Psalm 89:1-52
Diyin God éí David yił ahaʼdeetʼą́
89 Bóhólníihii aa aʼááh nízinii hoolʼáágóó baa hashtaał doo; náás oochííłgóó naʼahódlíigo ná baa hashneʼ doo.
2 Háálá ádííniid, Aa aʼááh hasin hoolʼáágóó hashtʼedoolnííł; yótʼáahdi hiníláii daniłdzilígi átʼéego naʼahódlíii hashtʼedíílííł.
3 Nídiiłtíinii bił ałhadiʼnishtʼą́. Shá naalʼaʼí David bichʼįʼ ádee hadeesdzííʼ.
4 Nitsʼą́ą́dóó oochíiłii hoolʼáágóó hashtʼedeeshłííł; tʼáá éí oochíłígíí niʼníchı̨́įjįʼ dahwéeʼaahgo ádeeshłííł. Síilah.
5 Bóhólníihii nílíinii, yótʼáahdi hiníláii éí tʼóó bikʼeʼayóigo ánítʼéii áádóó naʼahódlíii ałdóʼ nidiyı̨́ı̨́ʼ áłah nilı̨́įgi naa dahaniih doo!
6 Yádiłhił biyiʼdi naaldeehiishąʼ háidíígíí Bóhólníihii bił ałhąąh nijóníłígi átʼé? Yáʼąąshdę́ę́ʼ ayóó ábóotsxeʼii biyeʼké danilíinii bitahdóó háishąʼ Bóhólníihii nahalin?
7 Éí Diyin God nilíinii bidiyı̨́ı̨́ʼ áłah nídaadleehgi tʼáá íiyisí bitsʼąą daastiʼgo ádabósin, áádóó binaagóó naaldeehii tʼáá ałtso tʼáá íiyisí bitsʼąą daastiʼgo ádabósin.
8 Tʼáá ałtsoní bee Bóhólníihii Diyin God nílíinii, háishąʼ nigi átʼéego ayóó ábóodziil? Bóhólníihii, tʼáá áłahjįʼ naa hodzódlíhígíí nináhaazlá.
9 Tónteel ádá náhálchįįhgo bee nóhólnííh; bíígháán náádadiidáahgo hashtʼééhííłtʼeeł.
10 Seesyínígíí nahalingo Réíhab shíníłjizh. Nigaan ayóó ábóodziilii bee niʼanaʼí taisíníghaz.
11 Yádiłhił áádóó yáʼąąsh éí nííʼ, nahasdzáán ałdóʼ nííʼ; nahasdzáán áádóó biiʼ dahólóonii tʼáá ałtso íinilaago nííníʼą́.
12 Náhookǫs índa shádiʼááh íinilaa, Dził Téíbor áádóó Dził Hérman bił hózhǫ́ǫgo nízhiʼ yaa haniih.
13 Nigaan bee ayóó ánóodziil, nílaʼ ałdóʼ bee nidziil, dego nílaʼ nishʼnáájí bee dah díílnih.
14 Tʼáá ákogi átʼéii áádóó doo haada yitʼéii nibikááʼdóó nahatʼáii bee niłdzil; aa aʼááh hasin áádóó tʼáá aaníinii nilą́ąjįʼ nahalneʼ.
15 Haneʼ baa hózhóonii bił béédahózinii bikʼidahojidlí. Bóhólníihii nílíinii, éí niniiʼ bee iʼdíídííngóó hoolʼingo deíkááh.
16 Shá bíighah nízhiʼ baa bił nidahoozhǫǫh; nitsʼą́ą́dóó tʼáá ákogi átʼéii yee ayóó ádaatʼéego ádabiʼdoolniił.
17 Háálá dabidziilgo íínísinígíí yee naa dahaniih. Áádóó nihichʼoníʼnínígíí bee nihinahatʼaʼ bidziil.
18 Háálá nihichʼą́ą́h hojílóonii Bóhólníihii bííʼ jílı̨́; aláahgo nihinanitʼaʼí éí Ízrel dineʼé biDiyin nilíinii bííʼ jílı̨́.
19 Nidiyı̨́ı̨́ʼ nilíinii łah ił áhátʼı̨́ bee bichʼįʼ háínídzíiʼgo ádííníniid, Ayóó ábóodziilii bíká eeshwod. Diné bitahdóó nídiiłtíinii binahatʼaʼ bidziilgo íishłaa.
20 Shá naalʼaʼí, David bikʼíninítą́ą́ʼ. Sheʼakʼah dílzinii bikʼi yaaziidgo yísı̨́ı̨́ʼ.
21 Éí shílaʼ bee bíká anáshwoʼígíí tsʼídá doo bitsʼą́ąjįʼ kódooníił da. Shigaan ałdóʼ bidziilgo ábósin doo.
22 Anaʼí nilíinii doo biyaʼiidooloh da. Diné doo yáʼáshóonii doo atíbidoolíił da.
23 Bidáahjįʼ biʼanaʼí danilíinii bikʼeh dideeshdleeł, índa bikʼee dadiniihii naaʼabízhdiyeeshxal.
24 Shaʼahódlíii áádóó haa aʼááh nisinii bił hólǫ́ǫ doo. Shízhiʼ binahjįʼ hanahatʼaʼ bidziil dooleeł.
25 Tónteel ałdóʼ bee hóhólníihgo áhodeeshłííł áádóó hálaʼ nishʼnáájí bee tooh danílínígíí bee hóhólníih doo.
26 ShiTaaʼ nílı̨́, shiDiyin God, tsé bee yisdéíyáii nílı̨́, níigo shichʼįʼ hadoodzih.
27 Alą́ąjįʼ yizhchíinii shííʼ jílı̨́įgo ałdóʼ áhodeeshłííł. Nahasdzáán bikáaʼgi aláahgo naatʼáanii danilíinii bitisdi aláahgo naatʼáanii jílı̨́įgo áhodeeshłííł.
28 Haa aʼááh nisinígíí hoolʼáágóó bee haa áháshyą́ą doo áádóó hoł ahadiʼnishtʼáanii bidziilgo hoł íínísin doo.
29 Hatsʼą́ą́dóó oochíłígíí hoolʼáágóó hólǫ́ǫgo ádeeshłííł áádóó yótʼááh bił yoołkáłígi átʼéego hoolʼáágóó hojooʼáałgo áhodeeshłííł.
30 Haʼáłchíní éí shibee hazʼáanii yóóʼadeideezʼą́ągo áádóó bee nihodiishʼaahii doo yikʼehgo deíkááhgóó,
31 bee nihoyíʼáanii doo bił dáálįįdgóó índa shibikʼeh óʼooʼníiłii doo yikʼeh dahółʼı̨́ı̨́góó,
32 áko bee hazʼáanii nidajiitíihii biniinaa tsin bee náhodínéeshxał; doo ákwii ádáátʼįįdii biniinaa beʼatsxis bee atídadeeshłííł.
33 Ákondi tʼáadoo ánásįįhí haa aʼááh nisin doo; bee shaa hodzódlíhígíí doo bee shiyoochʼíid da.
34 Shibee ahaʼdeetʼáanii tsʼídá biʼdeeshłííł, índa saad bee hahásdzíiʼii doo łahgo áńdeeshdlíił da.
35 Diyin nishłínígíí binahjįʼ tʼáá aaníí ádíshníigo David doo dínéeshʼahgóó tʼááłáhídi bee ádee hadeesdzííʼ.
36 Bitsʼą́ą́dóó oochíłígíí hoolʼáágóó hólǫ́ǫ doo. Jı̨́honaaʼéí yigáłígi átʼéego hojooʼáał doo.
37 Ooljééʼ nahalingo hoolʼáágóó bibikááʼdóó nahatʼáii hashtʼeilyaa doo. Éí yáʼąąshdi tʼáá aaníígóó halneʼígíí nahalingo bibikááʼdóó nahatʼáii niłdzilgo siʼą́ą doo. Síilah.
38 Nidi kʼad akʼah bikʼi yeiniziidgo yínísı̨́įʼii nahjįʼ ahoyíníłhango doo honinizı̨́įʼ da áádóó hachʼįʼ tʼáá íiyisí tʼóó báhádzidgo bee atíʼéłʼíinii bee hachʼįʼ atsííníkééz.
39 Ná naalʼaʼí bee bił ahaʼdíínítʼáanii nahjįʼ kwíinilaa. Binaatʼá chʼah baa náádiniʼą́ągo łeeshtahjįʼ ahííníłhango doo ílı̨́ı̨́góó íinilaa.
40 Tsé ahéédaastłʼin bí nítʼééʼ yę́ę ałtso nahíníłkaad. Bee dabidziilgo nahazʼánígóó déíníłchxǫʼ.
41 Bą́ą́h hidikáhígíí tʼáá ałtso bighadaʼiiʼnííł. Yił kééhatʼíinii tʼóó bá nidahałtʼiʼ silı̨́ı̨́ʼ.
42 Biʼanaʼí danilíinii bigaan nishʼnáájí dabidziilgo íinilaa. Biʼanaʼí tʼáá ałtso tʼáá íiyisí bił dahózhǫ́ǫgo íinilaa.
43 Bidiltłish bikʼą́ą́h ííníłchxąąʼ áádóó naʼabaah doo yíneelʼą́ą́góó íinilaa.
44 Yee ayóó átʼéii bitsʼą́ą́ʼ náádindlá; bibikááʼdóó nahatʼáii niʼjįʼ naaʼahíníłhan.
45 Tsíłkéí nilı̨́įgo bíyoołkáłígíí bitsʼą́ą́ʼ áłtsʼísígo íinilaa; tʼáá ałtsogóó tʼóó haa yáhásingo áhwiinilaa. Síilah.
46 Bóhólníihii nílíinii, haa nízáágóoshąʼ ákótʼée doo? Hoolʼáágóósh nídidíítʼı̨́ı̨́ł? Daʼ tʼóó báhádzidgo atíʼéłʼíiniísh kǫʼ nahalingo diltłiʼ doo?
47 Sheʼiinaʼ áníłtsogi béénílniih! Tʼáadoo biniyéhígóósh diné ádeinilaa?
48 Háí diné shı̨́įshąʼ doo dadootsaał da? Háishąʼ jishchááʼ bitsʼą́ąjįʼ biiʼ sizíinii háidoołtééł? Síilah.
49 Bóhólníihii nílíinii, tʼáá shiidą́ąʼdii aa aʼááh nínízinii David bichʼįʼ bee naʼahódlíii bee hahíínídzíiʼiishąʼ háájí?
50 Bóhólníihii nílíinii, ná naalʼaʼí danilíinii bá nidahatʼiʼígíí béénílniih; dadineʼé ayóó ádabóodziilii tʼáá ałtso shí daʼatsʼihgo shiʼdiiłʼá.
51 Bóhólníihii nílíinii, éidí yee niʼanaʼí ándahałtʼiʼ áádóó akʼah bikʼi yeiniziidgo yínísı̨́įʼii bikékʼeh hashchı̨́ı̨́góó yigáałgo tʼáá éí ałdóʼ yee yaa daadloh.
52 Bóhólníihii hoolʼáágóó baa dahohniih! Tʼáá ákótʼée leʼ áádóó tʼáá ákótʼée doo.
