Psalm 34:1-22
Atíʼélʼı̨́ bitsʼąą yisdáʼiildéehii baa haʼniih (1Sam. 21:13-15)
34 Tʼáá áłahjįʼ Bóhólníihii baa hashniih doo; tʼááłáhígi átʼéego baa hashniih doo.
2 Shiiʼ sizíinii éí Bóhólníihii yaa haniih doo; aʼohgo ádaatʼéii yaa dahodiiztsʼą́ąʼgo bił dahózhǫ́ǫ doo.
3 Bóhólníihii tʼáá íiyisí shił baa dahohniih; haaʼíyeeʼ tʼáá ahąąh tʼáá áníiltso Bóhólníihii bízhiʼ ayóó átʼéego ádadiilnííł!
4 Bóhólníihii hanishtáago shichʼįʼ ééhoosįįd, áádóó bikʼee shił yéeʼii tʼáá ałtso yitsʼąą yisdáshííłtı̨́.
5 Diyin God yichʼįʼ dadééʼı̨́įʼgo bił dahóózhǫǫd, áádóó tsʼídá doo yádadínóozįįł da.
6 Diné hojoobaʼ átʼéii nishłíinii Bóhólníihii bichʼįʼ sodeeszingo shidiiztsʼą́ą́ʼ, áádóó bee shichʼįʼ nahwiiʼnáanii tʼáá átʼé biiʼdę́ę́ʼ yisdáshííłtı̨́.
7 Bóhólníihii bidiyingo naalʼaʼí éí dabidósinii binaagóó yináhooleeł, áádóó yisdábiinííł.
8 Shoo, dasoolįhgo Bóhólníihii yáʼátʼéehii jílı̨́įgo nihił béédahodoozįįł! Bóhólníihii beijólíii éí hakʼihojidlí!
9 Bidiyı̨́ı̨́ʼ danohłíinii, Bóhólníihii dadíínóhsin, háálá dabidísinii tʼáadoo yídin danilíní da!
10 Náshdóí yáázh bitsiijįʼ daditłʼooígíí tʼáá báaʼda nidaakai áádóó dichin yéédaʼooʼnííh, nidi Bóhólníihii yichʼįʼ dadéezʼı̨́įʼii éí yáʼátʼéehii doo biʼoh neelʼą́ą da doo.
11 Hágo, shaʼáłchíní, dashíísółtsʼą́ą́ʼ; Bóhólníihii dólzingi bínanihinishtin doo.
12 Háí diné shı̨́įshąʼ iiná bee níʼdeeshdįįł, áádóó yáʼátʼéehgo shíyoołkáał doo nízin?
13 Saad doo adaaníinii bitsʼąą ádaa áhólyą́, áádóó tʼáadoo ninaʼadloʼgo yáníłtiʼí.
14 Doo yáʼádaatʼéehii bitsʼánínáahgo yáʼátʼéehii baa nanináa doo; bee achʼįʼ hózhǫ́ náhásdlı̨́įʼii hánítʼı̨́įgo dziil bee bíká ánítʼı̨́į doo.
15 Tʼáá ákogi ádajítʼéii Bóhólníihii hakʼi déezʼı̨́ı̨́ʼ, índa bichʼįʼ sodazdilzingo hwíistsʼą́ą́ʼ.
16 Doo yáʼátʼééhgóó ádajooníiłii éí nahasdzáán bikááʼdóó haa dahodiyooʼnah biniyé Bóhólníihii honíłʼı̨́įgo hakʼijįʼ nilı̨́.
17 Tʼáá ákogi ádaatʼéii, Shíká anilyeed, daaníigo nídaʼookąąhii Bóhólníihii bidiitsʼaʼ, áko bee bichʼįʼ nidahwiiʼnáanii tʼáá ałtso yitsʼąą yisdáyiinííł.
18 Yínííł ádajítʼéii Bóhólníihii hwíighahgi hólǫ́, áádóó níłchʼi hwiiʼ sizíinii tídáánáanii yisdáyiinííł.
19 Diné tʼáá ákogi ááníiłii yikʼee tiʼhooníihii tʼóó ahayóí, nidi éí tʼáá átʼé yitsʼąą Bóhólníihii yisdábiiłteeh.
20 Hatsʼin tʼáá átʼé há yaa áhályą́; tʼáadoo łaʼ kʼéʼéltǫʼ da.
21 Diné doo yáʼáshóonii hadoo yáʼáshǫʼ náhodiyoolyééł, áádóó tʼáá ákogi ádaaníiłii deijoołxáii éí bá nidahodiyootʼááł.
22 Bóhólníihii bá nidaalʼaʼí biiʼ naazíinii yikʼé nináʼídláago hááyooʼnil; haa dadzólíii doo łaʼ bá nidahodiyootʼáał da.
