Psalm 148:1-14
148 Bóhólníihii baa dahohniih! Yáʼąąshiidę́ę́ʼ Bóhólníihii baa dahohniih! Aghanídahazʼáágóó baa dahohniih!
2 Bidiyingo naalʼaʼí danohłíinii tʼáá ánółtso, baa dahohniih; yáʼąąshdi hinooláii tʼáá ánółtso, baa dahohniih!
3 Jı̨́honaaʼéí índa ooljééʼ, sǫʼ nihídazdilidii tʼáá ánółtso, baa dahohniih!
4 Yáʼąąsh agháʼánízáadii áádóó biláahdi tó honohłóonii, Bóhólníihii baa hohniih!
5 Bíniʼdii Bóhólníihii bízhiʼ yaa dahaniih! Háálá haadzíiʼgo haʼátʼíhída tʼáá ádaadindę́ę́ʼ dahazlı̨́ı̨́ʼ.
6 Áádóó hoolʼáádę́ę́ʼ ahóyéelʼáágóó hashtʼeyiilaa; bee hazʼáanii tsʼídá doo bił yóóʼahodoogáałii áyiilaa.
7 Nahasdzáán bikááʼdóó Bóhólníihii baa dahohniih; tónteel biyiʼgóó ayóó ádaníldíilgo nidaaldeehii índa tó daditáanii tʼáá ánółtso, baa dahohniih.
8 Kǫʼ áádóó níló, áádóó yas índa siil, áádóó níyol náádǫ́ǫsii danohłíinii, Bóhólníihii bizaad bohoolníiłii baa dahohniih!
9 Dził naaznilii índa deílkʼidii tʼáá ánółtso, áádóó tsin nihineestʼąʼ nihąąh nídahoodleełii índa gad tʼáá ánółtso,
10 nidaaldlooshii índa alı̨́ı̨́ʼ tʼáá ánółtso, nidaahʼnaʼii índa tsídii nidaahtʼaʼii tʼáá ánółtso Bóhólníihii baa dahohniih!
11 Nahasdzáán bikááʼgóó aláahgo naatʼáanii danohłíinii índa dadineʼé tʼáá ánółtso, naatʼáanii danohłíinii índa nahasdzáán bikááʼgóó ánihwiiʼaahii danohłíinii tʼáá ánółtso,
12 tsíłkéí índa chʼikéí danohłíinii tʼáá ánółtso, diné hadasoohtihii índa áłchíní nohłíinii, Bóhólníihii baa dahohniih!
13 Bíniʼdii Bóhólníihii bízhiʼ yaa dahaniih, háálá bí bízhiʼ tʼéiyá tsʼídá aláahgo átʼéii átʼé; nahasdzáán índa yádiłhił biláahgo Bóhólníihii ayóó átʼéii nilı̨́.
14 Bidineʼé dabidziilgo áyiilaa; bidiyı̨́ı̨́ʼ danilíinii tʼáá ałtso baa dahaniih; éí Bóhólníihii yitʼááhgóó naaldeehii Ízrel dineʼé danilíinii baa dahaniihgo áyiilaa. Bóhólníihii baa dahohniih!
