Psalm 19:1-14
Ádaalyaii bee Diyin God yee ayóó átʼéii bééhózin
19 Yótʼáahdi hiníláii éí Diyin God yee ayóó átʼéii yaa dahalneʼ, áádóó yádiłhił éí Diyin God bílaʼ yee yinaashnishii ííshjání áyósin.
2 Tʼáá ákwíí jı̨́ yáłtiʼ, índa tʼáá ákwíí tłʼééʼ Diyin God ił ééhózin yitʼíní áyoolííł.
3 Doo yádaałtiʼ da, índa bizaad ádaadin; biinééʼ doo dadiitsʼaʼ da,
4 nidi nahasdzáán bikáaʼgi tʼáá ałtsogóó dabiinééʼ adahideezdláád, índa nahasdzáán nidaneesʼą́ąjįʼ dahalneʼ. Yádiłhił biyiʼdi Diyin God éí jı̨́honaaʼéí bá hazʼą́ągo áyiilaa;
5 hooghandóó iiyehii chʼíghááh nahalingo áádóó diné bidziilii bił hózhǫ́ǫgo yiiltéhígíí nahalingo haʼaʼááh.
6 Yádiłhił nidahineesʼą́ą́dę́ę́ʼ hidighááh, áádóó yádiłhił nineelʼą́ąjįʼ ahénínádááh, áko bitsʼáhonigahígíí tʼáadoo bitsʼąą nantʼiní da.
Bóhólníihii bibee hazʼáanii
7 Bóhólníihii yee hasʼáanii hadaałtʼé, éí iiʼ sizíinii hashtʼééyoodlííł; Bóhólníihii yee hahaasdzíʼígíí bee bééhániihii éí tʼáádóo nídí tʼáá aaníí, áádóó doo dahóyáanii dahóyą́ągo ádeileʼ;
8 Bóhólníihii yee nihwiizʼáanii tʼáá ákogi ádaatʼé; éí ajéí yił dahóshǫ́. Bóhólníihii bibikʼeh óʼooʼníiłii tʼáadoo haada yitʼéhí ił chʼíʼdiiłdlaad.
9 Bóhólníihii jidósingo tʼáadoo átʼéhí da; éí hoolʼáágóó hólǫ́; Bóhólníihii yee nihodiizʼáanii éí tsʼídá tʼáá aaníí, áádóó tʼáá ákogi ádaatʼé.
10 Éí óola biláahgo, óola tʼáá íiyisí yáʼátʼéehii nidzinígíí nidi, biláahgo daʼílı̨́; tsésʼná bitłʼizh bitsʼaʼ bąąhdę́ę́ʼ tsésʼná bitłʼizh nidahidilchʼą́łígíí nidi biláahgo ayóó ádahalniih.
11 Éí tʼah náábíláhígo ninaalʼaʼí nilíinii bee bínabidiʼniltin; éí yeʼełʼı̨́įgo ayóó átʼéego bichʼįʼ nináʼdoolyééł.
12 Nidi háishąʼ tʼáá bí niʼiisíihgo ádaa ákondzin? Shaʼátʼeʼ néésʼı̨́įʼii shąąh áníłdįįh.
13 Ná naalʼaʼí nishłíinii tʼáadoostiʼee ádił niʼiisíhígíí ałdóʼ bitsʼąą áshíínísin; éí tʼáadoo shee ádíhólníhí leʼ! Áko tʼáá ákóneʼ áníshtʼée dooleeł, áádóó bee hazʼáanii ayóó átʼéego hetíihii shąąh ádin doo.
14 Bee shidziil nílíinii, shikʼé nináʼíínídláii, Bóhólníihii nílíinii, saad bee hahasdziihii áádóó shijéí bee nabikʼítsískeesii hiniizįįh leʼ.
