Numbers 4:1-49
4 Áádóó Bóhólníihii éí Mózes áádóó Éran yichʼįʼ haadzíiʼgo ání,
2 Kóhath badaʼáłchíní ahoolchíiłii Líívai dineʼé bitahgóó ahiiʼ hááʼahiyoolchíłígíí dabizhéʼé yę́ę yaʼáłchíní náás ahoolchíiłii danilı̨́įgo éí yíníłtaʼ;
3 tádiindóó ashdladiin béédááhaijįʼ éí níbaal biiʼ dahozdísinii yindadoolnishgo yaa daneesánígíí ałtso yíníłtaʼ.
4 Díí Kóhath dineʼé éí níbaal biiʼ dahozdísinii yindaalnishgo aláahgo dadiyinii yaa ádahalyą́ą doo.
5 Áko nihidoonéełjįʼ ahalzhishgo Éran áádóó biyeʼké éí ataʼnaníbaalii náádeiiʼdiiłtsos doo áádóó tsitsʼaaʼ dílzinii éí neeznáago bikʼeh óʼooʼníiłii bee bééhániihii biiʼ sinilii yikʼínídeiłtih doo,
6 áádóó bikáaʼgi nahashchʼid bikágí yikʼínídeiłtih doo áádóó náábíkáaʼgi éí naʼatʼą́hí tʼáá átʼé yá nahalingo dootłʼizhígíí bikʼínáltihgo ádayósin doo índa tsin níyizii bee naʼatʼáhígíí éí tsitsʼaaʼ dílzinii bąąh hadaazhahígíí biiʼ nídítsih doo.
7 Índa bikááʼ adání bikáaʼgi bááh nááhániihii nináʼniłígíí éí naʼatʼą́hí tʼáá átʼé yá nahalingo dootłʼizhgo bikʼínáltih doo áádóó łeetsʼaaʼtʼą́hída, béésh adeeʼda, łeetsʼaaʼ nímazída áádóó yanáadziʼgo nááhániihii bee naakáhígíida bikáaʼgi nináʼnił doo. Bááh nááhániihii tʼáá áłahjįʼ ákwii sinilgo óolzin doo.
8 Áko éí tʼáá átʼé naʼatʼą́hí łichxíʼígíí yikʼínídeiłtih doo índa éí bikáaʼgi nahashchʼid bikágí bikʼínáltih doo áádóó tsin níyizii bee naʼatʼáhígíí éí bikááʼ adání bąąh hadaazhahígíí biiʼ nídítsih doo.
9 Índa naʼatʼą́hí yá nahalingo dootłʼizhígíí nídeididoołtsosgo éí bee hoolʼiní bá yadaaʼáii áádóó bílátahdóó bee dahoolʼiní, bee aniltsésída, łeeshchʼiih bee naakáhída, łeetsʼaaʼ éí akʼah yee nideikáago chodayoołʼínígíida tʼáá ałtso éí tʼáá átʼé yikʼínídeiłtih doo,
10 áko díí bee hoolʼiní bá yadaaʼáhí áádóó łeetsʼaaʼ tʼáá átʼé éí nahashchʼid bikágí yił ałchʼįʼ áńdayiilʼįįhgo tsin níyizii bee naʼatʼáhígíí yikááʼ ninádeiłtsos doo.
11 Áádóó bikááʼ nááʼiiniihí óola bee ályaaígíí éí naʼatʼą́hí yá nahalingo dootłʼizhígíí yikʼínídeiłtihgo bikáaʼgi nahashchʼid bikágí yikʼínídeiłtih doo índa tsin níyizii bee naʼatʼáhígíí éí bikááʼ nááʼiiniihí bąąh hadaazhahígíí biiʼ nídítsih doo,
12 índa tʼáá haʼátʼíhída chodayoołʼı̨́įgo yee nidaalnishígíí tʼáá átʼé náádeiʼdiiʼniłgo hodiyingo hazʼą́ą́ góneʼ nidaalʼaʼgo chodayoołʼínígíí éí naʼatʼą́hí yá nahalingo dootłʼizhígíí yił ałchʼįʼ áńdayiilʼįįhgo nahashchʼid bikágí yikʼínídeiłtih doo índa tsin níyizii bee naʼatʼáhígíí yikááʼ ninádeiłtsos doo.
13 Áádóó bikááʼ nááʼiiniihí yiiʼdę́ę́ʼ tʼeesh háádayiikáahgo índa naʼatʼą́hí tsídídééh nahalingo łichíʼígíí bikááʼ nááʼiiniihí yikʼínídeiłtih doo,
14 áko éí binaagi łeetsʼaaʼ chodayoołʼínígíí tʼáá átʼé éí tsin bijeeh dilidgo łikání halchinii bee naakáhí, atsįʼ bee hahaʼníłí, łeeshchʼiih bee hahakaahí, biiʼ táʼádígisí índa nááʼiiniihgi łeetsʼaaʼ chodaoʼíinii tʼáá átʼé éí bikááʼ nááʼiiniihí biyiʼ góyaa anídeiʼnił índa nahashchʼid bikágí bikʼínáltihgo tsin níyizii bee naʼatʼáhígíí éí bikááʼ nááʼiiniihí bąąh hadaazhahí biiʼ nídítsih doo.
15 Áko nihinááʼíʼnéehgo Éran áádóó biyeʼké éí hodiyingo hazʼą́ągi bee hahodítʼéii áádóó hodiyingo hazʼą́ągi chodaoʼíinii tʼáá átʼé ałtso hashtʼéédayiilʼįįhdóó bikʼijįʼ Kóhath dineʼé binaanish ádayósingo deíyeeh doo yiniyé nídaakah doo; éí tʼáá haʼátʼíhída diyinígíí doo yidadólchííd átʼée da doo, éí doodaiiʼ łaʼda yideelchidgo dadootsaał. Éí níbaal biiʼ dahozdísinii biiʼígíí Kóhath dineʼé daʼahílchíihii dabiyéél.
16 Nááʼiiłniihii Éran biyeʼ Eliyéízar éí bee hoolʼiní iih nádziʼígíí, tsin bijeeh dilidgo łikání halchinii, tʼáá ákwíí jı̨́ akʼáán nááhániihígíí áádóó akʼah akʼi yahiidzíidgo bee alzı̨́hígíí áádóó níbaal biiʼ hodílzinii tʼáá átʼé yee bóhólníihgo áádóó hodiyingo hazʼą́ą́ góneʼ hólóonii índa chodaoʼíinii tʼáá átʼé yaa áhályą́ą doo.
17 Áko Bóhólníihii éí Mózes áádóó Éran yichʼįʼ haadzíiʼgo ání,
18 Kóhath dineʼé tʼááká Líívai dineʼé bitahgóó óoldįįh lágo,
19 nidi kótʼéego bá ádoohłííł, áko tʼáá dahináa doo áádóó doo dadínóonéeł da; aláahgo diyingo nidaalyéhígíí yichʼįʼ nídadikahgo Éran áádóó biyeʼké ákóneʼ yah anákahgo Kóhath dineʼé tʼáá ałtso bindajilʼaʼ dooígíí índa dabiyéel dooígíí ałdóʼ yichʼįʼ ninádeiʼnił doo,
20 nidi diyingo nidaajaahii doo yichʼįʼ yah adookahgo yikʼi dadooghał da, doodaiiʼ yikʼi daazghalgo dadínóonééł.
21 Áádóó Bóhólníihii éí Mózes yichʼįʼ haadzíiʼgo ání,
22 Gérshan dineʼé badaʼáłchíní daʼahílchíihii dabizhéʼé yę́ę yaʼáłchíní náás ahoolchíiłii danilı̨́įgo ahiiʼ hááʼahiyoolchíłígíí yíníłtaʼ;
23 tádiindóó ashdladiin béédááhaijįʼ yídííłtahgo tʼáá ałtso nidadoolʼaał biniyé yah ahekáhígíí níbaal biiʼ dahozdísinii góneʼ nidaalnish doo.
24 Díí éí Gérshan dineʼé baʼáłchíní ahiiʼ hááʼahiyoolchíiłii bindaanishgo nidaalʼaʼ áádóó hééł nideiyée dooleeł:
25 níbaal biiʼ hodílzinii biyaagi ahééníbaalígíí áádóó níbaal biiʼ dahozdísinii bikʼínáltihígíí ałdóʼ, nahashchʼid bikágí akáaʼgi akʼínídaaltihígíí ałdóʼ índa níbaal biiʼ dahozdísinii bichʼéʼétiingi dáádiníbaal ałdóʼ nideiyée dooleeł,
26 níbaal biiʼ hodílzinii áádóó bikááʼ nááʼiiniihí binaa hazʼánígi nídadilbałígíí áádóó bichʼéédą́ąʼgi dáádiníbaal ałdóʼ áádóó dabitłʼóól áádóó yee yininádaalnishígíí tʼáá átʼé índa níbaal bee háádiilʼįįhígíí tʼáá átʼé nideiyée doo; díí bindaanishgo nidaalʼaʼ doo.
27 Éran áádóó biyeʼké éí Gérshan dineʼé hééł nideiyée dooleełígíí tʼáá átʼé áádóó yindaalnish dooleełígíí tʼáá átʼé yichʼįʼ deiłʼáa doo, áádóó hééł tʼáá átʼé naagé yee bídahólníih doo biniyé nidadíínił.
28 Díí kótʼéego Gérshan dineʼé baʼáłchíní ahiiʼ hááʼahiyoolchíłígíí níbaal biiʼ dahozdísinii yininádaalnishgo nidaalʼaʼgo nááʼiiłniihii Éran biyeʼ Íthamar bídahojółníih dooleeł.
29 Miirárai dineʼé badaʼáłchíní náás ahoolchíiłii ahiiʼ hááʼahiyoolchíłígíí dabizhéʼé yę́ę badaʼáłchíní danilı̨́įgo yíníłtaʼ;
30 tádiindóó ashdladiin béédááhaijįʼ yídííłtahgo tʼááłáʼí nítínígo nidadoolʼaał biniyé yah ahekáhígíí níbaal biiʼ dahozdísinii góneʼ nidaalnish doo.
31 Áko díí hééł tʼáá átʼé deíyeehgo níbaal biiʼ dahozdísingi tʼáá átʼé yindaalnishígíí bikʼehgo nidaalʼaʼ doo: níbaal biiʼ hodílzinii bá tsin neheeshjííʼ ahééneelkálígíí áádóó tsin níyizii naaniigo bąąh daníʼáhígíí áádóó bá ííyah daniiʼáii índa bitłʼááh naaznilgo tʼááłáhíjí biih dahasdzánígíí
32 áádóó binaa hazʼánígi bá ííyah daniiʼáii áádóó bitłʼááh naaznilgo tʼááłáhíjí biih dahasdzánígíí, áádóó bá anídaalkałígíí, dabitłʼóól ałdóʼ, bee bindaʼanishígíí tʼáá átʼé áádóó yindaalnish dooleełígíí tʼáá átʼé. Dayééjiʼígíí bikʼehgo hééł naagé bee hódahólníih doo biniyé hataadidííʼaał.
33 Díí kótʼéego Miirárai dineʼé baʼáłchíní ahiiʼ hááʼahiyoolchíłígíí níbaal biiʼ dahozdísinii tʼáá átʼé yininádaalnishgo nidaalʼaʼgo nááʼiiłniihii Éran biyeʼ Íthamar bídahojółníih dooleeł.
34 Áko Mózes áádóó Éran índa dah oonééłdóó aląąjįʼ naazíinii éí Kóhath dineʼé badaʼáłchíní náás ahoolchíiłii ahiiʼ hááʼahiyoolchíłígíí dabizhéʼé yę́ę yaʼáłchíní danilı̨́įgo dayiyííłtaʼ;
35 tádiindóó ashdladiin béédááhaijįʼ tʼááłáʼí nítínígo nidadoolʼaał biniyé yah ahekáhígíí éí níbaal biiʼ dahozdísinii góneʼ nidaalnish doo.
36 Áko éí badaʼáłchíní ahiiʼ hááʼahiyoolchíiłii dabiʼdééltaʼígíí naakidi mííldóó baʼaan tsostsʼidi neeznádiindóó baʼaan ashdladiingo ánéelą́ą́ʼ.
37 Díí éí Kóhath dineʼé badaʼáłchíní ahiiʼ hááʼahiyoolchíiłii dabiʼdééltaʼígíí ádaatʼı̨́; níbaal biiʼ dahozdísinii yindadoolnishgo yídaneelʼáanii tʼáá ałtso éí Mózes áádóó Éran hóółtaʼgo Bóhólníihii éí Mózes binahjįʼ yee haadzíʼígíí biʼjiilaa.
38 Áko éí Gérshan dineʼé baʼáłchíní daʼahílchíihii ahiiʼ hááʼahiyoolchíłígíí tʼáá ałtso dabizhéʼé yę́ę yaʼáłchíní danilı̨́įgo dabiʼdééltaʼ;
39 éí tádiindóó ashdladiin béédááhaijįʼ tʼááłáʼí nítínígo nidadoolʼaał biniyé yah ahekáhígíí níbaal biiʼ dahozdísinii yindaalnishii
40 tʼáá éí dabiʼdééltaʼígíí badaʼáłchíní ahiiʼ hááʼahiyoolchíiłii dabizhéʼé yę́ę yaʼáłchíní danilı̨́įgo naakidi mííldóó baʼaan hastą́ądi neeznádiindóó baʼaan tádiingo ánéelą́ą́ʼ.
41 Díí éí Gérshan dineʼé badaʼáłchíní ahiiʼ hááʼahiyoolchíiłii dabiʼdééltaʼígíí éí níbaal biiʼ dahozdísinii yindadoolnishgo yídaneelʼáanii tʼáá ałtso éí Mózes áádóó Éran bííłtaʼgo Bóhólníihii yee haadzíʼígíí yiʼiilaa.
42 Áádóó Miirárai dineʼé badaʼáłchíní daʼahílchíihii ahiiʼ hááʼahiyoolchíłígíí tʼáá ałtso dabizhéʼé yę́ę yaʼáłchíní danilı̨́įgo dabiʼdééltaʼ;
43 éí tádiindóó ashdladiin béédááhaijįʼ éí tʼááłáʼí nítínígo nidadoolʼaał biniyé yah ahekáhígíí níbaal biiʼ dahozdísinii góneʼ nidaalnishígíí
44 tʼáá éí dabiʼdééltaʼígíí badaʼáłchíní ahiiʼ hááʼahiyoolchíiłii táadi mííldóó baʼaan naakidi neeznádiingo ánéelą́ą́ʼ.
45 Díí éí Miirárai dineʼé badaʼáłchíní ahiiʼ hááʼahiyoolchíiłii Mózes áádóó Éran bííłtaʼii éí Bóhólníihii saad yee haadzíʼígíí bikʼehgo Mózes bee ahoʼdooʼniidígíí biʼjiilaa.
46 Mózes áádóó Éran índa Ízrel dineʼé yá aląąjįʼ naazíinii éí Líívai dineʼé dabiʼdééltaʼígíí tʼáá ałtso ahiiʼ hááʼahiyoolchíiłgo dabizhéʼé yę́ę yaʼáłchíní danilı̨́įgo dajííłtaʼ;
47 éí tádiindóó ashdladiin béédááhaijįʼ níbaal biiʼ dahozdísinii góneʼ nidaalnishii tʼááłáʼí nítínígo nidoolʼaałgo nidoolnish biniyé yah aheeskaígíí éí hééł nideiyéego
48 tʼáá éí dabiʼdééltaʼii tseebíidi mííldóó baʼaan ashdladi neeznádiindóó baʼaan tseebídiingo ánéelą́ą́ʼ.
49 Bóhólníihii áníinii bikʼehgo dahoʼdééltaʼígíí Mózes nihonínil; tʼááłáʼí jinítínígo bindazhdoolʼaałígíí bikʼehgo índa hééł nidajiyée dooleełígíí bikʼehgo éí Mózes hóółtaʼ; Mózes hachʼįʼ Bóhólníihii yee haadzíʼígíí biʼjiilaa.
