Proverbs 10:1-32
10 Sálaman bizaad bee hodoodząąłii: Ayeʼ hóyáanii éí bizhéʼé yił hóshóonii nánídlı̨́, nidi ayáázh doo áhályáanii éí bimá yínííł yiih yiłtʼeeh.
2 Tsiʼnaʼadá yee atʼíinii tʼáadoo nídoodleełí da, nidi tʼáá ákogi éʼétʼéii aniné yitsʼáʼiinííł.
3 Bóhólníihii éí tʼáá ákogi átʼéii biiʼ sizíinii doo tʼáá dichin nilı̨́įgo yiʼdoołnih da, nidi doo yáʼáshóonii yídin nilínígíí nahjįʼ hayiiłtłʼiid.
4 Diné bił hóyéeʼgo naalnishii bahojoobáʼí yileeh, nidi haleebee yáʼátʼéehgo yilnishii éí atʼįįh.
5 Shı̨́įgo tʼáadoo leʼé hashtʼeʼnijiiníiłii éí ayeʼ hóyáanii jílı̨́, nidi daʼagizhgo ayeʼ tʼóó ałhoshii tʼóó baa yáhásin.
6 Tʼáá ákogi átʼéii éí bikʼihojidlí, nidi diné doo yáʼáshóonii ił hááhoniłchaʼ bizéeʼdi yinéesʼı̨́ı̨́ʼ.
7 Tʼáá ákogi átʼéii nilíinii bééjílniihgo bee hakʼihojidlíi doo, nidi doo yáʼáshóonii bee bééhoʼdílzinii doochxǫǫł.
8 Diné bijéí yee hóyáanii éí bikʼeh óʼooʼníiłii shóidoołtʼeeł, nidi diné doo áhályą́ą́góó yáłtiʼii éí tʼáadoo biniyéhí da jidooleeł.
9 Diné tʼáá ákóneʼ átʼéego naagháii éí doo bihodiitʼiʼgóó naagháa dooleeł, nidi áhootʼéii doo yáʼátʼééhgóó ájoolíiłii éí hwééhodoozįįł.
10 Diné bináákʼis ánáyiilʼįįhii yínííł hólǫ́ǫgo ánáhoolʼįįh; diné doo áhályą́ą́góó yáłtiʼii éí tʼáadoo biniyéhí da jidooleeł.
11 Diné tʼáá ákogi ááníiłii éí bizééʼdę́ę́ʼ iiná háálı̨́, nidi diné doo yáʼáshóonii ił hááhoniłchaʼ bizéeʼdi yinéesʼı̨́ı̨́ʼ.
12 Akʼeʼdiniih éí diné ahinéidiiłtłiʼ, nidi ayóóʼóʼóʼníinii éí doo ákwii ádahóótʼįįdii tʼáá ałtso tʼóó yikʼi hooziʼ.
13 Diné akʼiʼdiitįįhii hóyą́ągo yáłtiʼ, nidi bee akʼiʼdiitįįhii hwee ádinii hwíígháán biniyé bee atsxis silá.
14 Diné dahóyáanii ił ééhózin hashtʼeʼnideidiyiiʼnííł, nidi diné doo áhályą́ą́góó yáłtiʼii éí hodoołchxǫǫłii koshídę́ę́ʼ hólǫ́.
15 Diné atʼíinii biyódí yee bidziilgo kin haalʼáii nahalin, nidi diné bahojoobáʼíii éí bitéʼéʼįʼ bidoołchxǫǫł.
16 Diné tʼáá ákogi ááníiłii binaanish iiná yiiʼ iilóós, nidi diné doo yáʼáshóonii ááníłígíí yee bąąhági átʼéii yiiʼ iilóós.
17 Bínahodiʼniltinii baa áhojilyáanii éí iiná biyiʼ joogááł, nidi hachʼahoʼdishkéhígíí doozniizı̨́įʼii éí adzisiih.
18 Akʼeezhdiniihgo nazhniłʼinígíí éí biyoochʼíidii jílı̨́, áádóó tʼáá ádzaagóó hojilneʼii éí doo áhojilyą́ą da.
19 Tʼóó ahayóígóó yátiʼgo bee hazʼáanii hitíihii doo bídin da, nidi hazaad bił tʼą́ą́ʼ dziztíinii éí hojíyą́.
20 Diné tʼáá ákogi ááníiłii yáłtiʼgo éí bizaad béésh łigaii bitahaasdláaʼii nahalin; diné doo yáʼáshóonii bijéí biyiʼdóó yee nitsíkeesii doo ílı̨́į da.
21 Diné tʼáá ákogi ááníiłii yáłtiʼgo ląʼí yaʼiiłtsóód, nidi doo ádahalyáanii hódzą́ bee ádaadinígíí biniinaa dadínóonééł.
22 Bóhólníihii yee akʼijidlíii éí atʼı̨́įgo óʼoolííł, áádóó yínííł doo yíyiiłtsóod da.
23 Diné doo áhályáanii bąąhági ááníiłgo daanéʼé nahalingo bił honeełnih, nidi diné akʼiʼdiitįįhii hódzą́ bił honeełnih.
24 Diné doo yáʼáshóonii yináldzidii bikʼéidootʼih, áádóó diné tʼáá ákogi ááníiłii yídin nilíinii baa didootʼááł.
25 Náátsʼóʼoołdísii chʼígháhígi átʼéego diné doo yáʼáshóonii ábiʼdildįįh, nidi diné tʼáá ákogi átʼéii hoolʼáágóó bohoníłdzilgo sizı̨́.
26 Chʼil naʼatłʼoʼii bitooʼ dókʼǫ́zhígíí hawooʼ yidíníłtsiʼ, áádóó łid éí hanááʼ yiyiiłchʼih; tʼáá ákótʼéego bił hóyéeʼii nidajiłʼaʼígíí hachʼįʼ ákótʼé.
27 Bóhólníihii jidósingo iiná há binéidooʼnił, nidi diné doo yáʼáshóonii éí aʼohgo béédoohah.
28 Diné tʼáá ákogi ááníiłii bił hózhǫ́ǫ dooleełgo bíká bił chohooʼı̨́, nidi diné doo yáʼáshóonii nayólíii bitsʼą́ą́ʼ ádoodįįł.
29 Bóhólníihii bikʼehgo áhootʼéii éí tʼáá ákogi ádaatʼéii yee dabidziil, nidi doo ákwii ádaaníiłii éí ábidoołdįįł.
30 Diné tʼáá ákogi ádaaníiłii tsʼídá doo nahjįʼ kódabidiʼdoolníił da, nidi diné doo yáʼádaashóonii nihokááʼgóó doo kéédahojitʼı̨́į da doo.
31 Diné tʼáá ákogi ááníiłii éí hódzą́ yee yáłtiʼ, nidi diné doo yáʼáshǫ́ǫ́góó yáłtiʼii éí hodiʼdoolyił.
32 Diné tʼáá ákogi átʼéii éí Diyin God yee lą́ niʼiiłeehii bił bééhózingo yee yáłtiʼ, nidi diné doo yáʼáshóonii éí doo yáʼáshǫ́ǫ́góó yáłtiʼ.
