Proverbs 1:1-33
1 David biyeʼ Sálaman éí Ízrel binanitʼaʼí bizaad bee hodoodząąłii.
2 Áko hódzą́ áádóó naʼnitin bił béédahodoozįįł áádóó saad bikʼidiʼdootı̨́įłii yaa ákodadínóozįįł.
3 Dahozhdooyąąłii áádóó tʼáá ákogi ádajitʼı̨́į doogo áádóó doo haada yitʼéii índa aheełtʼéego dajiináa doo biniyé bínahodiʼneestą́ąʼii nídazhdidoolééł.
4 Doo dahóyáanii dahóyą́ągo ádabidoolííł, áádóó ániid nidaakaii bił éédahodoozįįł índa yáʼátʼéehii nideidiyiiʼaahgo ádabidoolííł.
5 Diné hóyáanii íistsʼą́ąʼ doo, áádóó náásgóó óhoołʼaah doo; diné bił ééhózinii hódzą́ągo yátiʼ tʼéí hátʼı̨́į doo,
6 áko saad bee hodoodząąłii, áádóó ááhyiłníinii yikʼidiʼyiitįįh doo; diné dahóyáanii bizaad índa saad doo bééhózingóó yee hadahadziihii bikʼizhdiʼyiitįįh doo.
7 Bóhólníihii jidósin jileehdóó hoł niʼééhwiizįįhgo hahalzhish, nidi diné doo ádahalyáanii hódzą́ índa naʼnitin ąąh dayiiłkóóh.
Dinééh bá kótʼé haʼníinii
8 Shiyeʼ, nizhéʼé binaʼnitin yísíníłtsʼą́ą́ʼ áádóó nimá yee naninitinii yóóʼadóóʼááł lágo.
9 Éí bee ajoobaʼ nitsiináztʼiʼ doo áádóó yooʼ nizhóníii hayoʼ áhojiilaa nahonílin doo.
10 Shiyeʼ, bąąhági ádaaníiłii, Hágo nahgóó diikah, daniłníigo bikééʼ dah doóyaʼ lágo.
11 Hágo nahgóó diikah, daaníigo, níláahdi diné dadiyiilyéełgo dił bitsʼánílı̨́įgo ádadiilníiłii bibaʼ naháatą́ą doo. Diné tʼáadoo átʼéhígóó naagháii tʼáadoo biniinaaní da nidi baa nihidiikah:
12 jishcháaʼgi átʼéego tʼáá dahináago adahidiilnah; łeehwiiʼnííł góyaa ahiʼníłígíí nahalingo tʼáá naazı̨́ı̨́ nítʼééʼ adahidiilnah:
13 binaalyeʼé daʼílíinii shódeidiiltʼeeł áádóó naalyeʼé ałtso dadiilnéełgo nihighan góneʼ hadadidiilbı̨́ı̨́ł:
14 nihidiináahgo tʼáá áníiltso nihidah naʼayizii tʼááłáʼí ádadiilnííł.
15 Shiyeʼ nílíinii, ákódaaníinii dadeeskaigóó bikééʼ dah doóyaʼ lágo; tʼááká bikékʼedóoyaʼ lágo.
16 Háálá doo yáʼátʼéehii tʼéiyá yíkadadiltsʼiʼ áádóó haneetehee diné nideiłtseedgo bidił bitsʼádaazlı̨́įgo ádeileʼ.
17 Tsídii binááł łoh bá niitʼáahgo doo áajįʼ digháah da łeh.
18 Tʼáá bí nidabidiʼdootsiłgo bidił bitsʼádaazlı̨́į doo yiniyé naháaztą́, tʼáá bí nidabidiʼdootsił yiniyé aa nidahaakai.
19 Tʼáá ádzíłtso tʼáá áchą́hwíídéeniʼgo naalyeʼé aghadajiiʼníiłii éí tʼáá hó hweʼiinaʼ haa néididoodlééł.
Hódzą́ náʼookąąh
20 Hódzą́ tłʼóoʼdi nihidilgháásh; kintah daʼnítiingóó biinééʼ diitsʼaʼ.
21 Áłah daʼílı̨́ı̨́góó nidilghaash, yah adaʼiiztiingóó índa diné tʼáá ałtso bitahgóó biinééʼ diitsʼaʼgo
22 kóní, Doo dahonohsáanii haa nízáágóoshąʼ doo nihidahódząʼ ayóóʼádeínóhʼníi doo? Haa nízáágóoshąʼ diné yąąh nidayiiłhaałii ąąh nidayiiłhaałgo bąą bił nidahoozhǫǫh doo? Haa nízáágóoshąʼ diné doo ádahalyáanii ił ééhózin deijoołxáa doo?
23 Hódzą́ ání, Biniinaa nihichʼahoshishkéii bitsʼą́ąjįʼ naanáhkááh. Shoo, shiníłchʼi nihaa dideeshʼááł; shizaad béédahodoosįįłii nihichʼįʼ bééhózínígo ádadeeshłííł.
24 Hágo nihidííniid nítʼééʼ; dooda danoozı̨́ı̨́ʼ; éí bąą nihichʼįʼ dah didiishniiʼ nítʼééʼ; doo łaʼ shaa náʼáhodééltʼı̨́ʼí da.
25 Bee nanihinishtinii tʼáadoo nánídlínígóó baa nitsídasookééz, áádóó nihichʼahoshishkéhígíí doo danoozı̨́įʼ da.
26 Éí bąą shí ałdóʼ bááhádzidgo áhooníiłii bee nihił hodeeshzhiizhgo nihaa anáshdloh doo. Nídasoołdzíidgo nihá nahashtʼiʼ doo.
27 Tʼóó báhádzidígi átʼéego nídasoołdzíidgo áádóó bee atínihiʼdilnéehii náátsʼóʼoołdísii nahalingo nihichʼįʼ yiyołgo índa achʼįʼ nahwiiʼná áádóó yínííł nihikʼiildogo nihaa anáshdlohgo nihá nahashtʼiʼgo,
28 áadi índa shichʼįʼ sodadilzin doo, nidi doo bichʼįʼ hadeesdzih da. Tʼáá nináʼdeetʼįįdjįʼ shíkadadínóotaał, nidi doo shikʼídadookah da.
29 Háálá ił ééhózin dajijoołáá nítʼééʼ áádóó Bóhólníihii dólzin tʼáadoo nidazdeezʼą́ą da.
30 Shinaʼnitin tʼááłáʼí nidi tʼáadoo łaʼ dazniizı̨́įʼ da; hoshishkéhígíí nidi tʼóó bá dazdoosʼnih.
31 Éí bąą tʼáá hó ádajíítʼįįdii bineestʼąʼ nídazhdoodı̨́ı̨́ł áádóó tʼáá hó bindahodzizgizii bee hwiih dadzizlı̨́įʼgo tiʼnídahodiyoołnih.
32 Háálá doo dahóyáanii atiin yitsʼádahaaskaii tʼáá éí ninádabidoołtsił; doo áhályání dineʼé bił ádaʼíízįįdgo tʼáá éí nábidoogą́ą́ł.
33 Nidi tʼáá háiida shíistsʼą́ąʼii doo bichʼįʼ nahwiiʼnáágóó kééhatʼı̨́į doo, áádóó báádahadzidii doo bikʼee bił yééʼgóó hashtʼedítʼéego kééhatʼı̨́į doo.
