Proverbs 15:1-33
15 Áháchįʼ bichʼįʼ hazhóʼó hááʼiidziihgo éí ániʼ náyooshǫǫł, nidi tʼáá naʼníleʼdii haʼiidziih éí tʼóó yówehda diné yáháłchįįh.
2 Hóyáanii yáłtiʼgo ił ééhózin tʼáá ákogi átʼéego choyoołʼı̨́, nidi doo ádahalyáanii éí doo áháyąʼ yee yádaałtiʼ.
3 Bóhólníihii éí tʼáadoo bíniiʼohígóó doo yáʼáshóonii áádóó yáʼátʼéehii haisííd.
4 Joobaʼgo yátiʼ éí iiná tsin sikaadii átʼé, nidi nahagizgo yátiʼ éí yikʼee diné doo ákódaaneʼ da.
5 Doo áhályáanii éí bizhéʼé yínabiniłtinii yikʼee diniih, nidi bichʼahoʼdishkéii bił nilíinii éí hóyą́.
6 Diné tʼáá ákogi átʼéii bikin siʼánígíí biiʼ yódí tʼóó ahayóí hólǫ́, nidi diné doo yáʼáshóonii bichʼįʼ iʼiideełígíí éí achʼįʼ nahwiiʼná bił hólǫ́.
7 Dahóyáanii ił ééhózin tʼáá ałtsogóó yaa dahwéelnííh, nidi doo ádahalyáanii éí bijéí biyiʼdóó doo yee ákódaatʼı̨́į da.
8 Bóhólníihii éí diné doo yáʼádaashóonii náádayiiłniihígíí doo yíłdin da, nidi tʼáá ákogi ádaatʼéii bisodizin éí tʼáá íiyisí yaa bił hózhǫ́.
9 Bóhólníihii éí doo yáʼádajíshóonii dajíkááhgóó doo yíłdin da, nidi tʼáá ákogi átʼéii bikʼehgo joogáałii éí ayóóʼáhóʼní.
10 Yáʼátʼéehgo iiná doo jinízinii hashtʼeʼnináhoʼdeedlóozgo bikʼee tiʼhwiizhdoonih áádóó hachʼahoʼdishkéii jijoołxáii éí dazdootsaał.
11 Bóhólníihii éí chʼı̨́įdiitah áádóó hoolʼáágóó tiʼhooʼnííh hólǫ́ǫgo yooʼı̨́, áko tʼah nááyówehgo dineʼé danilíinii bijéí ádaatʼéegi bił bééhózin.
12 Ánahałtʼiʼii bichʼahashkéii doo ayóóʼáyóʼníi da, índa diné hóyáanii doo yaa doogáał da.
13 Ajéí bił hózhóonii hoł hózhǫ́ joolniiʼ áyiiłʼįįh, nidi ajéí yínííł nilíinii bąąh nahwiikaad.
14 Bijéí akʼiʼdiyiitįįhii ił ééhózin hátʼı̨́, nidi diné doo ádahalyáanii doo áháyąʼ bił daalkan.
15 Diné bichʼįʼ nahwiiʼnáago bee iʼiiʼaahígíí tʼáá ałtso doo yáʼátʼéeh da, nidi diné bijéí bił hózhóonii tʼáá áłahíjįʼ bá ádaʼazįįd.
16 Naalyeʼé tʼóó ahayóí hwee hólǫ́ǫgo achʼįʼ nahwiiʼná bił naaztʼiʼígíí biláahgo naalyeʼé áłchʼı̨́ı̨́dígo dah yilyéełii áádóó Bóhólníihii dílzinjígo agháago yáʼátʼééh.
17 Béégashii aałkʼeego nidahaaztʼéii bee ádaʼazįįdgo ałkʼee dadiʼniihii bił daʼjilghałígíí biláahgo diné bił ayóóʼádaʼahijóʼníinii hazaʼaleeh biiʼ oolʼéelgo bił dajiyą́ą́jí agháago yáʼátʼééh.
18 Diné báháchįįhii ahinídiijeeh áyiiłʼįįh, nidi diné doo hah báháchįįhii ahiníʼdiijéʼígíí hashtʼéididoołtʼeeł.
19 Hoł hóyéeʼii hwee áhootʼéii éí hosh bináztʼiʼ nahalin, nidi diné tʼáá ákogi átʼéii éí azdoolkǫʼgóó yigááł.
20 Ayeʼ hóyáanii bizhéʼé yił hóshǫ́, nidi diné doo áhályáanii bimá yiʼı̨́į łeh.
21 Akʼiʼdiitįįh bee ádinii éí doo hóshkał yaa bił hózhǫ́, nidi diné akʼiʼdiitįįhii éí yigááłgóó kʼíhoołdǫǫł.
22 Kótʼéego níinii ádingi biniyé ádahatʼíinii tʼóó ąąh nidahwiiłkaad, nidi kótʼéego daaníinii tʼóó adahayóigi biniyé ádahatʼíinii dabidziilgo hashtʼedaalneʼ.
23 Diné yáʼátʼéehgo ił ééhoosįįdii éí yaa bił hózhǫ́, áádóó tʼáá bá átʼéé góneʼ haʼoodzíʼígíí dooládóʼ yáʼátʼéeh da.
24 Hoolʼáágóó tiʼhooʼnííh bił hazʼą́ bitsʼą́ąjįʼ dashdidoogáłígíí biniyé hojíyáanii dego iiná hólǫ́ǫjįʼ há eʼetiin.
25 Bóhólníihii éí diné ádaa haʼniihii baʼáłchíní tʼáá bił yidoołchǫǫł, nidi asdzání bąąh áhásdįįdii bikéyah doo biyaa haotʼááł átʼéégóó íidoolííł.
26 Bóhólníihii éí diné doo yáʼádaashóonii bintsíkees doo yíłdin da, nidi saad ił hóshóonii éí chin bąąh ádin.
27 Ayóogo áchą́yídéelniʼii bighan yichʼįʼ nahwiiłná, nidi aʼídeeł yijoołxáii éí hináa dooleeł.
28 Tʼáá ákogi átʼéii yee háádoodzihii tʼáá biyiʼídi yaa nitsékos, nidi diné doo yáʼáshóonii éí saad nichǫ́ʼí bizééʼdę́ę́ʼ háálı̨́.
29 Bóhólníihii éí diné doo yáʼádaashóonii nízaadi yitsʼą́ądi hólǫ́, nidi diné tʼáá ákogi ádaatʼéii bisodizin yidiitsʼaʼ.
30 Diné bił nihoozhǫǫhii jiníłʼı̨́įgo éí hajéí yił hóshǫ́ǫ łeh, áádóó yáʼátʼéehgo haneʼii éí bee hatah yáʼáhootʼéeh łeh.
31 Diné iiná biniyé bichʼahoʼdishkéego hazhóʼó yiyíistsʼą́ąʼii éí dahóyáanii yitah kééhatʼı̨́į doo.
32 Diné bínabidiʼniltinii doo yinízingóó doo yiyíistsʼą́ąʼii tʼáá bí biiʼ sizíinii yidiláásh, nidi diné bichʼahoʼdishkéego hazhóʼó yiyíistsʼą́ąʼii éí bee akʼiʼdiitįįhii bee nihwiileeh.
33 Bóhólníihii dólzin éí hódzą́ bínaʼniltin átʼé, áádóó aʼohgo ádaa nitsídzíkeesii éí ił ídlı̨́ bitsé siláii átʼé.
