Proverbs 28:1-28
28 Diné doo yáʼádaashóonii doo łaʼ binoołchéeł da nidi dadíníchééh, nidi diné tʼáá ákogi átʼéii éí náshdóítsoh bitsiijįʼ ditłʼooígíí doo yistʼiʼii átʼé.
2 Kéyahgi dineʼé éí bee hazʼáanii nidayiitíihgo binanitʼaʼí tʼóó ahayóí yileeh łeh, nidi naatʼáanii bee akʼiʼdiitįįhii áádóó ił ééhózin bee hólóonii bikʼehgo diné tʼáá kééhatʼínígi átʼéego yáʼátʼéehgo náás yildah doo.
3 Diné bahojoobáʼíii éí diné doo dabidziilii yide áhósinii éí tʼóó báhádzidígi átʼéego nahóółtą́ągo dáʼákʼehgóó chʼiyáán íísdįįdígíí nahalin.
4 Diyin God bibee hazʼáanii yóóʼadeidiiʼaahii éí diné doo yáʼádaashóonii yaa dahaniih, nidi Diyin God bibee hazʼáanii yikʼeh dahółʼíinii hoł ahaa naakai.
5 Diné doo yáʼádaashóonii éí doo haada yitʼéii doo yikʼidaʼdiitįįh da, nidi Bóhólníihii há daatʼíinii éí tʼáá ałtsoní yikʼidadiʼyiitįįh.
6 Azhą́ diné ajitʼı̨́į nidi, bąąhági átʼéii biiʼ joogáałgo éí níʼjííʼoh; diné bahojoobáʼígo tʼáá ákogi átʼéego yigááłjí éí agháago yáʼátʼééh.
7 Tʼáá háiida Diyin God bibee hazʼáanii bikʼeh hojíłʼíinii éí ayeʼ hóyáanii jílı̨́, nidi diné łaʼ diné dadibidii béézhdiilwoʼgo bił nijikaii éí hazhéʼé haa yánízin.
8 Diné łaʼ naalyeʼé bikʼé nahalyéii tʼáá biláahgo hachʼįʼ nahalyéego há bilááh silı̨́ı̨́ʼ, nidi áłah ájiilaii náánáłaʼ diné éí badahojoobáʼíii yitaidoonihii bá átʼé.
9 Diné łaʼ Diyin God yee hasʼáanii doo dzididootsʼı̨́ı̨́łgóó bitsʼą́ąjįʼ ájítʼéego hasodizinígíí nidi doo yildin da doo.
10 Diné łaʼ tʼáá ákogi átʼéii bąąhági ááníił doo biniyé yóóʼazhnííʼaaʼgo éí tʼáá hó hweʼaʼáán góyaa azhdootłish, nidi diné tʼáá ałtsojįʼ tʼáá ákogi ááníiłii éí yáʼátʼéehii shóidoołtʼeeł.
11 Diné atʼíinii honisą́ nízingo nitsíkees, nidi diné bahojoobáʼíii akʼidiʼyiitįįhgo diné atʼíinii neiłkaahgo ájítʼéhígíí bił bééhózin.
12 Diné tʼáá ákogi ádaaníiłii bídahólníihgo ayóó átʼéego baa hózhǫ́ǫ łeh, nidi diné doo yáʼádaashóonii bídahólnííh yileehgo diné nidaʼádinilʼin haleeh.
13 Tʼáá háiida bee hazʼáanii kʼíinítiʼii yikʼi hooziidii doo náás doogáał da, nidi tʼáá háiida bee hazʼáanii kʼízhnítiʼii bee ádaa hojoolneʼii áádóó yóóʼazhdííʼáanii Diyin God bibee aa aʼááh hasinii shóizhdoołtʼeeł.
14 Diné adoosih tʼáá áłahjįʼ yaa yistiʼii éí bił hózhǫ́, nidi diné bijéí yiłtłʼisii éí achʼįʼ nahwiiʼná yiih yitłish.
15 Náshdóítsoh bitsiijįʼ ditłʼooígíí ánínígi átʼéego áádóó shash anoołchéłígi átʼéego naatʼáanii doo yáʼáshóonii éí tʼáadoo yee ákʼidadóldziłígíí yinantʼáa łeh.
16 Naatʼáanii akʼiʼdiitįįh bee ádinii ayóó átʼéego ałdóʼ ade áhósin, nidi adáhonooní yikʼee diniihii éí asʼahgóó naatʼáanii nilı̨́į doo.
17 Diné łaʼ diné dziisxı̨́įgo bidił bee ádihozhdiiltʼiʼii hojishchááʼ dooleełjįʼ azhdínóochééł; tʼááká diné łaʼ tʼą́ą́ʼ kónáhódleʼ lágo.
18 Tʼáá háiida tʼáá ákóneʼ ájítʼı̨́įgo joogáałii yisdáhodiʼdooltééł, nidi diné tʼóó áhodilʼı̨́įgo yigáałii tʼáá hooshchʼįʼ azhdootłish.
19 Hadáʼákʼehgóó nináhojiiłdlaʼii éí chʼiyáán tʼóó ahayóí hwee hólǫ́ǫ doo, nidi tʼáadoo yaa nidaokaaígóó dahináanii béézhdiilwoʼii éí téʼéʼı̨́ hade ádoonííł.
20 Diné baʼahódlíii éí bee bikʼihojidlíii tʼóó ahayói doo, nidi diné adootʼįįłígíí yaa tsxı̨́ı̨́ł niizı̨́įʼii éí tʼáá atíbidiʼdoolníłí.
21 Diné ałʼoh átʼéego baa nitsídzíkeesgo éí doo yáʼátʼéeh da, háálá diné éí bááh bizéí shóidoołtʼeełígíí yiniinaa bee hazʼáanii kʼíidootih.
22 Diné doo ákwáálnáaʼii éí tsxı̨́įłgo adeeshtʼįįł nízin, nidi téʼéʼı̨́ bikʼi hwiidooleełígíí doo bił bééhózin da.
23 Diné łaʼ diné jideeztehdóó bikʼijįʼ diné náánáłaʼ tʼóó áníigo aa haniihii biláahgo bił ałchʼozhdooʼneeł.
24 Tʼáá háiida bizhéʼé, doodaiiʼ bimáda yee aniʼįįhgo, Díí éí bee hazʼáanii doo hitíihii átʼée da, jiníigo niʼiiłchǫǫhii bikʼis jílı̨́.
25 Diné ádaa dzódlíii éí diné ahinéidiiłtłiʼ, nidi diné éí Bóhólníihii yaa dzólíii éí baa dzólníigo ábidiʼdoolnííł.
26 Diné tʼáá hó hajéí baijólíii éí doo áhojilyą́ą da, nidi tʼáá háiida hóyą́ągo hináanii éí yisdádooltééł.
27 Diné badahojoobáʼíii baa jijoobaʼii doo hwee áhádin da doo, nidi diné badahojoobáʼíii doo tʼáá kʼad dazhnééłʼı̨́įʼii éí tʼóó ahayóí bee hóyéeʼgo há hadiʼyoodzih.
28 Diné doo yáʼádaashóonii bídahólnííh yileehgo diné nídaditʼı̨́ı̨́h, nidi daninéehgo diné tʼáá ákogi ádaatʼéii náás dikah.
