Numbers 8:1-26
8 Áádóó Bóhólníihii éí Mózes yichʼįʼ haadzíiʼgo ání,
2 Éran bichʼįʼ handziihgo ábidiní, Bee hoolʼiní tsostsʼidgo nídiiłtłiʼgo éí bá yadaʼiiʼáhígíí bílátahdóó bidáahjigo bee niʼdeezdíin doo.
3 Áko Éran tʼáá ákóʼiilaa; bá yadaʼiiʼáhígíí yidááhdóó sizı̨́įgo bee hoolʼiní deidiiłtłah; Bóhólníihii éí Mózes áyidííniidígíí biʼjiilaa.
4 Díí bee hoolʼiní bá yadaʼiiʼáhígíí bee ályaii éí óola tʼáá bízhání tʼáá bitłʼááhdę́ę́ʼ bichʼilátah hózhóón nahalingo naashchʼąąʼíjįʼ óola yitseedgo bee ályaa; bee hoolʼiní bá yadaʼiiʼáhígíí ádoolníiłgi Bóhólníihii éí Mózes yichʼįʼ yitʼíní áyiilaa yę́ę bikʼehgo ájiilaa.
Líívai dineʼé diyingo bitsʼąą dahastiʼ
5 Áko Bóhólníihii éí Mózes yichʼįʼ haadzíiʼgo ání,
6 Ízrel dineʼé bitahdę́ę́ʼ Líívai dineʼé bitsʼáníníiłgo bąąh dah hodííłdah.
7 Bąąh dah hółdéehgo kódíílííł; tó yee ádadidooldahígíí bikʼídadííłtah, áádóó bitsʼíís bikááʼgóó tʼáá átʼé deidooshih índa biʼééʼ deidoogisgo tʼáá bí ádadidooldah.
8 Índa bíniʼdii dóola yázhí nídeididoolóosgo áádóó akʼáán nááhániihii éí akʼáán dibahí akʼah bił ałtahgo ályaaígíí óóltąʼgo índa dóola yázhí náánáłaʼ éí ádił niʼiidzííhjí nááhániihii átʼéego náádeidiyoołnih.
9 Áádóó níbaal biiʼ dahozdísinii bichʼéédą́ąʼgi Líívai dineʼé nidííʼish, índa Ízrel dineʼé tʼáá dah yinééł nítʼééʼ áłah ádíílííł.
10 Áko Bóhólníihii binááł Líívai dineʼé nidííʼishgo Ízrel dineʼé Líívai dineʼé yikʼi dah dadidoolnih,
11 áádóó Éran éí Líívai dineʼé nilíinii Bóhólníihii binááł náásee bił nídiʼdilnihgo nááʼiiniihígi átʼéego Ízrel dineʼé bá baa hozhdidooʼááł, áko Bóhólníihii yá nidaalʼaʼgo nidaalnish doo.
12 Áko Líívai dineʼé éí dóola yázhí bitsiitʼáagi dah dadidoolnih, áádóó łaʼ éí ádił niʼiidzííhjí nááhániihii átʼéego índa łaʼígíí didlidgo nááhániihii átʼéego Bóhólníihii bichʼįʼ nááhidííłnih; éí Líívai dineʼé bá bee kʼééhodoodǫǫł biniyé nááhidííłnih.
13 Éran áádóó biyeʼké binááł Líívai dineʼé nidííʼishgo Bóhólníihii bichʼįʼ náásee bił nídiʼdilnihgo nááhániihígi átʼéego baa didííʼááł.
14 Líívai dineʼé atsʼádííniłgo Ízrel dineʼé bitahgóó Líívai dineʼé éí shí doo.
15 Ákódzaadóó bikʼijįʼ Líívai dineʼé éí nidaalʼaʼ doo biniyé níbaal biiʼ dahozdísinii góneʼ yah adookah; bąąh dah dahodííłdahgo náásee bił nídiʼdilnihgo nááʼiiniihígi átʼéego náádahodiyííłnih.
16 Háálá éí Ízrel dineʼé bitsʼą́ą́dóó tʼáá íiyisí shaa hoʼdeetʼą́; éí Ízrel dineʼé tʼáá ałtso alą́ąjįʼ daazhchíinii bitsáskʼehgi Líívai dineʼé ádá nídiishʼnil.
17 Ízrel dineʼé alą́ąjįʼ nidahaazhchíinii tʼáá ałtso shí; éí tʼáá áłah diné danilínígíí áádóó alı̨́ı̨́ʼ éí Ííjip kéyahdi alą́ąjįʼ daazhchíinii niséłtseed bijı̨́ı̨́dą́ą́ʼ ádá áásésįįdgo diyingo nidiníʼą́.
18 Áádóó Ízrel dineʼé alą́ąjįʼ daazchíinii tʼáá ałtso bitsáskʼehgi Líívai dineʼé nídiinil.
19 Líívai dineʼé aa yílyáii dajílı̨́įgo Ízrel dineʼé bitsʼą́ą́dóó Éran áádóó biyeʼké baa honínil; éí níbaal biiʼ dahozdísinii góneʼ Ízrel dineʼé bá nidajilʼaʼ doo áádóó Ízrel dineʼé bá kʼéédahojoołdǫǫł doo, áko Ízrel dineʼé bitahgi doo naałniih doołnih da; Ízrel dineʼé éí níbaal biiʼ hodílzinii yitʼáahjįʼ nídadikahgo ákótʼée doo.
20 Kótʼéego Mózes áádóó Éran índa Ízrel dineʼé dah yinéełii tʼáá ałtso Bóhólníihii éí Mózes yichʼįʼ yee haadzíʼígíí tʼáá átʼé bikʼehgo Ízrel dineʼé éí Líívai dineʼé bídadéétʼiʼii bá baa nidziskai.
21 Líívai dineʼé ádadooldeeʼ índa biʼééʼ deizgis, áádóó Éran éí Bóhólníihii binááł náásee bił nídiʼdilnihgo nááʼiiniihígi átʼéego nááhwiisniiʼ, índa Éran éí bee há kʼééhodǫǫłii bee hoʼdííłdeeʼ.
22 Áádóó bikʼijįʼ Líívai dineʼé nidaalʼaʼ doo biniyé níbaal biiʼ dahozdísinii góneʼ yah eekaigo Éran áádóó biyeʼké bá nidajilʼaʼ; Bóhólníihii éí Mózes yichʼįʼ yee haadzíʼígíí bikʼehgo Líívai dineʼé bídéétʼiʼgo bá ádaʼjiilaa.
Líívai dineʼé naanish yíighah nidadiʼyoołeełii
23 Áádóó Bóhólníihii éí Mózes yichʼįʼ haadzíiʼgo ání,
24 Díí éí Líívai dineʼé bídadéétʼiʼ: naadiin ashdlaʼdóó yówehgo béédááhaígíí éí níbaal biiʼ dahozdísinii góneʼ nidaalʼaʼ doo,
25 índa ashdladiindóó yówehgo nibéédahaháahgo binaanish yíighah nidaʼiiłeeh doo áádóó doo nináádaalʼaʼ da doo,
26 nidi dabikʼisóó níbaal biiʼ dahozdísinii góneʼ áká anídaalwoʼgo tʼáadoo leʼé yaa ádahalyą́ą doo; tʼáá bí tʼéí doo yéego nidaalnish da doo. Díí kótʼéego Líívai dineʼé bídadéétʼiʼii hazhóʼó ádíílííł.