Psalm 103:1-22
Bóhólníihii bitsʼą́ą́dę́ę́ʼ akʼihojidlí eidiiʼaahii baa haʼniih
103 Shiiʼ sizíinii nílíinii, Bóhólníihii baa hóniih, áádóó tʼáá ánóhtʼé shiiʼ honohłóonii Bóhólníihii bízhiʼ diyinii bee yínízhíigo baa hóniih.
2 Shiiʼ sizíinii nílíinii, Bóhólníihii baa hóniih, áádóó yee naa joozbaʼii éí tʼááká baa yóónééh.
3 Doo ákwii íínítʼįįdii tʼáá átʼé yóóʼiidiiʼaah; naałniih tʼáá ałtso bitsʼąą hadaałtʼé ánánoodlííł;
4 íʼooldįįł bitsʼą́ąjįʼ neʼiinaʼ nááyiisniiʼgo joobaʼ áádóó aa aʼááh hasin nináhaazláago áyiilaa;
5 yáʼádaatʼéehii bee hwiih nílı̨́įgo ánósin, áko atsá táádítłeehgo ániidí nináhádleehígi átʼéego ániid nanináago ánániʼdoolnííł.
6 Bóhólníihii éí diné bide ádahólzinígíí tʼáá ałtso yaa áhályą́ índa tʼáá ákogi átʼéego yá óʼoolííł.
7 Átʼéii Mózes yił yééhoosįįd, áádóó áyoolíłígíí éí Ízrel dineʼé yił yééhoosįįd.
8 Bóhólníihii éí aa aʼááh nízin áádóó joobaʼ, doo hah báháchįįh da; tʼáá íiyisí bił hadleeʼgo aa aʼááh nízin.
9 Doo tʼáá áłahjįʼ nanihiditeeh da doo, índa doo hoolʼáágóó báháchįʼ da doo.
10 Azhą́ ádił daʼsiilziih nidi, doo éí bikʼehgo nihainístʼįįd da; doo ákwii ádeiitʼįįdę́ę doo bikʼehgo kʼéénihidiidlaa da.
11 Háálá nahasdzáán índa yádiłhił bitaʼgi ánízádígi ánízahgo diné dabidísinii tʼáá íiyisí bił hadleeʼgo yaa aʼááh nízin.
12 Bee hazʼáanii dahiitiʼii haʼaʼaahdóó eʼeʼaah ánízáágóó nihitsʼéidiníʼą́.
13 Tʼáá azhéʼé baʼáłchíní yaa aʼááh nízinígi átʼéego Bóhólníihii dabidísinii yaa aʼááh nízin.
14 Háálá ániitʼéhígíí bił bééhózin; łeezh niidlı̨́įgo yénálniih.
15 Diné éiyá hóyoołkáłígíí tłʼoh łitsooí nahalin; tʼáá bóhólníihgi chʼilátah hózhóón nooséełii nahalingo jinoosééł.
16 Jó, bichʼįʼ diyołgo tʼáá áko ádįįh, áádóó ííʼá yę́ęgi doo bééhoozįįh da.
17 Nidi Bóhólníihii aa aʼááh nízinii éí dabidósinii hoolʼáádę́ę́ʼ índa hoolʼáágóó yee yił hólǫ́. Bitʼáá ákogi átʼéii éí áłchíní áádóó banáádaʼáłchíní,
18 éí bibee ahaʼdeetʼáanii índa bibikʼeh óʼooʼníiłii yéédaalniihgo yidaʼałʼíinii hoolʼáádę́ę́ʼ índa hoolʼáágóó yił hólǫ́.
19 Bóhólníihii éí yótʼááh hiníláii bitahgi bibikááʼdóó nahatʼáii hashtʼeyiilaa, áko tʼáá ałtsoní bee bóhólníihgo yinantʼá.
20 Diyingo naalʼaʼí ayóó ádanihóodziilii nohłíinii, bizaad deísółtsʼą́ąʼgo yee hasʼáanii bikʼeh dahonołʼíinii, Bóhólníihii baa dahohniih!
21 Dah deínóhnéehgo bá naalʼaʼí danohłíinii, íinízinii bidaʼołʼíinii tʼáá ánółtso, Bóhólníihii baa dahohniih!
22 Bee bóhólníihgo nahazʼą́ą́dę́ę́ʼ Bóhólníihii nihinaashnishii tʼáá ánółtso, Bóhólníihii baa dahohniih. Shiiʼ sizíinii nílíinii, Bóhólníihii baa hóniih!
