Psalm 77:1-20
Diyin God ayóó átʼéego óʼoolíiłii bééhániihgo bee haʼahóní
77 Diyin God bichʼįʼ yéego ádíshní. Tʼáá shí shiinééʼ bee bichʼįʼ hadeesdzihgo shididootsʼı̨́ı̨́ł.
2 Shichʼįʼ hodiisʼnááʼ yę́ędą́ą́ʼ Bóhólníihii bíká íítʼįįd; tłʼéeʼgo dah deeshnihgo doo díníshnéeh da nítʼééʼ. Shiiʼ sizíinii habidiʼyóolniiłgi doo yinízin da nítʼééʼ.
3 Diyin God bénáshniihgo dinishʼníí nítʼééʼ; nitséskeesgo shiiʼ sizíinii yéego bąąh nááhákaʼ. Síilah.
4 Shinááʼ shá ąą íínísin; tʼáá íiyisí shide áhootʼéhígíí bąą hadeesdzih yę́ęgi doo bíneeshʼą́ą da.
5 Ałkʼidą́ą́ʼ yę́ęgóó baa nitsínísíkééz; ałkʼidą́ą́ʼ nináháhááh yę́ęgóó baa nitsínísíkééz.
6 Tłʼéeʼgo bee hóótáalii bénáshniih; shijéí biyiʼdi nabikʼítsískees; nitséskeesgo níłchʼi shiiʼ sizíinii haleebee nináʼádílkaah.
7 Hoolʼáágóósh Bóhólníihii doo nihidínóozįįł da? Índa doósh nihichʼijí náánídlı̨́į da doo?
8 Aa aʼááh níziniísh hoolʼáágóó nihaa ánéísįįd? Yee nihoníʼáaniísh hoolʼáágóó doo bohodoolníił da?
9 Diyin God bibee ajoobaʼásh yaa yooznah? Báháchįʼgoósh aa aʼááh nízinii yidádiʼníłkaal? Síilah.
10 Áko ádíshní, Díí bee shąąh dahazʼą́: Aláahgo Ayóóʼátʼéii bigaan nishʼnáájí łahgo ádzaa nisin.
11 Bóhólníihii áátʼįįdii bénáshniih doo; ałkʼidą́ą́ʼ tʼóó bikʼedaʼayóigo íínítʼįįdii bénáshniih doo.
12 Ninaanish nilíinii ałdóʼ tʼáá ałtso nabikʼítséskees doo, áádóó baa nisíníyáhígíí bee ádił yáshtiʼ doo.
13 Diyin God nílíinii, bee ánítʼéii éí diyin. Háí diyin dabidiʼníí shı̨́įshąʼ nihiDiyin Godgi átʼéego ayóó átʼé?
14 Diyin God nílíinii, tʼóó bikʼedaʼayóigo baa nanináii nílı̨́. Dadineʼé bitahgóó nidziilígíí yitʼíní íínísin.
15 Jéíkab áádóó Jóseph baʼáłchíní náás ahoolchíiłii éí nidineʼé danilı̨́įgo nigaan bee bikʼénináʼíínídlá. Síilah.
16 Diyin God nílíinii, tó daniiłtsą́; tó daniiłtsą́ągo nídaasdzííd; tónteel ayóó íídéetą́ʼígíí ałdóʼ dahideesʼnááʼ.
17 Kʼos tó yadayiinil; yá bitsʼą́ą́dóó dahodiistsʼą́ą́ʼ; nikʼaʼ ałdóʼ tʼáá ałtsogóó adahalnood.
18 Kʼos diłhił biiʼdi neʼiiʼniʼ biinééʼ dadiistsʼą́ą́ʼ; nahasdzáán bikááʼgóó atsiniltłʼish bee niʼdeezdláád; nahasdzáán dahideesʼnááʼ.
19 Tónteel biyiʼgóó nikʼeh honítʼiʼ; tó ayóó átʼéii biiʼgóó neʼatiin, nidi nikékʼeh hashchíín doo bééhózin da.
20 Dibé jooʼish nahalingo Mózes áádóó Éran bílaʼ bee nidineʼé yíníʼeezh.
