Philemon 1:1-25
1 Paul, Christ Jesus baa hashneʼgo biniinaa awáalyaaí nishłíinii, áádóó Timothy nihikʼis nilíinii,
Failííman* ayóóʼííníiʼníigo bił nideiilnishígíí,
2 áádóó Áfiya nihilah [ayóóʼádeíníiʼnínígíí], áádóó Arkípas bił siláo daniidlínígíí áádóó nighangi daʼoodlání áłah nádleehígíí bichʼįʼ naaltsoos íilnééh:
3 Diyin God nihiTaaʼ áádóó Bóhólníihii Jesus Christ bibee ajoobaʼ áádóó bibee achʼįʼ hózhǫ́ náhásdlı̨́įʼii yee nihikʼijidlíi leʼ.
Failííman beʼayóóʼóʼóʼniʼ índa biʼoodląʼ
4 Tʼáá áłahjįʼ shisodizin bee nénáshniihgo shiDiyin God bichʼįʼ ahééh nisin.
5 Háálá Bóhólníihii Jesus índa Diyin God bidiyı̨́ı̨́ʼ danilíinii tʼáá ałtso ayóóʼííníʼníigo áádóó baa dzíínílíigo naa hodiistsʼaʼ.
6 Áko Christ bitsʼą́ą́dóó yáʼádaatʼéehii tʼáá yíní átʼéegi bee akʼiʼdiitįįh binahjįʼ neʼoodląʼ idééłníi doo biniyé sodiszin.
7 Shikʼis nílíinii, ayóóʼíʼííníʼnínígíí tʼáá íiyisí baa nihił hóózhǫǫd, áádóó bee haʼiisisniʼ, háálá Diyin God bidiyı̨́ı̨́ʼ ninahjįʼ bijéí bikʼéédahóótaad.
Paul éí Onésimas yá náʼookąąh
8 Ákótʼé bąą Christ biniitʼaa tʼáá íiyisí doo sistiʼgóó kódíínííł nidideeshniił daatsʼí,
9 nidi shí Paul, hastóí nishłı̨́įgo áádóó kʼad Jesus Christ baa hashneʼgo biniinaa awáalyaaí nishłı̨́įgo ayóóʼánóshʼníigo nánooshkąąhjígo shił yáʼátʼééh.
10 Onésimas,* Christ bee shiyeʼ nilíinii, bá nánooshkąąh, éí awáalyaadi sédáago oodlání kʼehgo bizhéʼé sélı̨́ı̨́ʼ.
11 Éí tʼah nahą́ądę́ę́ʼ doo ná chooʼı̨́į da nítʼééʼ, nidi kʼad éí ná chooʼı̨́, shí ałdóʼ shá chooʼı̨́.
12 Nidi kʼad nichʼįʼ nihééhoníłʼaʼ, tʼáá shí shiyeʼ nídíłʼaʼ nahalingo akǫ́ǫ́ náhodíłʼaʼ.
13 Haneʼ yáʼátʼéehii baa hashneʼgo biniinaa awáalyaaí nishłı̨́įgo shá nanilʼaʼ yę́ęgi shá naalʼaʼ doo nisin nítʼééʼ.
14 Nidi íinínízinii tʼáá bídin doo haʼátʼíhída baa niséyáa da, áko doo tʼáá kʼad bíninishchéehgo shaa jiidííbaał da, nidi tʼáá ni íinínízinii bikʼehgo ádiiʼnííł.
15 Hoolʼáágóó shónáhwiidííłtʼeeł daatsʼí biniyé haa danízahjįʼ nitsʼáhoʼdeeltʼeʼ shaʼshin,
16 áádóó índa doo naalteʼ jílı̨́ı̨́góó, nidi naalteʼ jílı̨́ı̨́ nítʼéeʼii biláahdi átʼéego nikʼis ayóóʼííníʼníinii jílı̨́į dooleeł! Shí shichʼįʼgo tʼáá íiyisí ákótʼéego haa nitséskees, nidi nijígo tʼéiyá tʼah aláhídi átʼéego tʼáá diné jílı̨́įgo áádóó Bóhólníihii bee hoł háíníʼáázh jílı̨́įgo haa nitsíníkees dooleeł!
17 Áko shikʼis jílı̨́ shííníʼníigo, tʼáá náshididííłtéłígi átʼéego nááhodidííłtééł.
18 Nichʼįʼ doo ákǫ́ǫ́ ádzaa ládą́ą́ʼ, éí doodaléiʼ bąąh háínítsi ládą́ą́ʼ* éí shígo shikʼijįʼ naaltsoos bikʼi díízoh.
19 Shí Paul díí shílaʼ bee akʼeʼashchí: Tʼáá shí nináʼdeeshdlééł. Azhą́ hinínáago bee naa háíłʼáhígíi* nidi, éí doo béinidiyeeshnih da.
20 Haaʼíshąʼ shikʼis, Bóhólníihii binahjįʼ baa hózhónígi átʼéego áshidíílííł. Bóhólníihii bee shikʼééhodííłtah.
21 Akʼeh honíłʼínígíí bee naa jóshłíigo, ándishnínígíi nidi biláahgo ádííníiłgo* shił bééhózingo nichʼįʼ akʼeʼashchí.
22 Áádóó sédáa dooleełgi ałdóʼ tʼáá áłdįįłtʼéego shá ádíílííł; shá sodadołzingo tʼah nítʼéeʼda lá tʼáá ánółtso nihaa nánísdzáa łeh nisingo bíká shił chohooʼı̨́.
Kʼé haʼníigo bee naaltsoos niiltʼiʼii
23 Épafras, Christ Jesus baa hwiilneʼgo biniinaa bił awáalyaa sékéhígíí kʼé niłní,
24 Mark áádóó Aristárkas áádóó Díímas índa Luke, shił nidaalnishígíí, ałdóʼ kʼé daniłní.
25 NihiBóhólníihii Jesus Christ bibee ajoobaʼ nihiiʼ naazíinii yił hólǫ́ǫ leʼ. Tʼáá ákótʼée doo.
Footnotes
^ Failííman éí oodlání nilı̨́įgo Kalásiigi oodlání áłah nádleehii daatsʼí atah nilı̨́ı̨́ nítʼééʼ.
^ Yízhí Onésimas, nínígíí éí chooʼíinii jiníigo óolyé. Col. 4:9.
^ Naalteʼ yóóʼiilwoʼgo yá naalʼaʼí binaalyeʼé, doodaiiʼ bibéeso ałdóʼ łahda yee aniʼı̨́ı̨́h.
^ Paul hojilneʼgo bitsʼą́ą́dóó Failííman oosdląąd, ááhyiłní.
^ Paul éí Failííman hanaalteʼ béézhdidoochił laanaa hóʼníigo áháłní daatsʼí.
