Numbers 9:1-23
9 Bóhólníihii éí Mózes kóyidííniid, éí Dził Sáínai honoojíidi naaki náhááh góneʼ átsé nídízídígíí binih íídą́ą́ʼ Ííjip kéyahdę́ę́ʼ chʼééjíʼnáago kóní,
2 Bíniʼdii Ízrel dineʼé atisʼadeesdzá bee bééhániihii baa náhwiilzhíísh góneʼ yaa ninákah doo.
3 Díí yiziłígíí binih dı̨́ı̨́ʼtsʼáadah jı̨́ı̨́ góneʼ iʼííʼą́ągo tʼáá bá náhootʼaah góneʼ yee nihwiizʼáanii tʼáá átʼé índa bikʼehgo hoogáałii tʼáá átʼé bikʼehgo baa nináhkah doo.
4 Áádóó Mózes éí Ízrel dineʼé yichʼįʼ haadzííʼ, Éí atisʼadeesdzá bee bééhániihii baa nináhkah doo.
5 Áko átsé nídízídígíí binih dı̨́ı̨́ʼtsʼáadah jı̨́ı̨́ góneʼ iʼííʼą́ągo atisʼadeesdzá bee bééhániihii Sáínai honoojíigi baa nidziskai; Bóhólníihii éí Mózes yichʼįʼ yee haadzíʼígíí tʼáá átʼé bikʼehgo Ízrel dineʼé ádaʼiilaa.
6 Áádóó diné łaʼ bitsʼíís daaztsą́ą́ léiʼ yee adadoolchxǫʼgo biniinaa tʼáá éí bijı̨́ tʼáadoo atisʼadeesdzá bee bééhániihii doo yee atah nidahóła átʼée da silı̨́ı̨́ʼ; éí bijı̨́ Mózes áádóó Éran bidááhdóó nijíkai.
7 Áko díí diné ádahałní, Nihí diné daaztsą́ą́ léiʼ bee ádadeelchxǫʼ, áko haʼátʼéegoshąʼ tʼą́ą́ʼ ádanihiʼdólzingo Bóhólníihii bichʼįʼ nááhániihii Ízrel dineʼé bitahgi bee hooʼaʼgo doo náádahidiilnih da?
8 Áádóó Mózes áháłní, Tʼáá kweʼé nisoozı̨́, áko haash yitʼéego Bóhólníihii nihá hadoodzihígíí dideestsʼı̨́ı̨́ł.
9 Áko Bóhólníihii éí Mózes yichʼįʼ haadzíiʼgo ání,
10 Ízrel dineʼé ábidiní, Nihí tʼáá háiida, doodaiiʼ nihaʼáłchíní náás daʼahílchíihii éí diné bitsʼíís daaztsą́ągo yee ádoolchxǫʼgo, doodaiiʼ háájída nízaadgóó naagháago éí Bóhólníihii bichʼįʼ atisʼadeesdzá bee bééhániihii tʼáá íidoolííł.
11 Naaki nídízííd binih dı̨́ı̨́ʼtsʼáadah jı̨́ı̨́ góneʼ iʼííʼą́ągo ádeidoolíiłgo dííkʼǫsh tʼáágééd bááh ályaii índa chʼil díchʼíiʼii yił deidooyı̨́ı̨́ł.
12 Abíníjįʼ doo łaʼ tʼáá chʼídínóołnah da; bitsʼin nidi doo łaʼ kʼídazhdootih da; atisʼadeesdzá bee bééhániihii bibikʼeh hoogáałii tʼáá átʼé bikʼehgo ádeidoolííł.
13 Nidi diné ádooldeeʼii áádóó doo chʼaanaayáii, áko atisʼadeesdzá bee bééhániihii tʼáadoo áyiilaagóogo éí Ízrel dineʼé bitsʼą́ąjįʼ bidiʼyoolyééł, háálá Bóhólníihii bichʼįʼ nááʼiiniih baa hoolzhiizhgo tʼáadoo nááʼdziisniiʼ da; éí diné ádił adzisiihígíí bee hohodiitʼiʼgo nijigháa doo.
14 Áádóó déʼéyóní łaʼ nihitahgi tʼóó átsééd kééhatʼı̨́įgo éí Bóhólníihii bichʼįʼ atisʼadeesdzá bee bééhániihii íidoolíiłgo bikʼehgo hoogáałii tʼáá bikʼehgo ádoonííł; déʼéyóní, doodaiiʼ diné kéyahgi yizhchíinii tʼáá aheełtʼéego bá bikʼehgo hoogáałii tʼááłáʼígíí nihee hólǫ́ǫ doo.
Kʼos éí níbaal biiʼ hodílzinii bikʼiildoh (Ex. 40:34-38)
15 Níbaal biiʼ hodílzinii, éí neeznáago bikʼeh óʼooʼníiłii bee bééhániihii biiʼ sinilii, niitʼą́ bijı̨́ı̨́dą́ą́ʼ kʼos bikʼiildoh; eʼeʼááhdóó náhoolʼįįhjįʼ níbaal biiʼ hodílzinii bikáaʼgi kǫʼ nahalingo dah yildoh łeh.
16 Áko tʼáá áłahjįʼ ákótʼé: jı̨́įgo kʼos bikʼi néildoh; tłʼéeʼgo éí kǫʼ nahalingo bikʼi néildoh.
17 Áádóó níbaal biiʼ hodílzinii bitsʼą́ą́dóó kʼos dah nídiildohgo bikééʼdóó Ízrel dineʼé nihináánáʼnééh, áko kʼos niʼjįʼ nináldohgi ákwii Ízrel dineʼé biníbaal ninádeiʼnił.
18 Bóhólníihii éí Ízrel dineʼé yichʼįʼ hanáánádzihgo nihináánáʼnééh, áádóó Bóhólníihii hachʼįʼ hanáánádzihgo haníbaal ninádajiʼnił; níbaal biiʼ hodílzinii bikááʼ kʼos dah yildohígíí bikʼehgo Ízrel dineʼé dahaníbaal biiʼ hashtʼedazhdítʼé.
19 Áko tʼáá ákwii nízaadgóó níbaal biiʼ hodílzinii bikááʼ kʼos dah yildohgo ląʼí yiłkááh; Ízrel dineʼé éí Bóhólníihii yee hasʼáanii yikʼeh dahółʼı̨́įgo doo dah náádiiʼnéeh da.
20 Kótʼéego łahda tʼáá díkwíí yiłkáahjįʼ níbaal biiʼ hodílzinii bikáaʼgi kʼos dah yildoh łeh, áádóó Bóhólníihii haadzíʼígíí bikʼehgo tʼáá ákwii kéédahojitʼı̨́į łeh, áádóó Bóhólníihii hachʼįʼ hanáánádzihgo bikʼehgo nihináájíʼnééh.
21 Díí kótʼéego tʼáá ákwii kʼos dah yildohgo eʼeʼááhdóó náhoolʼįįh, áko abínígo kʼos dah nídiildohgo nihináájíʼnééh, áko jı̨́įgo, doodaiiʼ tłʼéeʼgoda kʼos dah nídiildohgo dah náázhdiiʼnééh.
22 Éí doodaiiʼ naaki jı̨́įjįʼ, doodaiiʼ nídíziʼjįʼ, doodaiiʼ náhahjįʼ éí níbaal biiʼ hodílzinii bikáaʼgi kʼos dah yildohgo tʼáá ákweʼé Ízrel dineʼé dabiníbaal yiiʼ kéédahatʼı̨́įgo doo dah náádiiʼnéeh da łeh, nidi kʼos dah nídiildohgo índa nihináánáʼnééh,
23 Bóhólníihii yee haadzíiʼii bikʼehgo tʼáá ákwii dah joonéeł łeh, áádóó hanáánádzihgo dah náádazhdiiʼnééh, áádóó Bóhólníihii éí Mózes yichʼįʼ hanádzihígíí bikʼeh dahojíłʼı̨́ı̨́ nítʼééʼ.
