Romans 10:1-21
10 Shikʼisóó, Ízrel dineʼé yisdábidiʼdooʼniłígíí shijéí tłʼááhdę́ę́ʼ laanaa nisingo Diyin God bichʼįʼ sodiszin!
2 Háálá éí tʼáá íiyisí Diyin God yídin danilı̨́įgo shił bééhózingo baa chʼíhwiishʼaah, nidi tʼáá aaníinii bikʼehgo éí doo bił béédahózin da.
3 Háálá Diyin God bitsʼą́ą́dę́ę́ʼ tsʼídá tʼáá ákogi átʼéii doo hoł béédahózingóó tʼáá hó tsʼídá tʼáá ákogi ádajítʼéego chʼééh ádazhʼdilnééh, áko haitʼéego Diyin God éí diné tsʼídá tʼáá ákogi ádaatʼéego ádeileʼii doo bikʼeh dahojíłʼı̨́į da.
4 Bee hazʼáanii Mózes baa deetʼáanii bee tʼáá ákogi ádajítʼé ídazhʼdilnééh nítʼéʼígíí éí Christ niiníłtʼiʼ, áko tʼááłáʼí jinítínígo oodląʼ bee baa deijólíii tsʼídá tʼáá ákogi ádajítʼéego Diyin God há hahadziih.
Diné tʼáá ałtso bá yisdáhóótʼiʼ
5 Bee hazʼáanii bikʼeh hojíłʼı̨́įgo bee tsʼídá tʼáá ákogi ájítʼéii yaa halneʼgo kóníigo Mózes yee akʼeʼashchı̨́, Jó, bee hazʼáanii biʼjiłʼíinii tʼáá éí bee jiináa doo.
6 Nidi oodlą́ bee aa dzódlí bee tsʼídá tʼáá ákogi ájítʼéii yaa halneʼgo kóní, Tʼáadoo tʼáá ádííghahígo ádíníní, Háishąʼ Christ bił adazhdooʼash biniyé yáʼąąshgóó doogááł,
7 éí doodago, Háishąʼ Christ daaztsą́ą́dę́ę́ʼ bił háázhdootʼash biniyé nahasdzáán biyiʼ góyaa ahozhdooleeł?
8 Jó nidi kóní, Saad éí níighahgóó hólǫ́; nihizálátahdóó índa nihijéí biiʼ hólǫ́ǫgo bee yádaałtiʼ; tʼáá éí saad woodlą́ągo baa dahwiilneʼ.
9 Tʼáá ni nizaad bee, Jesus éí Bóhólníihii nilı̨́, diníigo bee ádee hadíínídzíiʼgo, áádóó Diyin God éí Jesus daaztsą́ą́dę́ę́ʼ néidiisáago nijéí bee yinídlą́ągo yisdándiʼdooltééł.
10 Háálá hajéí bee Jesus joodląąhgo tsʼídá tʼáá ákogi ájítʼéego há haʼadzih, áádóó tʼáá hó Jesus bee ádee hazdidzihgo yisdáhoʼdiltééh.
11 Diyin God bizaad bee akʼeʼashchíinii ání, Tsʼídá tʼáá háiida hoosdląądgo haa dzoozlíiʼii éí doo tʼóó baa yáhásinígi ábidiʼdoolníił da.
12 Jew dineʼé áádóó Gríik dineʼé danilíinii doo ałʼąą átʼéego baa nitsáhákees da, háálá tʼááłáʼí Bóhólníihii jílínígíí diné tʼáá ałtso bee hóhólnííh, áádóó tʼáá ałtso hachʼįʼ sodadilzinígíí éí tsʼídá aláahgo bikʼiijidlí.
13 Háálá tʼááłáʼí jinítínígo Bóhólníihii bízhiʼ dajózhíigo sodazdilzinígíí éí yisdáhwiinííł.
14 Nidi diné tʼah doo dahoodląąhiishąʼ haa yitʼéego hachʼįʼ sodadilzin doo? Tsʼídá tʼah doo haa dahodiitsʼı̨́įhiishąʼ haa yitʼéego dahwiidoodląął? Bił hodoolnihii ádingoshąʼ haitʼéego haa dahodidootsʼı̨́ı̨́ł?
15 Dahodoolnihii doo dabiʼdoolʼaadgóoshąʼ haa yitʼéego haneʼ yáʼátʼéehii yaa dahodoolnih? Tʼáá Diyin God bizaad bee akʼeʼashchíinii ánínígi átʼéego,
Haneʼ yáʼátʼéehii bee hózhǫ́ náhoodleełii,éí haneʼ baa hózhóonii bitsʼą́ą́dóó yáʼádaatʼéehii yaa dahalneʼgo yił neheeskaígíí,dooládóʼ bikeeʼ ayóó ádanóolnin da!
16 Jó, nidi diné doo tʼáá ałtso haneʼ yáʼátʼéehii yikʼehgo ádaadzaa da. Aizéíyah ání, Bóhólníihii nílíinii, háidashąʼ baa nidahwiilneʼii dayoosdląąd?
17 Áko Diyin God bizaad* dazdiitsʼaʼígíí bee daʼjoodlą́ągo baa deijólí nidajiileeh.
18 Nidi naʼídíshkid: Daʼ tʼáásh doo daʼdiiztsʼą́ąʼ da? Nidagaʼ, tʼáá aaníí daʼdiiztsʼą́ą́ʼ:
Nahasdzáán bikáaʼgi tʼáá ałtsogóó dabiinééʼ adahideezdláád,índa nahasdzáán nidaneesʼą́ąjįʼ dahalneʼ.
19 Ninááʼídíshkid: Daʼ Ízrel dineʼésh tʼáadoo bił éédahoozin da? Átséedi Mózes kódííniid:
Łaʼ dineʼé doo tʼáá aaníí tʼááłáʼí dineʼé danilíinii deinołchʼı̨́įdgo ánihideeshłííł.Doo ádahalyáanii dineʼé bee nihá dahodeeshchįįł.
20 Áádóó Aizéíyah tʼáadoostiʼee ánáádooʼniid:
Tʼáadoo hadashineeztą́ąʼ da yę́ę shikʼídaaskai.Tʼáadoo shíndaʼídééłkid da yę́ę bichʼįʼ ádééhosiszįįd.
21 Nidi Ízrel dineʼé ááhyiłníigo ánáádooʼniid,
Diné doo akʼeh dahółʼíinii áádóó bízhą́ daʼílíinii shá bíighah shílaʼ tʼáá ałchʼishjí bee bichʼįʼ dah deeshnih nítʼééʼ.
Footnotes
^ Éí doodago kótʼé, Christ baa haneʼ.
