Proverbs 12:1-28
12 Tʼáá háiida hashtʼeninábiʼdiidlóosii ayóóʼáyóʼnínígíí éí ił ééhózin ałdóʼ ayóóʼáyóʼní, nidi adidooteh jijoołáii éí doo áhojilyą́ą da.
2 Diné yáʼátʼéehii éí Bóhólníihii bitsʼą́ą́dę́ę́ʼ achʼohaʼné shóyoołtʼeeh, nidi diné doo yáʼáshǫ́ǫ́góó binahagizii Bóhólníihii baa nídóotʼįįł.
3 Diné éí doo yáʼáshóonii doo yee doołdził da, nidi diné tʼáá ákogi ááníiłii behétłʼóól doo hidólnááł átʼée da.
4 Asdzání tʼáá íiyisí hóyáanii éí hahastiin bił jílı̨́įgo ájósin, nidi asdzání baa yáhásinii áyoolíłígíí éí bahastiin bitsʼin biyiʼdi hodiłdzid nahalingo áyósin.
5 Diné tʼáá ákogi ááníiłii éí tʼáá ákogi átʼéego nitsíkees, nidi diné doo yáʼáshóonii binahatʼaʼ éí naʼadloʼ ádaatʼé.
6 Diné doo yáʼáshóonii éí diné diyoolyééł tʼéí yeinítʼı̨́, nidi diné tʼáá ákogi ádaatʼéii éí bizaad yisdábidoonił.
7 Diné doo yáʼádaashóonii bikʼeh hodeesdlı̨́įʼgo doo náádahódlǫ́ǫ da łeh, nidi diné tʼáá ákogi ááníiłii bighan hazʼą́ągi bidziilgo dah yikah.
8 Diné hóyą́ągo nitsíkeesii bikʼehgo yáʼátʼéehgo bá yátiʼ, nidi diné bijéí biyiʼdi bąąhági átʼéego nitsíkeesii éí diné dabiʼı̨́į łeh.
9 Diné biʼditʼíinii bá naalʼaʼí hólóonii éí diné ayóó áníshtʼé jinízinii haghangi hodichinígíí yiláahdi átʼé.
10 Diné tʼáá ákogi ááníiłii bilı̨́ı̨́ʼ bił nilı̨́įgo yaa áhályą́, nidi diné doo yáʼáshóonii aa aʼááh hasin shee hólǫ́ nízin, nidi doo yitsʼíid da.
11 Dáʼákʼehgi nináhojiiłdlaʼii éí hachʼiyąʼ bee hwiih jílı̨́į doo, nidi diné tʼáadoo biniyéhígóó nidaakaii bikééʼ naaníjoolwołii éí bee akʼizhʼdiʼdootı̨́łígíí hwee ádin.
12 Diné doo yáʼáshóonii éí diné doo yáʼádaashóonii deineezʼı̨́įʼii yídin nilı̨́, nidi diné tʼáá ákogi ááníiłii éí behétłʼóól nooséełgo bineestʼąʼ haleeh.
13 Diné doo yáʼáshóonii bąąhági átʼéego yáłtiʼgo yee azanádááh, nidi diné tʼáá ákogi ááníiłii achʼįʼ nahwiiʼná yiiʼ haaghááh.
14 Diné yee yáłtiʼígíí bitsʼą́ą́dóó yáʼátʼéehii yee hwiih nilı̨́, áádóó diné bílaʼ yee yinaashnishii tʼáá éí bichʼįʼ nináʼiidlé.
15 Diné doo áhályáanii yee átʼéii éí tʼáá ákóneʼ áshtʼı̨́ nízingo yaa nitsíkees, nidi diné kótʼé bidiʼníinii yiyíistsʼą́ąʼii éí hóyą́.
16 Diné doo áhályáanii tʼáá áko báháchįįhgo bééhoozįįh, nidi diné hóyáanii éí baa yáhásinii tʼóó yikʼi hooziʼ.
17 Tʼáá aaníígóó yáłtiʼii éí tʼáá ákogi átʼéii ííshją́ą́ áyósin, nidi tʼáá ádzaagóó halneʼii éí binaʼadloʼ.
18 Łaʼ diltłish aa aalgeedígíí nahalingo yáłtiʼ, nidi diné hóyáanii bizaad éí chánah ánáʼoodlííł.
19 Tʼáá aaníinii bee haʼiidziihii éí hoolʼáágóó bohoníłdzil, nidi woochʼííd yee hahadziihii éí doo bee hodinaʼ da.
20 Doo yáʼáshóonii yindahaʼáii éí bijéí biyiʼdi naʼadloʼ dahólǫ́, nidi kótʼéego kʼé hwiindzin daaníinii éí bił dahózhǫ́.
21 Diné tʼáá ákogi ááníiłii doo yáʼátʼéehii doo bikʼi hwiidooleeł da, nidi diné doo yáʼádaashóonii éí bichʼįʼ nidahwiiʼná.
22 Bóhólníihii éí woochʼííd bee yátiʼ doo yíłdin da, nidi tʼáá aaníígóó ádaatʼíinii éí yaa bił hózhǫ́.
23 Diné hóyáanii bił bééhózinígíí doo tʼáá átʼé yaa halneʼ da, nidi diné doo ádahalyáanii dabijéí yee ádeinízinii yíní ádin yee yaa nidahodiłdlaad.
24 Haleebee bigaan yee naalnishii éí bóhólníih doo, nidi bił hóyéeʼii éí naanish bídidiʼnilchéeh doo.
25 Diné bijéí biiʼ biʼdiiłʼáii hólǫ́ǫgo éí yikʼee yínííł sidáa łeh, nidi saad yáʼátʼéehii bee bichʼįʼ haʼadzihgo éí bił náhooshǫǫł.
26 Diné tʼáá ákogi ááníiłii yił kééhatʼíinii yáʼátʼéehgo yooʼish, nidi diné doo yáʼádaashóonii éí yił kéédahatʼíinii nidaʼiisíihgo ádeileʼ.
27 Bił hóyéeʼii naalzheehgo yiyiiłhéehii tʼáadoo yiłtʼis da, nidi diné haleeyee átʼı̨́įgo daʼílíinii nishóyiyoołtʼeeh.
28 Tʼáá ákogi átʼéego áhootʼéégóó iiná hólǫ́, áádóó éí honítʼiʼgóó ałdóʼ aniné ádin.
