Psalm 95:1-11
95 Haaʼíshąʼ, Bóhólníihii bichʼįʼ dahwiitaał! Baa nihił dahózhǫ́ǫgo tsé bee yisdéiikaii bichʼįʼ yéego dahwiitaał!
2 Bichʼįʼ ahééh daniidzingo bidááhdóó nihidiikah, áádóó nihił dahózhǫ́ǫgo sin bee bichʼįʼ yéego dahwiitaał doo!
3 Háálá Bóhólníihii éí Diyin God ayóó átʼéii nilı̨́; diyin dabidiʼníinii tʼáá ałtso biláahgo Aláahgo Naatʼáanii ayóó átʼéii nilı̨́.
4 Nahasdzáán biiʼgóó ayóó ádahonízádígíí bílákʼee silá. Dził aghádahazʼáhígíí ałdóʼ bí.
5 Tónteel ałdóʼ bí, háálá bí áyiilaa áádóó niʼ yíłtseii áyiilaa.
6 Haaʼíyeeʼ, bichʼįʼ yaa ádadiiʼníiłgo bichʼįʼ nidahodiidlaał, Bóhólníihii ánihiilaii bichʼįʼ nitsidadidiigoh!
7 Háálá bí nihiDiyin God nilı̨́, áádóó bikéyah hootsogi bidineʼé naakaígíí niidlı̨́. Jó, bidibé dah yooléełii daniidlı̨́.
Díí jı̨́ Diyin God biinééʼ dadoohtsʼaʼgo,
8 shą́ą́ʼ, honoojíidi ałghadazhditʼááh yę́ędą́ą́ʼ áádóó Diyin God nabídazhnitaahgo yoołkááł yę́ędą́ą́ʼ tʼą́ą́zhʼneezhjéʼígi átʼéego tʼáadoo nihijéí dantłʼizí.
9 Áadi shinaanish dayooʼı̨́ı̨́ nítʼééʼ nidi, danihizhéʼé yę́ę shíkadaʼiisxilgo nashídaneeztą́ą́ʼ.
10 Dízdiin nááhaijįʼ éí oochíłígíí bichʼįʼ doo shił hóózhǫǫdgóó ádííniid, Diné tʼáá bí bijéí yee ádił nidaʼílzííh. Áníshtʼéii doo bił béédahoozı̨́ı̨́ʼ ádaatʼée da.
11 Áko tʼóó báhádzidgo atíʼéshʼíinii binahjįʼ ádee hadeesdzíiʼgo ádííniid, Hááʼáyı̨́ı̨́h bee hoołʼaʼígíí tsʼídá doo biih dazhdookah da.
