Revelation 4:1-11
4 Kódzaadóó bikʼijįʼ dééʼı̨́ı̨́ʼ, nítʼééʼ yáʼąąshdi dáádílkał ąą ádzaago yiiłtsą́. Átséédą́ą́ʼ iinééʼ dilnígi átʼéego shichʼįʼ yáłtiʼgo disétsʼą́ąʼii ání, Wóshdę́ę́ʼ hasínááh, kodóó náásgóó ádahodooníiłii nichʼįʼ bééhózingo ádeeshłííł.
2 Tʼáá áko Níłchʼi Diyinii shikʼi hooleʼ, nítʼééʼ yáʼąąshdi bikááʼdóó nahatʼáii łaʼ siʼą́, bikáaʼgi łaʼ dah dzizdá!
3 Ákweʼé dah sidáhígíí tsé daʼílíinii, jásper wolyéhígíí índa sárdiyas wolyéhígíí bitsʼádiʼnídínígi átʼéego hatsʼádiʼnílííd, índa bikááʼdóó nahatʼáii binaagóó náátsʼíílid tsé daʼílíinii émerald wolyéhígíí nahalingo ahéénítʼiʼ.
4 Díí bikááʼdóó nahatʼáhígíí binaagóó náánáłaʼ bikááʼdóó nidahatʼáii naadiin dı̨́įʼgo ahéénínil, díí bikááʼdóó nidahatʼáii ahéénínilígíí bikááʼdóó hastóí naadiin dı̨́ı̨́ʼ yiltʼéego* biʼééʼ daalgaigo índa óola naatʼá chʼah dabichʼahgo dah naháaztą́.
5 Díí bikááʼdóó nahatʼáii á siʼánígíí bitsʼą́ą́dóó atsiniltłʼish anídahataʼ áádóó iinééʼ dadiitsʼaʼ índa daʼdiʼní, áádóó bikááʼdóó nahatʼáii bidááhdóó bee hoolʼiní tsostsʼid dadiltłiʼgo sinil, éí Diyin God biNíłchʼi tsostsʼidgoígíí ádaatʼé;
6 bikááʼdóó nahatʼáii bidáahgi haʼátʼíí shı̨́ı̨́ beʼekʼid nahalingo tsésǫʼ biisdííłtólígi átʼéego yiiłtsą́.
Áádóó bikááʼdóó nahatʼáii binaagi tʼáá dı̨́ı̨́ʼgóó, haʼátʼíí shı̨́ı̨́ dahináanii bidááhdę́ę́ʼ índa bineʼdę́ę́ʼ anááʼ bee dadilkǫǫhgo yiiłtsą́.
7 Átséhígíí náshdóítsoh bitsiijįʼ ditłʼooígíí nahalin, naaki góneʼígíí dóola yázhí nahalin, tááʼ góneʼígíí diné yilniiʼ, índa dı̨́ı̨́ʼ góneʼígíí atsá yitʼah nahalingo yiiłtsą́.
8 Áádóó díí haʼátʼíí shı̨́ı̨́ dahináanii dı̨́įʼgo yiiłtsánígíí tʼááłáʼí nítínígo bitʼaʼ dahastą́ągo tʼáá naazı̨́ı̨́ nítʼééʼ biiʼdę́ęʼ nidi anááʼ yee dadilkǫǫh, áko éí tʼáadoo dadiiłheełí iʼiiʼaah áádóó niyiiłkaah kódaaní:
Diyin, diyin, diyin, éí Bóhólníihii Diyin God Aláahgo Ayóóʼáhóodziilii,hoolʼáádę́ę́ʼ hojílóonii, kʼad hojílóonii, índa jidoogáałii!
9 Haʼátʼíí shı̨́ı̨́ dahináanii éí bikááʼdóó nahatʼáii bikááʼdóó dah sidáii tʼáá éí hoolʼáágóó ahóyéelʼáágóó hináanii nilíinii yaa dahaniihgo bił danilı̨́, áádóó yichʼįʼ ahééh danízingo,
10 naadiin dı̨́ı̨́ʼ hastóíígíí éí bikááʼdóó nahatʼáii yikááʼdóó dah sidáii yidáahjįʼ tséʼyaa nídaniljołgo, hoolʼáágóó ahóyéelʼáágóó hináanii yichʼįʼ nidahałá, índa bikááʼdóó nahatʼáii bidáahjįʼ binaatʼá chʼah adayiiníiłgo kódaaní:
11 Diyin God nihiBóhólníihii,ayóó éʼétʼé áádóó ił ídlı̨́ índa óhólnííh bą́ą́h nílı̨́,háálá tʼáá ałtsoní íinilaa,éí íinínízinii bee ádaalyaago dahólǫ́.
Footnotes
^ Hastóí naadiin dı̨́ı̨́ʼ yiltʼéego, nínígíí éí yáʼąąshdi Diyin God baʼáłchíní nihá naazı̨́įgo yitsʼáinínilii ádaatʼı̨́. Naakitsʼáadah éí Ízrel dineʼé yá naazı̨́ áádóó naakitsʼáadahgo éí Jesus yikééʼ tádookai yę́ę daatsʼí.
