Revelation 10:1-11
10 Nítʼééʼ náánáłaʼ diyingo naalʼaʼí ayóó ábóodziilii yáʼąąshdę́ę́ʼ hadahooleełgo yiiłtsą́, kʼos yee hadítʼéego, náátsʼíílid bitsiitsʼiin bináztʼiʼ, biniiʼ éí jı̨́honaaʼéí nahalin, bijáád éí kǫʼ náázíinii nahalin.
2 Naaltsoos yisdisí áłtsʼíísí léiʼ ąą átʼéego dah yooʼááł. Bikeeʼ nishʼnáájí yee tónteel bikáaʼgi nideelʼeez, índa bikeeʼ nishtłʼají yee nahasdzáán bikáaʼgi nideelʼeez.
3 Náshdóítsoh bitsiijįʼ ditłʼooígíí ayóó íitsʼaʼgo ádííniid nahalingo áníigo iiʼniʼ tsostsʼidígíí dadiistsʼą́ą́ʼ.
4 Iiʼniʼ tsostsʼidígíí dadiistsʼą́ąʼgo shí kʼadę́ę akʼeʼniiłchı̨́ı̨́ nítʼééʼ yáʼąąshdę́ę́ʼ iinééʼ kóníigo disétsʼą́ą́ʼ, Iiʼniʼ tsostsʼid ádadííniidígíí tʼáadoo bikááʼ áníléhí, tʼóó dadiʼníłjeeh.
5 Diyingo naalʼaʼí tónteel bikáaʼgi tʼáá éí nahasdzáán bikáaʼgi sizı̨́įgo yiiłtsánígíí, nishʼnáájí yee yáʼąąshgóó dah didiilniiʼgo
6 hoolʼáágóó ahóyéelʼáágóó hináanii, yáʼąąshdi índa biyiʼdi dahólóonii, nahasdzáán índa biyiʼdi dahólóonii áádóó tónteel índa biyiʼdi dahólóonii áyiilaii, Náás dootʼihii doo dínóotłʼah da, níigo yee ádee hadoodzííʼ.
7 Nidi diyingo naalʼaʼí tsostsʼid góneʼígíí bidilní yee ádidooniił beiníłką́ągo, Diyin God yee hooʼáałii doo bééhózin da yę́ę bá nidaalʼaʼgo bá dahalneʼii yee yił hoolneʼígi átʼéego bohodoolnííł.
8 Nítʼééʼ yáʼąąshdę́ę́ʼ iinééʼ disétsʼą́ąʼii shichʼįʼ hanáánáádzíiʼgo ání, Nílááh, diyingo naalʼaʼí tónteel bikáaʼgi tʼáá éí nahasdzáán bikáaʼgi sizíinii, bílákʼeegi naaltsoos ąą átʼéego dah yooʼáłígíí nídiiʼaah.
9 Áko diyingo naalʼaʼí baa níyáago, Naaltsoos áłtsʼíísíii shaa níʼaah, bidííniid. Nítʼééʼ áshíłní, Nídiiʼaahgo niyą́; nibid bił díchʼíiʼ dooleeł, nidi nizéeʼdi tsésʼná bitłʼizh nahalingo łikan doo.
10 Áko diyingo naalʼaʼí bílákʼeedóó naaltsoos áłtsʼíísígíí nídiiʼą́ągo yíyą́ą́ʼ, nítʼééʼ shizéeʼdi tsésʼná bitłʼizh nahalingo łikan, nidi ahéłnaʼgo shibid bił díchʼííʼ silı̨́ı̨́ʼ.
11 Áádóó ánááshidooʼniid, Nihokááʼ dineʼé danilíinii áádóó ałʼąą dineʼé bił dah nidahazʼáanii áádóó bizaad ałʼąą ádaatʼéii índa aláahgo naatʼáanii danilíinii tʼóó ahayóígóó bichʼįʼ ádahodooníiłii tsʼídá baa ninááhodíílnih.
