Numbers 5:1-31
5 Áádóó Bóhólníihii éí Mózes yichʼįʼ haadzíiʼgo ání,
2 Ízrel dineʼé bichʼįʼ handziihgo ábidiní, Łóód atsʼíís yiyáanii bąąh naałniihii áádóó tʼáá haʼátʼíhída bąąh hááłtsʼąʼii tʼáá ałtso índa tʼáá háiida éí daaztsáanii bitsʼíís bíhizhdééʼnáaʼgo bee jííchxǫʼii éí níbaal haalʼá bitsʼáhwiiníʼą́ą́góó hodaʼayołnííh;
3 diné, doodaiiʼ asdzánída nahgóó hodaʼayołnííh; éí níbaal haalʼá bitsʼáhwiiníʼą́ą́góó hodaʼayołnííh, áko níbaal haalʼáagi honishłónígi doo dahozhdoołchxǫǫł da.
4 Áádóó Ízrel dineʼé ákódaadzaa, hąąh nidahałniihii éí níbaal haalʼá bitsʼáhwiiníʼą́ą́góó hodaʼasniiʼ. Bóhólníihii éí Mózes yichʼįʼ yee haadzíʼígi átʼéego Ízrel dineʼé tʼáá ákódaʼiilaa.
Nináʼiilyééjí bee nahazʼáanii
5 Áádóó Bóhólníihii éí Mózes yichʼįʼ haadzíiʼgo ání,
6 Ízrel dineʼé bichʼįʼ handziihgo ábidiní, Diné łaʼ, doodaiiʼ asdzání łaʼ nihokááʼ dineʼé ádił nidaʼiisíhígíí éí yee Bóhólníihii yichʼįʼ doo ákǫ́ǫ́ áátʼįįdgóó áádóó yee ádihodiiltʼiʼgo yá ninánítłizhgo
7 yee ádił asiihígíí yee ádaa hodoolnih, áádóó doo ákǫ́ǫ́ ayííłʼįįdígíí yikʼé yichʼįʼ nináʼdoodlééł, índa ashdlaʼ aháádzooígíí tʼááłáʼí yínéidoozohgo yichʼįʼ doo ákǫ́ǫ́ áátʼįįdígíí yeidoonił.
8 Nidi diné yichʼįʼ doo ákǫ́ǫ́ áátʼįįdígíí doo hináágóó áádóó bikʼéí doo hólǫ́ǫ́góó tʼáadoo yichʼįʼ nináʼódléłígóó éí doo ákǫ́ǫ́ áátʼįįdígíí nináʼdoodléełgo Bóhólníihii bá nááʼiiłniihii baa didootʼáałgo deenástsʼaaʼ bee á kʼééhoodǫǫłii óóltąʼgo há kʼééhozhdoołdǫǫłii nááhizhdoołnih.
9 Áádóó Ízrel dineʼé éí diyingo náádayiiłniihii tʼáá átʼé nááʼiiłniihii yaa dayiijáhígíí tʼáá bííʼ neheleeh.
10 Diné tʼáá ádzíłtso diyingo náádajiiłniihígíí éí nááʼiiłniihii bí doo; tʼáá haʼátʼíhída nááʼiiłniihii baazhníláhígíí tʼáá bííʼ dooleeł.
Łeʼhasin bikʼijįʼ bee hazʼáanii
11 Áádóó Bóhólníihii éí Mózes yichʼįʼ haadzíiʼgo ání,
12 Ízrel dineʼé bichʼįʼ handziihgo ábidiní, Diné łaʼ hweʼasdzą́ą́ hatsʼą́ą́ʼ diné yił ahintʼįįhgo bił ahízhdéétʼiʼígíí yił asiihgo
13 áádóó éí diné bił neezhtéezhgo áádóó ájíítʼįįdígíí hahastiin bitsʼąą nanilʼingo ázhdoolchxǫʼígíí tʼáadoo bééhoozingóó índa ooʼíinii ádingo tʼáadoo hahodeelʼı̨́ʼígóó
14 áádóó hahastiin haa łeʼniizı̨́įʼgo beʼasdzą́ą́ jílı̨́įgo ázhdoolchxǫʼgo, doodaiiʼ doo ázhdoolchxǫʼ da nidi haa łeʼnízingo,
15 áko beʼasdzą́ą́ jílíinii éí nááʼiiłniihii yichʼįʼ hoł dooʼashgo néidiyoołnihígíí há yidookááł, éí ómer bee íʼneelʼąąhí bee tłʼoh naadą́ą́ʼ nanoolʼołí akʼáán ályaii tʼááłáhídi haaką́ągo éí akʼah doo bikʼi yeizdooził da áádóó tsin bijeeh dilidgo łikání halchinii fránkinsens wolyéii ałdóʼ doo bąąh ázhdoolíił da, háálá łeʼhasinjí nááhániihii átʼé; doo ákwii áhóótʼįįd bééhwiinííhjí nááhániihii átʼé.
16 Áádóó nááʼiiłniihii éí asdzání yił áháníjįʼ Bóhólníihii yichʼįʼ yił nidooʼash,
17 áko nááʼiiłniihii éí hashtłʼish łeetsʼaaʼ bee tó diyinígíí néididookááł índa níbaal biiʼ hodílzinii biiʼ niʼdóó łeezhígíí néididoojihgo tó yiih yidoojih,
18 áádóó nááʼiiłniihii éí Bóhólníihii binááł asdzání bił jidooʼashgo bitsiiʼ bikʼi náʼiizhdooʼał áádóó bee ééhániihgo nááhániihii éí łeʼhasinjí nááhániihii átʼéego bílákʼezhdookááł, áko nááʼiiłniihii éí tó hodiiłchʼihii* bee hóyéeʼjįʼ á haʼiidziihígíí dah yookáał doo.
19 Áko nááʼiiłniihii éí asdzání ádee hayiyííłdzíiʼgo íididooniił, Diné doo łaʼ nił neezhtéézhgóó, índa nahastiin doo bitsʼą́ą́ʼ dah diniyáágóó tʼah bóhwííníłníihgo áádóó tʼáadoo ádíínílchxǫʼgóogo, díí tó hodiiłchʼihii bee hóyéeʼjįʼ á haʼiidziihígíí doo nidídóołniił da.
20 Nidi nahastiin bitsʼą́ą́ʼ dah diniyáá ládą́ą́ʼ áádóó ádíínílchxǫʼ ládą́ą́ʼ diné náánáłaʼ nił neezhtéezhgo ákónítʼı̨́įgo,
21 áko nááʼiiłniihii éí asdzání ádee hayididoołdzihgo íididooniił, Bóhólníihii éí niʼdódziihgo áádóó nidineʼé bitahgi niʼditʼı̨́įgo ándoolííł, Bóhólníihii éí nitsooskʼid yididoołdził índa nibid yidínóołchał.
22 Díí tó bee hóyéeʼjįʼ ná haʼiidziihígíí niih hóóleʼgo nibid yidínóołchał índa nitsooskʼid yididoołdził. Áko asdzání ádidooniił, Tʼáá ákótʼée doo, tʼáá ákótʼée doo.
23 Áádóó nááʼiiłniihii éí díí hóyéeʼjįʼ á haʼiidziihígíí naaltsoos yisdisii yikááʼ íidoolííł áádóó tó hodiiłchʼihii yee kʼééʼiidoołchxǫǫł,
24 índa nááʼiiłniihii éí tó hodiiłchʼihii bee hóyéeʼjįʼ á haʼiidziihígíí asdzání yidiyoołdlı̨́ı̨́ł, áko tó bee hóyéeʼjįʼ á haʼiidziihígíí ayííłnaʼgo éí tóhígíí díchʼííʼ dooleeł.
25 Áko nááʼiiłniihii éí łeʼhasinjí nááhániihii átʼéego asdzání yílákʼee haidookáałgo Bóhólníihii binááł nááhániihii átʼéego bikááʼ nááʼiiniihí yichʼįʼ náásee yił didoolnih.
26 Áádóó nááʼiiłniihii bílákʼee akʼáán nááhániihii hadeezbingo bee ééhániihígíí átʼéego néididoojih; éí bikááʼ nááʼiiniihí yikáaʼgi yididoołił áádóó bikʼijįʼ índa tó hodiiłchʼihii éí asdzání yidiyoołdlı̨́ı̨́ł.
27 Áko asdzání éí tó bijiyííłdlą́ą́ʼdóó bikʼijįʼ asdzání ádoolchxǫʼgo índa bahastiin yichʼįʼ doo ákǫ́ǫ́ áátʼįįdgóó, tó hodiiłchʼihii bee hóyéeʼjįʼ á haʼiidziihígíí ayííłnaʼgo díchʼííʼ silı̨́įʼgo bibid yidínóołchał áádóó bitsooskʼid yididoołdził índa éí asdzání bidineʼé bitahgi biʼditʼı̨́į doo.
28 Ákondi asdzání doo ádoolchxǫʼgóogo, nidi tʼóó biʼdidéehgo éí doo bohodiitʼiʼgóó baʼáłchíní hodooleeł.
29 Áko díí éí łeʼhasin biniyé bee hazʼáanii átʼé; éí eʼasdzą́ą́ jílíinii hahastiin tʼah bíhojółníihgo bitsʼą́ą́ʼ dashdiiyáago ázhdoolchxǫʼgo,
30 doodaiiʼ hastiin łeʼdíʼnóozįįłgo beʼasdzą́ą́ jílı̨́įgo haa łeʼnízingo Bóhólníihii binááł asdzání yił dooʼash; nááʼiiłniihii éí díí bee hazʼáanii tʼáá átʼé bikʼehgo asdzání yaa nídóotʼįįł.
31 Áko diné éí doo ákwii átʼéii doo yee ádihodiiltʼiʼ da doo, nidi asdzání éí doo ákwii átʼéii yee ádihodiiltʼiʼgo naagháa doo.
Footnotes
^ Tó hodiiłchʼihii éí joodlą́ąʼgo ádił adzisiihígíí ííshją́ą́ íidoolíiłgo ááhyiłní.
