Psalm 91:1-16
91 Tʼáá háiida Aláahgo Ayóóʼátʼéii binahontʼingo hazʼą́ągi kééhojitʼínígíí éí Aláahgo Ayóóʼábóodziilii bichahaʼohgi hojílǫ́ǫ doo.
2 Bóhólníihii éí bineʼ ahinishchéehii áádóó bineʼ yisdziihii, shiDiyin God baa jííníshłíii nilı̨́, dideeshniił.
3 Háálá éí tsídii ahiyiileehii índa tsʼííh niidóóh ooghą́ąłii bitsʼą́ą́dóó yisdándoołtééł.
4 Diyin God bitsʼos nineezígíí* nikʼíidoołtih áádóó bitʼaʼ biyaajįʼ yisdádínííchééł. Yee baʼahódlíii éí naagé índa béésh téél áchʼą́ą́h dah yitʼáałii nihá nilı̨́.
5 Tłʼéeʼgo báhádzidii índa jı̨́įgo kʼaaʼ yee daʼdiłtʼohígíí doo bééníldzid da doo.
6 Chahałheełgóó naałniihii índa ałnéʼéʼáahgo atéʼéłʼı̨́įgo nidaʼałtseedii doo bééníldzid da doo.
7 Tʼááłáhídi mííl níighahgi naaʼadínóodah índa neeznáadi mííl ninishʼnáájígo naaʼadínóodah, nidi doo nitʼáahjįʼ dadookah da.
8 Diné doo yáʼádaashóonii kʼéédabidiʼdoolníłígíí ninááʼ bee tʼóó yidííłtsééł.
9 Bóhólníihii Aláahgo Ayóóʼátʼéii bineʼ anáníshchéehii éí biiʼ nighan áhwiinilaaígíí bąą
10 doo yáʼátʼéehii doo łaʼ nikʼi hwiidooleeł da índa naałniih doo łaʼ niníbaal yitʼáahjįʼ doołnih da.
11 Háálá yínááłgóó bidiyingo nidaalʼaʼí naa ádahalyą́ągo íidoolííł.
12 Bílaʼ yee dah daníłteehgo doo tsé bikʼą́ą́h didííltał da.
13 Náshdóítsoh bitsiijįʼ daditłʼooígíí índa tłʼiish báhádzidii bikááʼgóó chʼídíínááł. Náshdóí yáázh bitsiijįʼ daditłʼooígíí índa tłʼiish bikʼi nidíínaał.
14 Ayóóʼáshóʼnínígíí bąą yisdádeeshtééł. Shízhiʼ yééhósinígíí bąą nidziidzííh dooleełgi nihodeeshtééł.
15 Shichʼįʼ sodoolzingo bichʼįʼ énáhodeesįįł; bichʼįʼ nahwiiʼnáago bił honishłǫ́ǫ doo. Yisdádeeshtééł áádóó shił nilı̨́į doo.
16 Iiná nineezgo há ádeeshłíiłgo bee nízhʼdooldįįł áádóó shibee yisdáʼiildéehii hachʼįʼ ííshjání ádeeshłííł.
Footnotes
^ Naʼahóóhai biyázhí yikʼi sidáhígíí nahalingo Diyin God nihaa áhályánígíí ááhyiłní.
