Proverbs 8:1-36
8 Hódzą́ éí dilwosh. Bee akʼiʼdiitįįhii éí nahwiiniih. Tʼáá aaníí yaʼ?
2 Wókʼą́ągi atiin bąąhgóó ałnáʼooztiingi sizı̨́į łeh.
3 Kintah góneʼ adaʼiiztiingi nidilghaash łeh; dáńʼdaʼditı̨́ı̨́hgóó chánahgo yáłtiʼ
4 kóníigo, Diné danohłíinii, nihichʼįʼ ádíshní; diné danilíinii dabiyeʼké bichʼįʼ yáshtiʼ.
5 Doo dahonohsáanii, hódzą́ nabikʼítsáhákeesii bikʼidaʼdoohtįįh, áádóó doo dahóyáanii danohłíinii, akʼidaʼdoohtįįh.
6 Daʼíísółtsʼą́ą́ʼ, háálá ayóó ádanóolninii bee nihichʼįʼ yádeeshtih, áádóó nihichʼįʼ yáshtiʼgo tʼáá ákogi ádaatʼéii éí dadoohtsʼaʼ dooleeł.
7 Háálá tʼáá aaníinii tʼéiyá bee yáshtiʼ doo; doo yáʼáshǫ́ǫ́góó yátiʼ tʼéiyá doo shił aaníi da.
8 Saad bee hahasdziihígíí éí tʼáá ałtso tʼáá ákogi ádaatʼé; saad bee ákʼeh haʼíinii, doodaiiʼ saad naagizii doo éí ádaatʼée da.
9 Éí tʼáá ałtso diné akʼidiʼyiitįįhii bichʼįʼ ííshjání danilı̨́, índa ił ééhózin nishódayoołtʼeehii bił tʼáá daʼáko.
10 Bínaninishtinígíí nídiilé, béésh łigaii éí dooda; ił ééhózin nídiilé, óola bitahaasdláaʼii éí dooda.
11 Háálá nitłʼiz ałtaasʼéí bilááh átʼéego hódzą́ yáʼátʼééh, áádóó haʼátʼíhída bídin ídlíinii tʼáá ałtso tʼáá nídaʼííʼoh.
12 Hódzą́ nishłíinii bee hódzą́ yee átʼéii bił kééhashtʼı̨́, índa ił ééhózin áádóó nihodiitʼaah ádaatʼéii shił nibééhwiizįįh.
13 Bóhólníihii jidósinii éí doo yáʼáshóonii jijoołxáii átʼé; ádaa haʼniih áádóó ádíhólnííh áádóó doo yáʼátʼéehii bił dahonítʼiʼii índa saad bee ákʼeh haʼı̨́ jooshłxá.
14 Naʼnitin áádóó hódzą́ tsʼídá yáʼádaatʼéehii éí shí; akʼidiʼyiitįįhii nishłı̨́ áádóó adziil shee hólǫ́.
15 Shí shinahjįʼ aláahgo naatʼáanii danilíinii dahwéeʼaah, áádóó ałdóʼ shí shinahjįʼ naatʼáanii danilíinii tʼáá ákogi áhodooníiłgo hadahadziih.
16 Shí shinahjįʼ naatʼáanii danilíinii áádóó aghá dahideezíinii, tʼáá éí nihokááʼgóó ándahwiiʼaahii tʼáá ałtso, shí shinahjįʼ nidantʼá.
17 Ayóóʼádashijóʼníinii ayóóʼádahóshʼní, áádóó tʼáá hahígo shíkadantáii shikʼídahidookah.
18 Yitʼíinii índa ił ídlı̨́ shee hólǫ́; tʼáá aaníí, yódí ałtaasʼéí dadinaʼii índa tʼáá ákogi ádaatʼéii shee hólǫ́.
19 Shineestʼąʼ éí óola biláahgo yáʼátʼééh; tʼáá aaníí, óola bąąh nídoolyı̨́įʼii biláahgo yáʼátʼééh; shá bilááh násdlı̨́įʼii éí béésh łigaii bitahaasdláaʼii biláahgo yáʼátʼééh.
20 Tʼáá ákogi átʼéego áhootʼéégóó índa doo haada yitʼéii bee dahonítʼiʼgóó yishááł.
21 Áko ayóóʼádashóʼníinii badadiʼyoodiłígíí biyódí bá dahooghangóó yódí hadadeezbingo ádadeeshłííł.
22 Hodeeyá bilááhdę́ę́ʼ Bóhólníihii bííʼ nishłı̨́; tʼah doo tʼáadoo leʼé íílééhdą́ą́ʼ bííʼ nishłı̨́.
23 Hoolʼáádę́ę́ʼ hashtʼeʼnishiʼdeelkid; hodeeyáádę́ę́ʼ, doodaiiʼ tʼah doo nahasdzáán álnééhdą́ą́ʼ honishłǫ́.
24 Tónteel tʼah ádindą́ą́ʼ áádóó tó hadaazlı̨́ı̨́góó tó tʼah doo hadaanééhdą́ą́ʼ yitʼíní áshiʼdiilyaa.
25 Dził tʼah doo ádaalnééhdą́ą́ʼ, dah daaskʼidígíí tʼah doo ádaalnééhdą́ą́ʼ yitʼíní áshiʼdiilyaa.
26 Tʼah doo nahasdzáán íílééhdą́ą́ʼ, kédaayahii tʼah doo íílééhdą́ą́ʼ, nahasdzáán bikááʼdóó łeezh tʼah doo íílééhdą́ą́ʼ honishłǫ́.
27 Yótʼááh hiníláii áyiilaadą́ą́ʼ ákwii honishłǫ́; tónteel ahééhiníyı̨́įgo áyiilaadą́ą́ʼ ákwii honishłǫ́.
28 Kʼos dah deílzhoodgo áyiilaadą́ą́ʼ, tó ląʼí hadaazlı̨́įgo áyiilaadą́ą́ʼ honishłǫ́.
29 Bóhólníihii bibee hazʼáanii éí tó bikʼeh dahółʼı̨́į dooleełgo, Tʼáá kódíjįʼ tónteel nihiníyı̨́į dooleeł, dííniidą́ą́ʼ honishłǫ́; nahasdzáán niłdzilgo niiníʼą́ą́dą́ą́ʼ honishłǫ́.
30 Naanish yiyiichįįhii nishłı̨́įgo bíighahdóó honishłǫ́ǫ́ nítʼééʼ; tʼáá áłahjįʼ bidááhdóó shił hózhǫ́ǫgo shaa bił nihoozhǫǫh nítʼééʼ.
31 Diné kéédahatʼı̨́ı̨́góó shił nihoozhǫǫh áádóó dineʼé danilíinii baa shił nihoozhǫǫh.
32 Áko kʼad shiyázhí danohłíinii, dashíínółtsʼą́ą́ʼ; ádíshníinii bikʼeh dahojíłʼíinii éí hakʼidahojidlí.
33 Bínanihinishtinii deísínółtsʼą́ąʼgo dahonohsą́ą doo, áádóó doo dadínóosįįłígíí éí dooda.
34 Shighan bichʼéʼétiingi tʼáá ákwíí jı̨́ diné shíká déezʼı̨́įʼii, shighan bidáádílkałgi shibaʼ sidáii, shíistsʼą́ąʼii díí lą́ą bikʼihojidlí ni.
35 Háálá diné shikʼíníyáii iiná yikʼíníyáa dooleeł, áádóó Bóhólníihii hachʼooʼníi doo.
36 Nidi shichʼįʼ ádił nidziilzíihii éí hwiiʼ sizíinii atíjíłʼı̨́; shikʼee dadiniihii tʼáá ałtso aniné ayóóʼádayóʼní.
