼáá hoolzhishgi hoodzo bitis jííyáago
27 áádóó kin haalʼáii biiʼjįʼ yisdázhnííchą́ʼídóó hoodzo bitisdi nijigháago diné bikʼéí bidił biniinaa kʼéédidooʼníłígíí hakʼíníyáago hwiisxı̨́įgo hadił biniinaa doo bohodidootʼih da,
28 háálá diné iisxíinii éí aláahgo nááʼiiłniihii daaztsą́ąjįʼ kin haalʼáii biiʼjįʼ yisdáʼniichéehgi kééhatʼı̨́į doo nítʼééʼ. Nidi aláahgo nááʼiiłniihii daaztsą́ą́dóó bikʼijįʼ índa diné iisxíinii hakéyahgóó nihéézhdoodááł.
Daʼooʼíinii áádóó akʼéninádahalyéii bá bee hazʼáanii
29 Díí náás ahoołchííłgóó tʼáá ánółtso kéédahohtʼı̨́ı̨́góó tʼáá átʼé nihá bee nihwiistʼáanii bee nidahodiyohʼaah doo.
30 Tʼáá háiida diné łaʼ yiyiisxı̨́įgo éí daʼooʼíinii bikʼehgo hodiʼyoolyééł, nidi ooʼíinii tʼááłáʼí hoolneʼígíí bikʼehgo doo hodiʼyoolyéeł da.
31 Nááʼáłdóʼ diné yiyiisxíinii bá nihootʼą́ągo beʼiinaʼ doo bikʼéninádaʼdoohdléeł da, nidi tsʼídá bidiʼyoolyéłí.
32 Índa diné łaʼ kin haalʼáii biiʼ yisdáʼniichéehjįʼ anííchą́ąʼgo éí aláahgo nááʼiiłniihii tʼah doo daatsaahgóó hakéyahdi kénááhojitʼı̨́į doo biniyé doo hakʼéninádaʼdoohdléeł da.
33 Áko kéyah biiʼ kéédahohtʼínígi doo dahodoołchxǫǫł da; jó, dił biniinaa kéyah nehechxǫǫh, áádóó kéyah biiʼ dił deeznaʼígíí éí tʼáá bąąh hólǫ́ǫ doo; tʼáá hazhóʼó diné jiisxínígíí hoʼdiisyı̨́įgo tʼéiyá bee nahjįʼ kónídooʼnííł.
34 Éí bąą kéyah biiʼ kéédahohtʼı̨́į dooígi tʼááká dahoołchxǫǫh lágo, háálá ákwii shí kééhashtʼı̨́; jó, shí Bóhólníihii nishłı̨́įgo Ízrel dineʼé bitahgi kééhashtʼı̨́.
