Revelation 19:1-21
19 Kódzaadóó bikʼijįʼ yáʼąąshdi ayóó ázhnéelą́ąʼgo hadazhdeeshghaazhígi átʼéego iinééʼ ayóó íitsʼaʼgo disétsʼą́ą́ʼ kódaaníigo,
Bóhólníihii baa dahohniih!Yisdáʼiildééh áádóó ayóó éʼétʼé [áádóó ił ídlı̨́] índa adziil éí nihiDiyin God bííʼ ádaatʼé!
2 Bee ánihwijiiʼaahii tʼáá aaníí áádóó tsʼídá tʼáá ákogi ádaatʼé!Háálá ałjiłnii náʼáyóó átʼéii naʼageh yee tsiʼnaagháago yee nahasdzáán yiyííłchǫʼ yę́ę baa nídzístʼįįdgo bá nihozhníʼą́, áádóó há nidaalʼaʼí dabidił bitsʼádaazlı̨́įgo áyiilaago biniinaa kʼéézhdiidlaa.
3 Nááʼáłdóʼ hanáádadeeshghaazh, Bóhólníihii baa dahohniih! Kin haalʼáii dookʼą́ąłgo bilid hoolʼáágóó ahóyéelʼáágóó dego iʼiijooł.
4 Ákohgo naadiin dı̨́ı̨́ʼ hastóí áádóó haʼátʼíí shı̨́ı̨́ dahináanii dı̨́ʼígíí tséʼyaa daneeshjoolgo Diyin God éí bikááʼdóó nahatʼáii yikááʼ dah sidáii yichʼįʼ nidahasáago kódaaní, Tʼáá ákótʼée doo! Bóhólníihii baa dahohniih!
Dibé Yázhí nilíinii iiyehgo adaʼniidą́ąʼii
5 Nítʼééʼ bikááʼdóó nahatʼáii bitsʼą́ą́dóó iinééʼ kódííniid,
Diyin God bá nidaałʼaʼii tʼáá ánółtso, aʼohgo ádanohtʼéii áádóó ayóó ádanohtʼéii dahodíínóhsinii, nihiDiyin God baa dahohniih!
6 Nítʼééʼ ayóó ázhnéelą́ąʼgo hadazhdeeshghaazhígi átʼéego, tó tʼóó ahayóí hadah yiilı̨́įgo diitsʼaʼígi átʼéego índa tʼóó báhádzidgo daʼdiʼnínígi átʼéego kóníigo náádisétsʼą́ą́ʼ,
Bóhólníihii baa dahohniih!Háálá Bóhólníihii nihiDiyin God Ayóóʼátʼéii éí nantʼá!
7 Haaʼíshąʼ nihił dahózhǫ́ǫ doo áádóó tʼáá íiyisí nihił dahózhǫ́ǫgo baa dahwiiʼniih doo!Háálá Dibé Yázhí nilíinii adooyehjįʼ ahoolzhiizh, índa yáʼdooyehii hashtʼeʼíʼdiilyaa.
8 Áłtsʼóózígo yisdizígíí bee naʼatʼą́hí łigaii ditsʼidgo ályaii bídazdilid índa tsʼídá chin bąąh ádinii yee hadidooníiłgo baa deetʼą́.Jó, díí naakʼąʼ ałgaígíí éí Diyin God bidiyı̨́ı̨́ʼ tsʼídá tʼáá ákogi ádaadzaii átʼé.
9 Nítʼééʼ diyingo naalʼaʼí áshidííniid, Díí bee akʼeʼíłchí: Dibé Yázhí nilíinii iiyehgo adaʼniidą́ąʼjįʼ bidaʼiisniiʼii bikʼidahojidlí. Áádóó ánááshidooʼniid, Díidí Diyin God tʼáá aaníígóó áníinii ádaatʼé.
10 Áko biyaajįʼ nitsidinígoʼ bichʼįʼ nahodeeshłaał biniyé, nidi áshidííniid, Tʼáadoo ánítʼíní! Ni áádóó nikʼisóó Jesus baa haneʼii dayoodlánígíí yił nidaalʼaʼí łaʼ áshtʼı̨́. Diyin God bichʼįʼ nahółá! Háálá Jesus baa haneʼii bee náásgóó ádahodooníiłii bee baa dahojilneʼ.
Łı̨́ı̨́łgaii yikʼi dah sidáii
11 Nítʼééʼ yáʼąąshii ąą ádzaago, jóʼakon, łı̨́ı̨́łgaii léiʼ yiiłtsą́! Yikʼi dah sidáii éí Baʼahódlíii índa Tʼáá Aaníinii wolyé, áádóó tsʼídá tʼáá ákogi átʼéego ánihodooʼááł índa anaaʼ ííłʼı̨́.
12 Binááʼ éí kǫʼ dah nídínoʼígíí nahalin, naatʼá chʼah tʼóó ahayóigo bitsiitsʼiin bąąh sinil. Yízhí łaʼ bee bikʼeʼashchı̨́, éí tʼáadoo bił bééhóziní da, nidi tʼáá bí tʼéiyá.
13 Ééʼ dił bénástsoozgo yee hadítʼé. Diyin God bizaad bee biʼdójí.
14 Yáʼąąshdę́ę́ʼ siláo yílʼáii, éí áłtsʼóózígo yisdizígíí bee naʼatʼą́hí łigaii ditsʼidgo ályaii tsʼídá chin bąąh ádaadinii yee hadadítʼéego łı̨́ı̨́ʼ daalgaii yee bikééʼ yinééł.
15 Diltłish deeníinii bizééʼdę́ę́ʼ hadzisihgo ałʼąą dineʼé bił dah nidahazʼą́ą́góó yee yikʼeh didoodleeł áádóó béésh hał yee yinantʼáa doo; chʼil naʼatłʼoʼii bee yiljizhii bee Diyin God Aláahgo Ayóóʼábóodziilii tʼóó báhádzidgo bibee atéʼélʼíinii yąąh haidoonih.
16 Biʼééʼ bikáaʼgi áádóó bitsooskʼidgi kótʼéego yízhí bee bikʼeʼashchı̨́, Aláahgo naatʼáanii danilíinii yiNanitʼaʼí índa bídahólníihii bee Bóhólníihii átʼı̨́.
17 Nítʼééʼ diyingo naalʼaʼí jı̨́honaaʼéí yiiʼ sizı̨́įgo náánéiłtsą́. Áko nidaatʼaʼii yótʼáahdi naaldeehii ayóó íitsʼaʼgo kóníigo yichʼįʼ ání, Hágo, ayóó átʼéego Diyin God bá adaʼniidą́ąʼgi baa áłah hohłeeh!
18 Aláahgo naatʼáanii danilíinii dabitsįʼ, siláo binanitʼaʼí danilíinii dabitsįʼ, diné ayóó ábóodziilii dabitsįʼ, łı̨́ı̨́ʼ áádóó bikʼi dah naazdáii dabitsįʼ, índa diné tʼáá ałtso, doo naalteʼ danilíinii áádóó naalteʼ danilíinii, índa diné aʼohgo ádaatʼéii áádóó ayóó ádaatʼéii dabitsįʼ dadoołghał biniyé áłah hohłeeh.
19 Nítʼééʼ naaldlooshii naayééʼ nilíinii áádóó nahasdzáán bikááʼgóó aláahgo naatʼáanii danilíinii bisiláo tʼáá bił, éí łı̨́ı̨́ʼ yikʼi dah sidáhígíí bisiláo bił yikʼijįʼ anaaʼ ádeidoolííł biniyé áłah silı̨́įʼgo yiiłtsą́.
20 Áko naaldlooshii naayééʼ nilíinii bił niʼdeedéél áádóó tʼóó áhodilʼı̨́įgo halneʼii, éí naaldlooshii naayééʼ nilíinii binááł álílee kʼehgo bee éédahózinii áyiilaago bee naaldlooshii naayééʼ nilíinii bibee íʼdiidlííd bee bídaʼdiidlidígíí áádóó tʼáá éí beʼelyaii yichʼįʼ nidahałáá nítʼééʼ yę́ę álílee kʼehgo bee éédahózinii yee yiʼdeezloʼii ałdóʼ bił niʼdeedéél. Éí tʼáá áłah tʼáá hináago kǫʼ beʼekʼid tsékǫʼ bił dookʼą́ąłii biyiʼ góneʼ aheestłʼííd.
21 Áko łı̨́ı̨́ʼ yikʼi dah sidáii bizééʼdę́ę́ʼ diltłish hadzisihii bee dineʼé daadziihígíí nidaaztseed, índa dabitsįʼígíí nidaatʼaʼii tʼáá átʼé nídeineesdą́ą́ʼ.
