Philippians 1:1-30
1 Paul áádóó Timothy, Jesus Christ yá naalʼaʼí niidlíinii, Christ Jesus dayoodlą́ągo Diyin God bidiyı̨́ı̨́ʼ danilíinii Fílipaigi* kéédahatʼíinii tʼáá ałtso, daʼoodlání yá naazíinii índa daʼoodlání yaa ádahalyáanii tʼáá óóltąʼgo bichʼįʼ naaltsoos íilnééh:
2 Diyin God nihiTaaʼ áádóó Bóhólníihii Jesus Christ bibee ajoobaʼ índa bibee achʼįʼ hózhǫ́ náhásdlı̨́įʼii yee nihikʼijidlíi doo.
Paul éí Fílipaigi oodlání danilíinii yá sodilzin
3 Tʼáá nihénínáshnih bikʼeh shiDiyin God bichʼįʼ ahééh nisin.
4 Tʼáá áłahjįʼ tʼáá nihá sodiszin bikʼeh shił hózhǫ́ǫgo tʼáá ánółtso nihá náʼooshkąąh.
5 Tsʼídá áłtséedi haneʼ yáʼátʼéehii deisoohdląąd yę́ędóó díí jı̨́ı̨́góó bee ahił daniidlínígíí baa ahééh nisin.
6 Díí tʼáá íiyisí shił bééhózin: Diyin God naanish yáʼátʼéehii nihiyiʼ yaa nídiidzáhígíí éí náásgóó nihinaalnishgo Jesus Christ nádzá bijı̨́įjįʼ ałtso łaʼyidoolííł.
7 Tʼáá ánółtso shijéí bee ayóóʼánihííníshʼníigo bąą kótʼéego nihaa nitséskees dooígíí shá bohónéedzą́, háálá awáalyaaí nishłı̨́įgo, doodaiiʼ doo awáalyaaí nishłı̨́į da nidi, haneʼ yáʼátʼéehii bichʼą́ą́h yáshtiʼgo índa bohoníłdzilgo áshłéhígíí shá ashjaʼósingo, Diyin God yee shaa joozbaʼígíí tʼáá ánółtso shił ałtsʼą́ą́ʼ daʼnołkʼiiz.
8 Jesus Christ bibee ayóóʼóʼóʼníinii bee tʼáá ánółtso ayóó átʼéego nihídin nishłı̨́įgo Diyin God shá bił bééhózin.
9 Díí bíká sodiszin: ił ééhózin índa tsʼídá átʼéegi akʼiʼdiitįįh, éí niheʼayóóʼóʼóʼniʼ tʼáá bił ląʼígo nihee dahólǫ́ǫ doo.
10 Áko yáʼádaatʼéehii nihił béédahózingo bee lą́ nidaʼayohłeeh doo. Índa Christ nádzá beiníłką́ąjįʼ yáʼátʼéehgo nitsídaahkeesgo tʼáadoo bee nihikʼídahótʼahí da doo.
11 Áádóó Jesus Christ bee tsʼídá tʼáá ákogi éʼétʼé bineestʼąʼ nihee nídahoodleeł doo biniyé nihá bíká sodiszin, áko éí bee Diyin God ayóó ájítʼéhígíí bééhodoozįįł, índa bee haa haʼniih doo.
Hinishnánígíí éí Christ átʼé
12 Shikʼisóó, shichʼįʼ áhóótʼįįdígíí éí haneʼ yáʼátʼéehii hózhǫ́ náás kwíidoolííł biniyé shichʼįʼ áhóótʼįįdgo nihił béédahózin doo nihóshʼní.
13 Christ biniinaa awáalyaaí nishłínígíí éí aláahgo naatʼáanii bisiláo aa ádahalyáanii tʼáá ałtso áádóó diné tʼáá ałtsogóó bił béédahoozin.
14 Awáalyaaí nishłínígíí bąą Christ bee ałkʼisóó dajílínígíí kʼasdą́ą́ʼ tʼáá ádzíłtso ałdóʼ Bóhólníihii bee dahadziilgo ádahoʼdiilyaa, áko tʼáadoo bikʼee hoł daayéʼí, índa tʼah náábíláahgo doo dadzistiʼgóó Diyin God bizaad bee yádajiłtiʼ dadzizlı̨́ı̨́ʼ.
15 Ákondi łaʼ daʼoołchʼı̨́įdgo áádóó saad ídeiʼáahgo Christ yaa dahalneʼ, nidi łaʼ éí yáʼátʼéehgo nitsáhákees bee yaa dahalneʼ.
16 Saad dahółǫ́ǫgo achʼą́ą́h nidaaʼnaʼgo Christ yaa dahalneʼígíí éí tʼóó ádaatʼı̨́įgo ádaaní; awáalyaaí nishłı̨́įgo díí bee hódaʼiitsʼih dashóʼníigo ádaatʼı̨́.
17 Nidi yáʼátʼéehgo nitsídaakeesígíí éí ayóóʼádashóʼníigo Christ yaa dahalneʼ, háálá awáalyaa sédáago haneʼ yáʼátʼéehii bichʼą́ą́h yáshtiʼ doo biniyé nishiʼdeeltı̨́įgo hoł béédahózin.
18 Ákoshąʼ haitʼée doo? Hániʼdiíneeʼ, tʼáá azlı̨́ʼígi átʼéego baa nijikai, tʼóó ádajitʼı̨́įgoda, éí doodaiiʼ tʼáá aaníí ádajitʼı̨́įgoda, Christ baa dahojilneʼígíí éí bąą shił hózhǫ́. Áádóó tʼáá aaníí bąą shił hózhǫ́ǫ doo.
19 Háálá shá sodadołzingo áádóó Jesus Christ biNíłchʼi Diyinii shíká adoolwołgo shéédidoochiłgo shił bééhózin.
20 Tsʼídá doo tʼóó shaa yáhodoosįįł daígíí tʼáá awołí bee bíká shił chohooʼı̨́įgo neíníshłí, nidi tsʼídá tʼáadoostiʼee kʼad hinishná índa tʼáá átʼé yę́ęgi átʼéego hinishnáá léiʼ, doodago éí dasétsą́ą́ léiʼ, tʼáá sézı̨́ı̨́ nítʼééʼ shee Christ baa haʼniih doo.
21 Háálá hinishnánígíí éí Christ átʼé, áádóó dasétsánígíí éí aʼídeeł átʼé.
22 Nidi tʼáá hinishnáago éí naanish yáʼádaatʼéehii ląʼígóó łaʼnáádadeeshdliił, áko nidideeshʼáłígíí éí doo shił bééhózin da.
23 Háálá díí naakigo hazʼánígíí tʼáá íiyisí baa nitséskees. Dashdooyaʼgo Christ bił hojílǫ́ǫ laanaa nisin, háálá áájí íiyisí yáʼátʼééh.
24 Ákondi tʼáá hinishnáago éí aají tʼah aláhídi átʼéego nihá bohónéedzą́.
25 Díí tʼáá íiyisí shił bééhoozin, éí tʼáá hinishnáa doo, áádóó tʼáá ánółtso nihił honishłǫ́ǫgo niheʼoodląʼ danéeséeh doo, áko éí bąą nihił dahózhǫ́ǫ doo.
26 Áko nihaa nánísdzáago shinahjįʼ tʼah biláhígo Christ Jesus baa dadzíínóhłíi dooleeł.
27 Áyąądą́ą́ʼ Christ baa haneʼ yáʼátʼéehii nizhónígo bikʼeh deínóhkáah leʼ, áko nihaa níyáago, éí doodaiiʼ doo aadi naasháa da nidi, tʼáá aheełtʼéego danołdzilgo nidasoozı̨́įgo áádóó tʼááłáʼí nitsáhákees bee haneʼ yáʼátʼéehii deinohdlánígíí bee ahąąh deínółdzíiłgo nihaa náhodiistsʼı̨́įh doo.
28 Nihitsʼą́ą́jí danilíinii tsʼídá tʼáadoo bikʼee nihił daayéʼí. Jó, éí áhodidooldįįłígíí bee hwéédahózinii átʼé, nidi nihíjí tʼéiyá yisdánihidiʼdooʼniłígíí Diyin God bitsʼą́ą́dę́ę́ʼ bee nihééhózinii átʼé!
29 Háálá doo tʼóó Christ deidoohdląął tʼéí biniyé nihikʼidahodzisdliʼ da, nidi Christ bá tiʼdahwiidoohnih ałdóʼ biniyé nihikʼidahodzisdliʼ.
30 Áko haneʼ yáʼátʼéehii yitsʼą́ą́jí danilíinii tʼáá shizááká bichʼįʼ naasdzilgo dashoołtsą́ áádóó kʼad shaa dahodoohtsʼaʼígi átʼéego nihí ałdóʼ tʼáá nihizááká nidaałdzil.
Footnotes
^ Gríis kéyah náhokǫsjígo Masedóniya hoolyéedi kin haalʼá Fílipai hoolyéé nítʼééʼ. Áadi Paul tsʼídá áłtsé nahasneʼígíí yíníłtaʼ. Acts 16:12.
