Psalm 62:1-12
Diyin God tʼéiyá bineʼ iʼniichééh
62 Tʼáá aaníí shiiʼ sizíinii déesyéelgo Diyin God yibaʼ átʼé. Bí tʼéí yisdáshiiłteeh.
2 Tʼáá bí tʼéiyá tsé shá nilı̨́ áádóó bee yisdáhásháahii índa bineʼ ahinishchéehii nilı̨́. Tsʼídá doo nahjįʼ kóshidiʼdoolníił da.
3 Haa nízáágóó achʼįʼ nahwiiʼná bee tʼáá ánółtso diné bindahohʼáa doo? Áko tsé ahénátłʼingo nídíníizhoozhgo naałdaasígíí áádóó anítʼiʼ diniitłóoʼii nahalingo bidaʼnoołhı̨́.
4 Aląąjįʼ dzizínídóó nahjįʼ háádahodiyiilghą́ą́ł danízingo hondahaʼá. Woochʼííd ayóogo baa bił dahoneeni. Akʼidajidlíigo yádaałtiʼ, nidi ódziih biiʼ dahólǫ́. Síilah.
5 Shiiʼ sizíinii nílíinii, Diyin God tʼéiyá bibaʼ ánítʼé, háálá éí bitsʼą́ą́dę́ę́ʼ shił chohooʼı̨́.
6 Tʼáá bí tʼéiyá tsé shá nilı̨́ áádóó bee yisdáhásháahii índa bineʼ ahinishchéehii nilı̨́. Doo nahjįʼ kóshidiʼdoolníił da.
7 Bee yisdáhásháahii áádóó bee ił nishłíinii Diyin God bílákʼee silá. Diyin God éí tsé bee shidziilii nilı̨́, áádóó bineʼ nehesdzíihii nilı̨́.
8 Diné danohłíinii, tʼáá áłahjįʼ Diyin God baa dadzíínóhłí. Bídin danohłíinii tʼáá ałtso danihijéí tłʼááhdę́ę́ʼ bee bił dahołneʼ. Diyin God bineʼ ahiniichéehii nihá nilı̨́. Síilah.
9 Diné baa hojoobáʼígo naaldeehii tʼáadoo nánídlíní da; diné baa yádahasinii éí tʼóó ádaatʼé; díí tʼáá áłah dahidiidleehgo ayol tʼáá bichʼįʼgo ászólí yeeʼ; tʼáadoo náádleełí da.
10 Ade ádahwíínóhsinígíí tʼáadoo badaʼíínóhłíhí. Diné łídaocházhígíí binahjįʼ adeeshtʼįįł tʼáadoo danohsiní; jitʼíinii hodidileehgo tʼáadoo nihijéí bee bíchą́deídółniʼí.
11 Díigi átʼéego Diyin God tʼááłáhídi haadzííʼ, áádóó naakigo ałkééʼ hazʼą́ disétsʼą́ą́ʼ; Diyin God éí bidziil,
12 áádóó ałdóʼ Bóhólníihii nílíinii, aa aʼááh nínízin, háálá diné tʼááłáʼí nítínígo ádáátʼįįdígíí bikʼehgo bichʼįʼ niʼiyílé.
